Azərbaycan Avtomobil Yolları Dövlət Agentliyinin (AAYDA) rəhbəri Saleh Məmmədovun işdən çıxarılmasının ardından hələ də onun fəaliyyəti ilə bağlı genişmiqyaslı araşdırmalar aparıldığı, hətta cinayət işinin açılması məsələsinin gündəmdə olması xəbərləri yayılır. Bu barədə rəsmi açıqlama olmasa da, mətbuata sızan informasiyalara görə, bu araşdırmalar indi başlamayıb, sadəcə yeni mərhələyə keçib ki, bu da prosesin ciddiliyindən xəbər verir.
Yoxlamalar zamanı iri həcmli yeyinti faktlarının aşkarlandığı, bölgələrdə həyata keçirilmiş yol layihələri ilə bağlı sənədlərlə real vəziyyət arasında ciddi uyğunsuzluqlar olduğu bildirilir. Hətta deyilənə görə, Agentlik daxilində yüksək vəzifəli şəxslərdən bir neçəsi artıq istintaqa cəlb olunub ki, bu sıraya keçmiş sədrin sabiq müavinləri də daxildir. Onlar arasında üzləşmələrin həyata keçirildiyi, bu zaman isə ziddiyyətli ifadələrin ortaya çıxdığı da gələn xəbərlər arasındadır.
Xəbərdə diqqəti çəkən daha bir məqam media ilə əməkdaşlıq və informasiya dəstəyi üçün Agentliyin büdcəsindən ciddi vəsaitlərin ayrılması barədə deyilənlərdir. Rəsmi sənədlərdə bu vəsaitlərin ictimaiyyətlə əlaqələrin gücləndirilməsinə yönəldildiyi göstərilsə də, həmin vəsaitlərin təyinatı üzrə xərclənmədiyini iddia edilir.
Modern.az məsələ ilə bağlı Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli ilə əlaqə saxlayıb. A.Nəcəfli verdiyi açıqlamada çəkilən yollara xərclənən dövlət vəsaitləri ilə bağlı suallara qismən aydınlıq gətirməyə çalışsa da, mediaya pul xərclənməsi məsələsini nə təsdiq, nə də təkzib edib.
Anar Nəcəflinin reaksiyası ehtimallara əsas verir ki, yayılan məlumatlardakı "media mənimsəmələri" istiqamətinə də ciddi yanaşılmalıdır. Çünki Anar Nəcəfli məsələdən məlumatlı biri kimi görsənir...
Leyla QARAXANLI
