Kədərli yubiley - "Qarabağa aparan yol" qəzetinin 10 yaşı oldu...

Tarix: 20.10.2015 / 02:44
Bölmə: Gündəm

Aydın Quliyev: "Kaş qəzet 10 yaşına çatmayaydı"

Qarabağa aparan yolu getmək doğrudan da çətindir. Daşlı-kəsəklidir, tikanlıdır bu yollar. Bu yol səmada iz salan karvan yollarına bənzəyir, xəyalən o yolların zəvvarı oluruq. Amma xəyaldan ayrılanda tamam başqa hisslərin qucağında oluruq. Bu gün hamımız Qarabağa getmək istəyirik. Deyirik ki, hansı yolla olur-olsun, imkan olsa, ora getmək fürsətini əldən buraxmaq olmaz. Mən hər gün Qarabağa aparan yolla gedirəm, ancaq hələ mənzil başına çatmamışam, yerimdə addımlayıram.

Təkcə mən belə deyiləm, hamımız yerimizdə addımlayırıq. Qarabağdan başlanan yolun əlindən tutub Bakıya gələnlər sonra o yolu geri qayıda bilmədilər. Qayıda bilmədik. Deyirik ki, mütləq qayıdacağıq. Şübhəsiz, insan gəldiyi yolu günlərin birində geri qayıtmağa məhkumdur. Bu həm də bir borcdur. Onsuz da heç birimiz vətənin borcundan çıxa bilməmişik. Bu mümkün də deyil. Təsəllini onunla tapırıq ki, Vətənə, dövlətə, dövlətçiliyə, azacıq da olsa, xidmət edə bilirik.

On yaşını qeyd edən "Qarabağa aparan yol" qəzeti Vətən-Qarabağ borcundan çıxmağa çalışır illərdir. "Qarabağa aparan yol" hər bir azərbaycanlını, mənən qarabağlı olan insanları öz səhifələrindən çəkdiyi işıq yolu ilə yağı tapdağında qalan yurdlara çəkib aparır. Yavaş-yavaş yaxınlaşırıq ora.

On ildir görkəmli qələm adamı, söz sərrafı, müqtədir jurnalist, redaktor Əli Mahmudun baş redaktorluğu ilə nəşr edilən "Qarabağa aparan yol" qəzeti bizi addım-addım Qarabağa yaxınlaşdırmağa çalışır. İki ildir bu qəzetin kollektivi ilə yaxından tanışam, bu nəşrlə əməkdaşlıq edirəm. Tanınan jurnalist, publisist Fariz Çobanoğlunun dəvətilə qəzetlə əməkdaşlığa başladım.

Keçən həftənin şənbə günü keçirilən "Qarabağa aparan yol" qəzetinin 10 illik yubiley tədbiri unudulmaz oldu. Dəniz kənarında yerləşən məkanlardan birində təşkil edilən yubiley gecəsinə Azərbaycan mətbuatının, ədəbiyyatının, elminin, mədəniyyətinin, ictimai-siyasi həyatının görkəmli, tanınan, sayılıb-seçilən nümayəndələri təşrif gətirmişdi.

Yubileyin düzənləndiyi məkana hamıdan tez özünü çatdıran qəzetin baş yazarı Əli Mahmud olduqca həyəcanlı görünürdü, sanki Şuşada qarşılayır qonaqlarını. Həqiqətən də bu mənzərə çox təsirli idi. Dəniz də öz işində idi, həyəcanın içinə başqa bir rəng qatırdı. Mənə elə gəldi ki, baş redaktor çox narahatdır, bəlkə də ona elə gəlirdi ki, dəvətlilər vaxtında gəlib çıxa bilməyəcək. Ancaq deyim ki, Əli Mahmudun narahatlığına heç bir əsas yox idi. Qonaqlar bir-bir gəlməyə başladı. Həqiqətən də çox səmimi atmosferdə keçdi yubiley gecəsi. Onu da mübaliğəsiz olaraq deyim ki, bura gələnlərin hamısının içində, ürəyində bir qarabağlılıq təəssübü, qarabağlılıq ruhu vardı. Ayrı-ayrı bölgələrdə doğulan insanların bir arada qarabağlı olaraq toplaşması həqiqətən də qürurvericidir. Məclis başlamamışdan əvvəl qəzetin baş redaktor müavini Fariz Çobanoğlu mənə dedi ki, bilirsən, bura dəvət edilən və gələn adamların hamısı sözə və Qarabağ sevgisinə, Qarabağ mübarizəsinə sədaqətli adamlardır. Həmkarımın sözündə yanlışlıq yox idi. Düz deyirdi, məclisdə olanların hamısı mənən, ruhən, qəlbən Qarabağa bağlı adamlar idi. Tədbirdə "Qarabağa aparan yol" qəzetinin "10 il erməni işğalçılarına qarşı və Qarabağa qayıdış uğrunda mübarizə meydanında" loqosu ilə nəşr edilən xüsusi buraxılışı da qonaqların xoşuna gəldi. Qəzetin adı və məqsədi, tutduğu yol bir-birilə uyğunluq təşkil edirsə, çuğlaşırsa, bu artıq nəşrin uğuru deməkdir.

Yubiley tədbirini qəzetin təsisçisi və baş redaktoru Əli Mahmud açaraq qonaqları salamladı və bildirdi ki, mərasimə toplaşanların hər biri qarabağlıdır: "Mən sizi bura ona görə dəvət etməmişəm ki, qəzeti, fəaliyyətimizi tərifləyəsiniz. Çağırmışam ki, bu illər ərzində qəzetimizə dəstək olduğunuz, bizimlə əməkdaşlıq etdiyiniz, xoş sözlər dediyiniz, hətta nöqsanlarımızı tənqid etdiyiniz üçün sizə minnətdarlığımı bildirim. "Qarabağa aparan yol" qəzeti üçün heç vaxt bölgə söhbəti olmayıb. Hətta qəzetimizin "Ən yaxşı qarabağlı" rubrikası olub və burada ruhu Qarabağa bağlı olan müxtəlif məkanlarda doğulan insanlara yer vermişik. Bura gələnlərin hamısını ən yaxşı qarabağlı sayıram".

Baş redaktor sonra sözü Şuşa Rayon İcra Hakimiyyətinin başçısı, Dağlıq Qarabağın Azərbaycanlı İcmasının rəhbəri Bayram Səfərova verdi. B.Səfərov çıxışında vurğuladı ki, 10 illik yubileyi qeyd edilən qəzet, sözün həqiqi mənasında, Qarabağ mövzusunu hər zaman diqqətdə saxlayıb və oxucuları o torpaqlara bağlayıb: "Bu qəzeti mütəmadi olaraq izləyirəm. Mən Əli Mahmudu hələ o orta məkbətdə oxuduğu illərdən tanıyıram. Bizim dostluğumuzun tarixi az qala yarım əsrdir. Bu dostluğun yaşı çoxdur, uzun illər dostluq etmişik, dostluğa möhkəm olmuşuq. Əli hər zaman mərd, prinsipial olub. Onun Dağlıq Qarabağ hadisələri başlayanda gördüyü işlər, yazdığı yazılar, rus canişini Arkadi Volskinin üzünə dediyi sözləri indi də unuda bilmirəm. O qeyrətli oğul kimi həmişə öz sözünü deyirdi. "Qarabağa aparan yol" indi bizim Şuşamız, Laçınımız, Kəlbəcərimiz, Ağdamımız, Xocalımız, Cəbrayılımızdır. İnanıram ki, bu qəzeti təkcə Şuşa, Laçın camaatı deyil, işğal olunmuş rayonlarımızın hər biri özünə doğma bilib, sevə-sevə oxuyur. Çünki insan bütün həyatı, yaşamı boyu özünə bir könül həmdəmi, dərd ortağı axtara-axtara dünyanı gəzib dolaşır. "Qarabağa aparan yol", bir qədər obrazlı desək, dərdimizin ortağı, şərikdir. Çünki hər bir qaçqın və məcburi köçkünün, yurdundan zorən qovulmuş hər bir soydaşımızın ağrı və istəyini, bu qəriblərin qərib ağrılarını daşıyır, ifadə edir, öz səhifələrində Vətəndən cüda düşmüş dünyamızın mənəvi xəritəsini, portretini yaradır...".

Mətbuat Şurasının sədri Əflatun Amaşov da tədbirdə çıxış etdi: "Tarixi zərurətdən yaranan mətbu nəşr ötən müddətdə baş verənlərin, yaşantıların güzgüsü və salnaməsidir. "Qarabağa aparan yol"da jurnalistikaya qəlbən bağlı, Qarabağ həsrətli, ümidli, peşəkar insanlar cəmləşib.

Qəzet Qarabağa qayıdışın reallığını insanlara təlqin edir. Yaddaşları ayıq saxlayır, erməni işğalçılarına qarşı nifrət aşılamaqla kifayətlənmir, hər bir qarabağlını torpaqların azadlığı uğrunda mücadiləyə hazır olmağa çağırır".

"Azərbaycan" nəşriyyatının direktor müavini Allahverdi Məmmədov da çıxışında bildirdi ki, Əli Mahmudun yazılarını, fəaliyyətini uzun illərdir izləyir. Nəşriyyatın direktor müavini qeyd etdi ki, "Qarabağa aparan yol" qəzetini başqa qəzetlərdən fərqləndirən əsas bir məsələ var: "Bu qəzetdə kəşf etdiyim bir məqamı başqa qəzetlərdə görməmişəm. Qəzetdə redaksiya qeydi var: "Dövlətçiliyimizə, milli birliyimizə, ordumuza, iqtisadiyyatımıza, dilimizə, dinimizə, ərazi bütövlüyümüzə və mənəvi-əxlaqi dəyərlərimizə xələl gətirən yazıları qəbul etmir". Bu olduqca vacib bir məsələdir və çox dəyərlidir. Yubiley münasibətilə qəzetin baş redaktorunu, kollektivini ürəkdən təbrik edirəm. Arzu edirəm ki, o torpaqlar geri qayıtsın və tezliklə qəzetin adı dəyişsin, zəfərlə bağlı bir ada sahib olsun. İnanıram ki, bu gün tez gələcək".

"Bakı-Xəbər" qəzetinin baş redaktoru, Azərbaycan Mətbuat Şurasının İdarə Heyətinin üzvü Aydın Quliyev də "Qarabağa aparan yol" qəzetinin 10 illik yubileyi münasibətilə qəzetin baş redaktorunu və kollektivini təbrik etdi: "Əgər siz "Bakı-Xəbər" qəzetinin yubileyinə gəlsəydiniz, bizim qəzetə 20, 30, 100 il ömür arzulayardınız. Amma təəssüflənirəm ki, mən sizin qəzetə bu yaşı arzu edə bilmirəm. Kaş bu qəzet 10 yaşa gəlib çatmayaydı və cəmi bir il yaşayaydı. Lakin Qarabağ problemi bizdən asılı olmayan səbəblərə görə, beynəlxalq təşkilatların ikili standartlardan yanaşdıqları üçün hələ də həll olunmamış qalır. Qəzetin rəhbəri Qarabağ məsələsi həll edilmədiyi üçün buna etiraz olaraq 2005-ci ildə "Qarabağa aparan yol" qəzetini nəşr etdirdi. Bəlkə də ümid edirdilər ki, bu qəzetin çox az sayı çıxacaq. Ancaq belə olmadı. Arzu edərdim ki, bu qəzet özünün 11 yaşını qeyd edə bilməsin və tezliklə o yurdlara qayıdaq və qəzetin adı dəyişsin və başqa ad altında nəşrini davam etdirsin".

Filologiya elmləri doktoru, professor Nizami Tağısoy da çıxış edərək bildirdi ki, Qarabağ torpağının əlimizdə olmaması, bu torpaqlardan ayrı düşməyimiz onu bir ziyalı kimi hər zaman narahat edir: "Qəzet düşmənlərimizin-ermənilərin daxili aləmini yerli-yataqlı açmaq baxımından xeyli əsaslı iş görüb...".

O, hesab edir ki, "Qarabağa aparan yol" qəzetinin yaradıcı kollektivi öz missiyasını layiqincə daşıyır, fəaliyyəti ilə bizi o yola yaxınlaşdırır.

Azərbaycan Mətbuat Şurasının katibi Rəhim Hüseynov da çıxışında qəzetin yaradıcı heyətini təbrik edərək bildirdi ki, yaxın günlərdə "Qarabağa aparan yol" qəzeti Mətbuat Şurasına üzv qəbul edilə bilər. R.Hüseynov da qəzetin bu on ildə gördüyü işləri, fəaliyyətini yüksək qiymətləndirdi və qeyd etdi ki, o öz missiyasını layiqincə yerinə yetirir.

Filologiya elmləri doktoru, professor Maarifə Hacıyeva çıxış edərək qeyd etdi ki, "Qarabağa aparan yol" qəzeti 10 ildir haqqımızı, ədaləti müdafiə edir, dünyaya Azərbaycanın haqq savaşında olduğunu səhifələrindəki ictimai-siyasi və ədəbi məzmun kəsb edən yazıları ilə çatdırır: "Bu qəzet hər şeydən öncə ziyalı qəzetidir. Ziyalının, söz adamlarının, qələmə ürəkdən könül verənlərin ümid yeridir...".

Filologiya elmləri doktoru, professor Minəxanım Təkləlinin tədbirdə çıxışı emosional çalarları ilə yadda qaldı: "...Redaksiya özü mənə balaca bir Qarabağ guşəsini xatırladır. Burada el-oba həsrətliləri görüşür, çox keçmədən söhbət gəlib şirin anların üstünə çıxır. Buradakı görüşlər mənə bu redaksiyanı doğma yerim-yurdum, obam qədər mərhəm edir. Var olsun Vətənin hər bucağının kişi qeyrətini çəkənlər...".

Qəzetin redaktor müavini Fariz Çobanoğlu isə bildirdi ki, zaman vardı sufi şeyxləri, təriqət başçıları, görkəmli fikir adamları müridlər yetişdirir, o müridlər əsas missiyanı daşıya-daşıya, fikirləri yaya-yaya yollarda yaşa dolur, kamilləşirdi: "Bizim də işimiz bir növ belədir. Sufi şeyxlərinin müridləri kimi gəldiyimiz yolda Qarabağ həqiqətlərini ifadə etməyə çalışmışıq və o yurdu təbliğ etmişik".

Görkəmli qələm adamlarından olan, tədqiqatçı Şəmistan Nəzirli də kollektivi təbrik edərək bildirdi ki, bu qəzetdə Azərbaycanın hərb tarixinə geniş yer ayrılır, o cümlədən onun hərb tariximizdə müstəsna xidmətləri olan məşhur qarabağlı generallar və digər hərbçilər haqqında yazdığı məqalələr "Qarabağa aparan yol"da çap olunur.

Daha sonra AYB üzvü, şair, əməkdar müəllim Əyyub Şırlanlı, qəzetin yaxın dostu, ziyalı Altay Hacıyev, professor Fərrux Rüstəmov, "Təzadlar" qəzetinin baş redaktoru Asif Mərzli çıxış edərək qəzet kollektivini təbrik etdilər.

"Ədalət" qəzetinin əməkdaşı, tanınmış şair-publisist Əbülfət Mədətoğlu isə bildirdi ki, qəzetin yubileyini həm özünün, həm də qəzetin rəhbəri, millət vəkili Aqil Abbasın adından təbrik edir. O, A.Abbasın təbrikini oxudu: "Uğurlarına sevinirəm və birlikdə Qarabağda da sevinəcəyimizə inanıram. İnanıram ki, Qarabağa gedən yol bizi mütləq Şuşada qarşılaşdıracaq".

Biz də "Qarabağa aparan yol" qəzetinin 10 illik yubileyi münasibətilə baş redaktor Əli Mahmudu və kollektivi təbrik edir, 11 yaşlarını Şuşada qeyd etmələrini diləyirik.

İradə SARIYEVA

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 02.11.2026 / 23:02

Bunu səfir Birol Akgünə açıq məktubum kimi də oxuya bilərsiniz - Aydın QULİYEV yazır...

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Turizm regionlarımızın inkişaf mənbələrindən birinə çevrilir...