ABŞ Prezidenti Donald Tramp zənginləşdirilmiş uranı qorumaq üçün İrana xüsusi təyinatlı qüvvələrin göndərilməsi ilə bağlı yayılan xəbərləri təkzib edib.
ABŞ Prezidenti deyib ki, Amerika quru qoşunlarının İrana göndərilməsi barədə qərardan hələ çox uzaqdır. "Biz hələ bu barədə qərar verməmişik. Biz hələ bundan çox uzaqdayıq", - deyə Tramp 9 mart bazar ertəsi günü "New York Post" qəzetinə verdiyi müsahibədə izah edib. O, İsrail və ABŞ-ın İranda yüksək zənginləşdirilmiş uranın qorunmasını təmin etmək üçün xüsusi təyinatlı qüvvələrin mümkün yerləşdirilməsi ilə bağlı müzakirə apardıqları xəbəri şərh edərkən bildirib.
Qeyd edək ki, bir gün əvvəl Axios dörd mənbəyə istinadən ABŞ və İsrail rəsmilərinin ABŞ xüsusi təyinatlı qüvvələrinin "müharibənin sonrakı mərhələsində" İrana "yüksək zənginləşdirilmiş uran və digər nüvə yanacağı ehtiyatlarını ələ keçirmək" üçün göndərilməsi ehtimalını müzakirə etdiklərini bildirmişdi. Məqalədə deyilir: "Bu, çox güman ki, yalnız hər iki ölkə İran ordusunun artıq iştirakçı qüvvələrə ciddi təhlükə yarada bilməyəcəyinə əmin olduqdan sonra baş verəcək".
Bundan əlavə, Donald Tramp İrana qarşı müharibənin başlanğıcından bəri ilk mətbuat konfransını elan edib. Ağ Ev prezidenti özünün "Truth Social" platformasında elan edib ki, tədbir 9 mart axşamı Mayami yaxınlığındakı Tramp Qolf Klubunda keçiriləcək.
Onu da bildirək ki, martın əvvəlində İsrail İranın dəstəklədiyi Hizbullah terror qruplaşmasının fəaliyyət göstərdiyi Livandakı hədəflərə zərbələr endirib. Hizbullah Tehranın regiondakı əsas müttəfiqlərindən biri hesab olunur və İsrail sərhədləri yaxınlığında raket arsenalına malikdir.
SAMİRƏ
