Avqustun 26-da Azərbaycanın Bütövlüyü Uğrunda Cəmiyyət Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Vətənpərvərlik hissinin yüksəldilməsində QHT-lərin rolu" layihəsi çərçivəsində aprel döyüşlərində şəhid olmuş Bağırov Emin İmran oğlu və Qurbanlı Fəxrəddin Seyfəddin oğlunun ailəsini ziyarət edib.
Görüş zamanı layihə rəhbəri Məlahət Xəlilova qeyd edib ki, aprel döyüşlərində həlak olan 2 şəhidin ailəsini ziyarət etmək "Vətənpərvərlik hissinin yüksəldilməsində QHT-lərin rolu" layihəsinin icra proqramına daxil edilib: "Şəhid ailələrini ziyarət etməkdə məqsəd vətəndaş cəmiyyətləri tərəfindən onlara mənəvi dəstək verməkdir. Düzdür, hazırkı şəraitdə Azərbaycan dövləti, xüsusilə dövlət başçısı şəhid ailələrinə xüsusi diqqətlə yanaşır. Müvafiq dövlət qurumları tərəfindən şəhid ailələrinə qayğı göstərilir, onlar diqqətdə saxlanır. Eyni mövqe ölkə ictimaiyyəti tərəfindən də nümayiş etdirilir. Biz də bir vətəndaş cəmiyyəti olaraq qərara aldıq ki, şəhid ailələrinin yanında olaq, onlardan öz diqqət və qayğımızı əsirgəməyək". M.Xəlilova əlavə edib ki, təmsil etdiyi ictimai birlik şəhid ailələrinin problemlərini, ehtiyac və arzularını araşdıraraq müvafiq orqanlar qarşısında qaldıracaq. Eyni zamanda, şəhid qəhrəmanların keçdikləri həyat və döyüş yolu, onların Azərbaycanın ərazi bütövlüyü, işğal altında olan torpaqların geri alınmasında göstərdikləri qəhrəmanlıqlar media vasitəsilə ictimailəşdiriləcək: "Aprel döyüşlərindən sonra ölkə gəncləri arasında vətənpərvərlik hissləri xeyli yüksəlib. Belə bir zamanda şəhidlərimizin göstərdikləri qəhrəmanlıqlar onlar üçün əsl örnək ola bilər. Artıq əksər gənclər Emin və Fəxrəddin zirvəsinə, şəhidlik zirvəsinə yüksəlmək arzusu ilə yaşayır. Heç şübhəsiz, gənclərin belə vətənpərvər ruhda böyüməsində valideynlərin də rolu əvəzsizdir". Hər iki şəhidin valideynləri övladlarının şəhid olmaları ilə fəxr etdiklərini bildirib. Qeyd ediblər ki, övladları Vətən yolunda, Azərbaycanın suverenliyi uğrunda şəhid olub. Ziyarət zamanı ABUC adından şəhid ailələrinə ərzaq yardımı edilib.
Xatırladaq ki, şəhid Bağırov Emin İmran oğlu 1996-cı il iyulun 15-də Bakı şəhərində anadan olub. Binəqədi rayonundakı 182 saylı məktəbi bitirən Emin 2014-cü ildə həqiqi hərbi xidmətə çağırılıb. Milli Ordunun xüsusi təyinatlı bölməsində kəşfiyyatçı kimi xidmət keçib.
Cəbhə xəttində gedən döyüşlərdə şəhid olan Qurbanlı Fəxrəddin Seyfəddin oğlu Azərbaycan Universitetinin məzunu olub. F.Qurbanlı 2015-ci ildə Binəqədi rayonundan hərbi xidmətə çağırılıb. 2016-cı il aprelin 8-də hərbi xidmətini yerinə yetirərkən Azərbaycanın ərazi bütövlüyünün bərpası uğrunda gedən döyüşlərdə şəhid olub.
Xəbər xidməti
