Hakimiyyət dəyişikliyindən sonra İrana ölkə daxilində populyar olan mötədil bir şəxs rəhbərlik edə bilər. Bunu ABŞ prezidenti Donald Tramp Almaniya kansleri Fridrix Merzlə görüşdə deyib. Rza Pəhləvi ilə bağlı suala cavab olaraq Tramp qeyd edib ki, ABŞ bu varianta çox fikir verməyib və onun fikrincə, hazırda populyar olan daxildən kimsə daha uyğun ola bilər.
Məhz belə bir vaxtda CNN telekanalı məlumatlı mənbələrə istinadən xəbər verir ki, Mərkəzi Kəşfiyyat İdarəsi (MKİ) İrandakı vəziyyəti qeyri-sabitləşdirmək məqsədilə kürd silahlı dəstələrinə silah təchizatı üzərində işləyir. Telekanalın məlumatına görə, MKİ İranda xalq üsyanını qızışdırmaq məqsədi ilə kürd silahlı dəstələrini silahlandırır. Televiziya kanalının məlumatına görə, Tramp administrasiyası mümkün hərbi dəstək məsələsində İran müxalifətinin nümayəndələri və İraqdakı kürd liderləri ilə fəal şəkildə məsləhətləşmələr aparır. Mənbələrdən birinin məlumatına görə, Tramp İran Kürdüstan Demokrat Partiyasının sədri Mustafa Hicri ilə telefonla danışıb. “Axios” nəşri də əvvəllər ABŞ prezidentinin İranın bombalanmasından bir gün sonra İraqdakı iki əsas kürd siyasi qüvvəsinin liderləri - Məsud Bərzani və Bafel Tələbani ilə də danışdığını bildirmişdi. İranın yüksək vəzifəli kürd rəsmisi kanala bildirib ki, müxalifət qüvvələri yaxın günlərdə İranın qərbindəki quru əməliyyatlarına qoşula bilər. "İndi yaxşı şansımız olduğunu düşünürük", - deyə mənbə bildirib və əlavə edib ki, ABŞ və İsrailin dəstəyinə ümid edir. İsrailli ərəb məsələləri üzrə analitik Ehud Yaari bildirib ki, İran ətrafındakı hadisələr Şimali İraqdan olan kürd silahlı dəstələrinin hərəkətləri üçün zəmin hazırlanması ilə əlaqələndirilə bilər. O, hesab edir ki, uzunmüddətli perspektivdə bunlar İranda daxili dəyişikliklərin amili ola bilər. Ekspert qeyd edib ki, Tehran son günlərdə siyasətində kəskin dönüş yaşayıb. O bildirib ki, İran rəsmiləri əvvəllər ərəb dövlətlərinə hücum etməmək, proksi qrupları cəlb etməmək və Hörmüz boğazını bağlamamaq niyyətlərini bildirmişdilər. Lakin bu kurs sonradan tərsinə çevrilib. Analitik həmçinin iddia edir ki, İran əhəmiyyətli raket imkanlarına malikdir və onlardan az istifadə edir. O hesab edir ki, Fars körfəzindəki hücumlar da daxil olmaqla, hazırkı zərbələr təbiətcə məhduddur və infrastrukturun genişmiqyaslı məhv edilməsindən daha çox qeyri-sabitlik atmosferi yaratmağa yönəlib. Yaari xüsusilə İran-İraq sərhədi boyunca İslam İnqilabı Keşikçiləri Korpusunun hədəflərinə endirilən zərbələrə diqqət çəkib. Onun sözlərinə görə, İsrail və Amerika hava qüvvələrinin hərəkətləri Tehranın sərhəd zonasındakı mövqeyini zəiflətməyə və Şimali İraqda fəaliyyət göstərən kürd silahlı qruplarının irəliləməsi üçün şərait yaratmağa yönəlmiş ola bilər. Daha əvvəl kürd liderlərindən biri “Maariv” nəşrinə verdiyi müsahibədə ayətullah rejiminin daxildən çökə biləcəyini və kürdlərin həlledici rol oynaya biləcəyini bildirmişdi. O, kürd qüvvələrinin Qəndildən şərqi Kürdüstana qədər dağlıq bölgələrə nəzarət etdiyini və özlərini hazırkı İran rəhbərliyinin əsas əleyhdarları arasında hesab etdiklərini bildirib.
Samirə SƏFƏROVA
