İsrail kəşfiyyat xidməti İranın Ali Lideri Əli Xameneinin sui-qəsdi əməliyyatını bir neçə il ərzində hazırlayıb.
Bu barədə Britaniyanın Financial Times qəzeti İsraildəki mənbələrə istinadən xəbər verir.
Nəşrin məlumatına görə, İsrail kəşfiyyat zabitləri jurnalistlərə açıqlama verərkən həlledici zərbədən çox əvvəl "Tehranı Qüds qədər tanıdıqlarını" bildiriblər.
Onların sözlərinə örə, əməliyyat çoxillik kəşfiyyat kampaniyasına əsaslanırdı: İsrail kəşfiyyat orqanları Tehranda "demək olar ki, bütün" yol hərəkəti kameralarını sındırmağı bacarıblar.
Bu kameralardan gələn görüntülər şifrələnərək Təl-Əvivdə və İsrailin cənubunda yerləşən serverlərə ötürülüb. Nəşr qeyd edir ki, yüksək dərəcədə təhlükəsiz hökumət binasından görüntüləri ötürən kamera xüsusilə "faydalı" olduğunu sübut edib. Bu kamera binanın işçilərinin və 86 yaşlı Xameneinin cangüdənlərinin gündəlik həyatı, hətta onların maşınlarını harada, necə və nə vaxt park etdikləri barədə məlumat verib.
Bundan əlavə, İsrail kəşfiyyat orqanları Xameneinin yaxın çevrəsinin üzvlərinin və yüksək vəzifəli İran rəsmilərinin "profillərini" yaratmaq üçün müasir məlumatların təhlili üsullarından istifadə edib.
İsrail, həmçinin, Xameneinin iqamətgahının yaxınlığındakı Pasteur küçəsi ərazisindəki mobil telefon qüllələrini sıradan çıxarmağa müvəffəq olub. Nəticədə, Ayətullahın təhlükəsizlik xidmətinin mobil telefonlarına zənglər alınmayıb və cangüdənləri lazımi xəbərdarlıqları almayıblar. Hesabatda deyilir ki, ABŞ kəşfiyyat orqanları da İsrailə əlavə kəşfiyyat məlumatları verib.
Nəşr vurğulayır ki, Xameneinin sui-qəsdi sadəcə texnoloji üstünlüyün nümayişi deyil, siyasi bir qərar idi.
İsrail əməliyyatı bir neçə aydır planlaşdırsa da, Təl-Əvivdə son qərar son anda verilib. İsrail əmin idi ki, tammiqyaslı müharibənin başlamasından sonra İran rəsmilərini "ovlamaq" daha çətin olacaq, çünki bu halda onlar İsrail bombalarına davamlı yeraltı bunkerlər də daxil olmaqla sığınacaqlara yerləşəcəklər.
FT qeyd edir ki, Hizbullah lideri Həsən Nəsrullahdan fərqli olaraq, Xamenei bunkerlərdə daimi yaşamayıb, lakin müharibə halında müvafiq tədbirlər görə bilərdi. Buna görə də, İsrail kəşfiyyatı Xamenei və onun əsas əməkdaşlarının 28 fevral səhəri Tehrandakı iqamətgahında olduğunu təsdiqlədikdən sonra İsrail və ABŞ koordinasiyalı hücumlar həyata keçirib: kiberhücumlar İranın rabitə və hava hücumundan müdafiə sistemlərini pozub, raketlər Rəhbərin iqamətgahına zərbələr endirib.
Bu arada, The New York Times qəzeti xəbər verir ki, İran rəsmiləri ABŞ-ın İrana zərbə endirməyi planlaşdırdığını bilirdilər, lakin hücumun gündüz baş verəcəyini gözləmirdilər. Ayətullah isə özü bunkerə düşmək əvəzinə iqamətgahında qalmağa qərar verib. O, köməkçilərinə İran xalqı tərəfindən gizlənən lider kimi xatırlanmaqdansa, şəhid olmağı üstün tutduğunu bildirib.
Britaniya qəzeti onu da bildirib ki, İsrail kəşfiyyat orqanları əməliyyatın bütün detallarını açıqlamaq istəmirlər, çünki bəzi mənbələrdən və metodlardan istifadə edərək digər "hədəfləri" də izləməyi düşünürlər.
SAMİRƏ
