Azərbaycan Türkiyədə dövlət çevrilişi cəhdi zamanı yaralananların müalicəsi üçün 100 min dollar məbləğində yardım edib.
Trend Türkiyə Böyük Millət Məclisinin rəsmi saytına istinadən xəbər verir ki, Qafqaz Müsəlmanları İdarəsinin (QMİ) sədri Allahşükür Paşazadə Ankarada Türkiyə Böyük Millət Məclisinin (TBMM) sədri İsmayıl Qəhrəmanla görüşdə simvolik çeki ona təqdim edib.
Azərbaycanın Türkiyəyə dəstəyini bir daha ifadə edən QMİ sədri bildirib ki, Azərbaycan xalqı qardaş Türkiyə xalqının acısını paylaşır. O, Azərbaycanın hər zaman Türkiyə xalqının yanında olduğunu deyib.
İ.Qəhrəman göstərdiyi diqqət və qayğıya görə, Azərbaycan rəhbərliyinə və xalqına dərin təşəkkürünü bildirib.
"Günahsız insanların ölümünə səbəb olanlara müsəlman deməyə heç kəsin haqqı yoxdur”. APA-nın "Anadolu agentliyi”nə istinadən verdiyi məlumata görə, bu sözləri Qafqaz Müsəlmanları İdarəsinin sədri Şeyxülislam Allahşükür Paşazadə Ankarada keçirilən 9-cu Avrasiya İslam Şurası Məşvərət Toplantısında deyib.
O bildirib ki, əgər FETÖ silah və tanklarla xalqa qarşı hərəkət edibsə, bu müsəlmanlıq deyil, şeytanlıqdır.
Allahşükür Paşazadə Türkiyədə dövlət çevrilişinə cəhd zamanı həyatını itirənlərə rəhmət diləyib, yaralılara tezliklə sağalmalarını arzulayıb: "Azərbaycan xalqı və dövləti olaraq Türkiyə dövləti və xalqının yanındayıq. 15 iyul gecəsi həm Azərbaycan, həm də Türkiyə üçün böyük imtahan oldu. Allaha şükürlər olsun ki, Türkiyə xalqı prezident Rəcəb Tayyib Ərdoğanın liderliyi ilə bu imtahanda qalıb oldu. Türk xalqı müstəqilliyinə sahib çıxdı və gələcəyinin asılılıq altına alınmasının qarşısını aldı. FETÖ ilə mübarizəmiz davam edəcək”.
