Bu gün - Olimpiadanın onuncu günündə beş Azərbaycan idmançısı yarışacaq.
Beləliklə, Azərbaycan yunan-roma güləşciləri Rövşən Bayramov (-59 kq) və Elvin Mürsəliyev (-75kq) güclərini sınayacaq, Olqa İsmayılova trek velosipedi (sprint) üzrə yarışlarda iştrak edəcək, həmçinin boksçular Lorentso Sotomayor (-64 kq, 1/8) və Teymur Məmmədo v(-81 kq, 1/4) növbəti mərhələyə vəsiqə qazanmaq üçün rəqibləri ilə yarışacaq. Bu barədə baki-xeber.com "Trend”ə istinadən xəbər verir.
Xatırladaq ki, 5-21 avqust tarixlərində Braziliyanın Rio-de-Janeyro şəhərində XXXI Yay Olimpiya Oyunları keçirilir. Azərbaycan oyunlarda 56 idmançı ilə 17 idman növündə təmsil olunur.
Qeyd edək ki, Azərbaycan üçün Rio Olimpiadası sayca 7-ci Yay Olimpiya Oyunlarıdır. Azərbaycan Olimpiya hərəkatı tarixində ilk dəfə rekord sayda - 56 idmançı ilə təmsil olunur. Buna gədər Azərbaycanın rekord göstəricisi London Olimpiadasında qeydə alınmışdı - 53 idmançı. Bundan başqa, Azərbaycan Rio-de-Janeyro Olimpiadasında ilk dəfə 4 idman növü - kamandan oxatma, kanoe slalom, trek velosipedi və triatlon üzrə təmsil olunur.
Azərbaycanı Rio Olimpiadasında 7 hakim də təmsil edir - Aydın Ağaəliyev (gimnastika), Lyudmila Quliyeva (akademik avarçəkmə, kanoe slalom, kanoe sprint), Ramil Vəliyev (cüdo), Rauf Əliyev (sərbət güləş), Hicran Şərifov, Vüqar Vəliyev (hər ikisi yunan-Roma güləşi), Zaur Abdullayev (boks).
