Bu günlərdə mətbuatda Azərbaycan Respublikasının Prezidenti yanında Bilik Fondunun Aparat rəhbərinin müavini – Ölkədaxili layihələr sektorunun müdiri Hacı Nərimanoğlunun İyulun 15-də qardaş Türkiyədə dövlət çevrilişinə cəhd, ondan sonrakı proseslər, baş verən olayların Azərbaycandakı əks-sədasının ona xatırlatdığı tədbir barədə maraqlı yazısı dərc olunub. Həmin yazını diqqətinizə çatdırırıq:
2009-cu il, 30 aprel. "Gülüstan" sarayında Dialoq Avrasiya Platforması (DAP) və "Dialoq Avrasiya" dərgisinin Azərbaycanda 10-cu ildönümü münasibətilə "İslam mədəniyyəti və müasir dünyada dialoq" mövzusunda tədbir keçirilir.
Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov, Dini Qurumlarla İş Üzrə Dövlət Komitəsinin sədri Hidayət Orucov, Qafqaz Müsəlmanları İdarəsinin sədri şeyxülislam Allahşükür Paşazadə öndə görünən sırada əyləşiblər. Törənin təmtərağına söz yoxdu, zəngin süfrə açılıb, sarayı titrədən musiqi sədaları altında film nümayiş olunur, elə təəssürat yaradılır ki, dünyada qlobal problemləri həll edənlərdən biri beynəlxalq səviyyəli dialoqların təşkilatçısı Fətullah Güləndir.
Çıxışlar, təbriklər bir-birini əvəz edir; DAP-ın Azərbaycandakı təsisçisi və fəxri prezidenti, sabiq millət vəkili, xalq yazıçısı, Azərbaycan Yazıçılar Birliyinin sədri Anar Rzayev, DAP-ın Azərbaycan Milli Komitəsinin sədri millət vəkili Nizami Cəfərov, bir çox ölkələrdən tanınmış elm və ictimai xadimlər; Topqapı sarayının müdiri, tarixçi İlber Ortaylı, Rusiya Şərqşünaslıq İnstitutunun direktoru professor Rostislav Ribakov, DAP-ın Qazaxıstan rəhbəri, Yazıçılar Birliyinin sədri professor Nurlan Orazalin, DAP-ın Azərbaycan nümayəndəliyinin katibi Mustafa Saatçı ...danışır, plaketlər təqdim olunur.
Söz Prezident Administrasiyasının rəsmisi Əli Həsənova verilir. O, bu fikirləri vurğulayır:
- Dialoq başqa insanları sənin kimi yaşamağa, düşünməyə təhrik etmək demək deyil. Onun məqsədi dövlətlərdə, cəmiyyətlərdə orta hərəkət oxunu müəyyən etməkdən ibarətdir. Dialoq, tolerantlıq Qurandan, Bibliyadan çox danışmaq da deyil. Cəmiyyətdə tolerantlıq bütün mədəniyyətlərə, dinlərə, davranış normalarına hörmətlə yanaşmaqdan, bunu reallığa çevirməkdən ibarətdir və bunları bir nəfərin adına bağlamaq düzgün deyil.
- "Dialoq Avrasiya" dərgisinin və Platformasının fəaliyyətində birtərəfli təbliğat açıq-aşkar, ciddi hiss olunmaqdadır. Ayrı-ayrı xalqların dəyərləri, mədəniyyəti, tanınmış adamları, Avrasiya bölgəsində yayımlanmağa layiq olan insanlar, liderlər son zamanlar jurnalın səhifələrində getdikcə daha az-az görünür.
- Azərbaycan müsəlman ölkəsi olsa da, dünyəvi dövlət quruculuğu prosesindəki uğurları örnək sayıla bilər.
- Bayaqdan bu tədbirdə, göstərilən filmdə Türkiyə Cümhuriyyətinin qurucusu Mustafa Kamal Atatürkün adının bir dəfə də olsun çəkilməməsi bağışlanmaz günahdır.
- "Mən bunları deməyə özümə borc bildim".
16 ildən çox "AzərTAc”-da çalışmış, çox sayda rəsmi dövlət tədbirlərinin iştirakçısı, yazıya alanı olaraq deməliyəm: Əli müəllimin bu təsirli, nüfuzedici, uzaqgörən, müdrik çıxışı şok effekti yaratmışdı. 7 il üstündən ötməsinə baxmayaraq, bu çıxışın orada iştirak edən, xüsusilə tədbirin təşkilatçıları ilə eyni düşüncədə olmayanların yaddaşında qaldığını düşünürəm.
Saytlarda sözügedən tədbir və çıxışla bağlı informasiyalar qalır.
REDAKSİYADAN: Maraqlı tarixçəsi olan və günün aktual mövzusunu əhatə edən bu yazıda, bəlli ki, hörmətli həmkarımız Hacı Nərimanoğlu bir vacib məsələni qeyd etməyi unudub. Tədbirdə iştirak edənlərin yəqin xatirindədir: təşkilatçılar tədbir salonunda mərhum prezident Heydər Əliyevlə Fətullah Gülənin portretlərini yanaşı asmışdılar. Bu isə Əli Həsənovun ciddi etirazına səbəb oldu. O çox sərt formada bildirdi ki, bir dövlətin qurucusu, memarı ilə dini məzhəb başçısının portretinin yanaşı asılması heç bir məntiqə sığmır. Zaman bu mövqeyin nə qədər uzaqgörən olduğunu göstərməkdədir...
Baki-xeber.com
