ABŞ-ın Helsinki Komissiyasının sədri konqresmen Kris Smitin Konqresə Azərbaycanda yüksək vəzifəli məmurlara sanksiyaların tətbiq olunması ilə bağlı təqdim etdiyi qanun layihəsi Milli Məclisin bu gün keçirilən iclasında sərt tənqid olunub. Iclasda həmçinin, ABŞ-da Azərbaycan diasporunun fəaliyyəti müzakirə edilib.
Milli Məclisin deputatı Sahib Alıyev bildirib ki, Azərbaycanla ABŞ arasında hərtərəfli əməkdaşlıq var: "Bu əməkdaşlıq təkcə iki ölkə arasında deyil, regionda və hətta regiondan kənarda sabitliyin və təhlükəsizliyin təmin olunmasında mühüm rol oynayır. Amma təəssüf ki, bəzi qüvvələrin təsiri altında olan ABŞ rəsmiləri bu əməkdaşlığa xələl gətirməyə çalışır. Bu cür hərəkətlər ilk növbədə ABŞ-ın özünün maraqlarına ziddir”.
S.Əliyev bildirib ki, Kris Smit ermənilərin təsiri altında olan bir adamdır.
Deputat Fəzail Ağamalı bildirib ki, həmin qanun layihəsinin mahiyyətindən belə aydın olur ki, Kris Smit erməni lobbisinin təsiri altında olan konqresmendir: "Belə bir qanun layihəsi Ermənistan haqqında verilməlidir. Çünki Ermənistanda insan haqları mütəmadi pozulur. Ermənistana bu gün rəhbərlik edən kriminal rejim nəinki Azərbaycan vətəndaşlarına qarşı soyqırın aktının birbaşa iştirakçısı olub, eyni zamanda, öz ölkəsinin vətəndaşlarının da qəniminə çevrilib”.
F.Ağamalı vurğulayıb ki, Ermənistanda baş verən hadisələrə Smit və onun kimiləri səslərini qaldırmırlar: "Azərbaycanın tutmuş olduğu yol demokratik yoldur. Məni təəssüfləndirən odur ki, ABŞ ATƏT-in Minsk qrupunun üzvü kimi Dağlıq Qarabağın separatçıları ilə görüşür. Dövlət Departamenti indiyədək bu cür hallara qarşı hüquqi qiymətini verməyib. Bunun da arxasında ermənilərin təsirində olan dövlət katibi Con Kerrinin dirijor çubuğu dayanır”.
Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov isə qeyd edib ki, Azərbaycanda hər ilin sonunda əfv fərmanı verilir: "Kris Smit belə bir qanun layihəsi ilə çıxış etməklə Azərbaycanı təxribata çəkmək istəyir. Ayın 16-da Kristofer Smit çıxışında dedi ki, bu gün Avropa Şurasının baş katibi Torbyorn Yaqland Azərbaycana araşdırıcı komissiya göndərmək barədə qərar qəbul edib və biz onunla əlbir işləməliyik. Bu onu göstərir ki, bu qanun layihəsi də əvvəlcədən planlaşdırılıb. Layihə kontekstdən çıxarılmış Azərbaycana qarşı birgə təxribat əməlidir. Bizə qarşı təpkilər çox olacaq. Bizdən kəskin, düzgün olmayan reaksiyalar verməyimizi istəyirlər. Ancaq onu da bilmək lazımdır ki, bu bir qrup adamın mövqeyidir”.
Deputat Zahid Oruc isə deyib ki, ABŞ-la Azərbaycan bütün hallarda işləməlidir: "ABŞ Konqresində Azərbaycanla dost olan konqresmenlər varmı? Əlbəttə var. Bir dəfə də onlar bizə uyğun akt hazırlayıblarmı? Ona görə biz ABŞ-la işi gücləndirməliyik”.
O, Azərbaycan diasporunun bu istiqamətdə fəallığa çağırıb.
Spiker Oqtay Əsədov isə Z. Oruca irad bildirib: "ABŞ-la iş aparılır. Amma bilirsən ki, orada erməni diasporunun tarixi nə vaxtdan başlayır, Azərbaycan diasporunun tarixi nə vaxtdan? 100 ildən çoxdur, orada yaşayan ermənilər artıq amerikanların ətinə-dırnağına işləyib. Amma biz orada cəmi 20 ildir, diaspor qururuq. 2007-ci ildə Konqresdə məsələ müzakirə olunarkən biz 210 səs əldə etdik. Cəmi 15 səs çatmadı. Bu göstərici deyilmi? Siz hər şeyin birdən-birə olmasını istəyirsiniz”.
Deputat Qüdrət Həsənqliyev isə qeyd edib ki, bu gün mətbuatda Ermənistanda referendumun saxtalaşdırıldığı barədə xəbər oxuyub: "ABŞ səfirliyi qeyd edib ki, sənədi saxtalaşdıranlar tədbirlərə çağırılmasın. Bizdə Əfv Komissiyasının üzvləri qeyd edirlər ki, əfv sərəncamı olacaq. Leyla və Arif Yunuslar azad edilib. Əfv sərəncamı imzalanandan deyəcəklər ki, onların addımından sonra əfv oldu. Məncə, buna diqqət etmək lazım deyil, əfv verilməlidir. Bundan sonra görək hansı bəhanəni tapacaqlar”.
Oqtay Əsədov bildirib ki, ABŞ-ın Helsinki Komissiyasının sədri konqresmen Kris Smit vaxtilə Demokratlar Partiyasının üzvü, sonra Respublikaçılar Partiyasının üzvü olub, indi də Ermənistan diasporasının üzvüdür.
O, bildirib ki, bu məsələni o qədər də şişirtmək lazım deyil: "Bəzi jurnalistlər bunu şok hadisə kimi təqdim edirlər. Bunun nəyi şokdur? Bu adi bir komissiyadır. Məsələni bu bu cür şişirtmək çox böyük səfdir”.
O.Əsədov deyib ki, Kris Smit adi bir konqresmendir. Spiker bu qanun layihəsinin Konqresdən keçməyəcəyini bildirib: "ABŞ Konqresində kifayət qədər Azərbaycanın dostları var. Bu qanun layihəsinin Konqresdən keçəcəyinə inanmıram”.
O.Əsədov bildirib ki, Kris Smit erməni diasporasının təsiri altında olan adamdır.
O.Əsədov sonra qeyd edib ki, Kris Smitin bu hərəkəti iki məqsəd daşıyır: "Dünya Azərbaycanlıları Günü ərəfəsində əfv fərmanının imzalanması gözlənilir. İstəyirlər desinlər ki, guya biz dedik, Azərbaycan hökuməti də o adamları buraxdı. İkincisi istəyirlər ki, onların adını çəkdiyi adamlar buraxılmasın və bundan da Azərbaycana qarşı təzyiq vasitəsi kimi istifadə etsinlər. Onlar bu yolla Azərbaycanı təxribata çəkmək istəyirlər”.
O.Əsədov bildirib ki, Ermənistan diasporunun ən radikal rəhbərlərindən biri Aram Hamparyan Twitter səhifəsində Smitlə ABŞ Konqresində çəkilmiş şəkil qoyub: "Qeyd edib ki, onun işini dəstəkləmək üçün ABŞ Konqresində Smitlə görüşlər keçirir. Bu göstərir ki, Kris Smit kimdir”.
O. Əsədov mətbuata da müraciət edərək ABŞ-ın Azərbaycandakı səfirinə bununla bağlı suallar ünvanlamağa çağırıb.
Hərbi xidmət zamanı həlak olmuş hərbçilər yeni qaydalarla dəfn ediləcək
Milli Məclisin bu gün keçirilən plenar iclasında bəzi qanunlara dəyişikliklərdə təsdiqlənib. Belə ki, "Hərbi vəzifə və hərbi xidmət haqqında” qanuna edilən dəyişikliklərə görə Azərbaycanda hərbi xidmət vəzifələrinin icrası ilə əlaqədar vəfat etmiş (həlak olmuş) hərbi qulluqçuların və toplanışa çağırılmış hərbi vəzifəlilərin dəfn mərasimi yeni qaydalarla keçiriləcək. Dəyişikliyə əsasən, hərbçilərin dəfn mərasimində hərbi ehtiramın göstərilməsi üçün təyin edilmiş bölmələr fəxri mühafizə dəstəsi adlanır.
Taqım və ondan bölmə heyətində olan fəxri mühafizə dəstəsi çexolsuz mətəm lentləri taxılmış Döyüş Bayrağı ilə təmin olunmalıdır. Fəxri mühafizə dəstəsi müvafiq icra hakimiyyəti orqanı tərəfindən müəyyən olunur.
Ehtiramın göstərilməsi zamanı hərbçilərin tabutu Azərbaycanın Dövlət bayrağı ilə örtüləcək. Dəfn mərasiminə dəvət olunmuş müxtəlif dövlət orqanları və QHT nümayəndələrindən ibarət fəxri qaravul düzülə bilər. Habelə, şəhid adını almış hərbi qulluqçuların xatirəsinə ehtiram əlaməti olaraq hərbi hissələrdə xüsusi guşə yaradılacaq və onlar haqqında məlumat veriləcək.
Dəniz sahilinə yolu kəsənlər ciddi cəzalanacaq
İnzibati Xətalar Məcəlləsinə edilən dəyişikliklərə görə isə Azərbaycanda dəniz sahilinə yolu kəsənlər ciddi cəzalanacaq. Dəyişikliyə əsasən, dövlətin iqtisadi və ya təhlükəsizlik mənafelərinin təmin edilməsi ilə əlaqədar olaraq, müvafiq icra hakimiyyəti orqanının qərarı olmadan torpaq sahəsində dəniz sahilinə gediş-gəlişin məhdudlaşdırılmasına görə fiziki şəxslər 4 min, vəzifəli şəxslər 8 min, hüquqi şəxslər isə 40 min manat miqdarında cərimə olunacaq.
Eyni zamanda xətaların il ərzində inzibati tənbeh alan şəxs tərəfindən təkrar törədilməsinə görə fiziki şəxslər 5 min, vəzifəli şəxslər 10 min, hüquqi şəxslər isə 50 min manat miqdarında cərimə olunacaq.
Qeyd edək ki, hazırkı İnzibati Xətalar Məcəlləsində yuxarıda qeyd olunan xətalara görə maksimum cərimə 250 manatdır.
Dəyişikliklər səsə qoyularaq qəbul olunub.
