Üzeyir Cəfərov: "Azərbaycanda bəzi məmurların vəzifəyə qazanc mənbəyi kimi yanaşması təəssüf doğurur"
Mediada yer alan məlumata görə, Azərbaycan Silahlı Qüvvələrinin Baş Qərargah rəisinin sabiq müavini və Baş Əməliyyat İdarəsinin rəisi olmuş general-leytenant Ayaz Həsənovla bağlı mülki iddia üzrə məhkəmə prosesi başlayıb. O, təqaüdə çıxdıqdan sonra Novxanıda yerləşən bağ evini satdığı alıcıya verdiyi təmir vədlərini yerinə yetirməməkdə ittiham olunur.
Alıcının sözlərinə görə, evdə bir neçə çatışmazlıq olub və Həsənov bu problemləri aradan qaldıracağına söz versə də, sonradan öhdəliyini yerinə yetirməyib. Buna görə də alqı-satqı müqaviləsinin ləğvi tələbi ilə məhkəməyə müraciət edilib. Məhkəmə prosesində müxtəlif vəsatətlərə baxılıb və növbəti iclaslar təyin olunub. Həsənov isə evin satışını maddi ehtiyacla izah edib və öz mövqeyini müdafiə etməyə çalışır.
Qeyd edək ki, Ayaz Həsənov 2017-2021-ci illərdə Baş Qərargah rəisinin müavini, Baş Əməliyyat İdarəsinin rəisi vəzifələrində çalışıb və 2021-ci ilin iyulunda vəzifəsindən azad edilib. O, sabiq Baş Qərargah rəisi Nəcməddin Sadıkovun yaxın adamı kimi tanınır.
Generalın 2021-ci ilin iyulunadək ordunun rəhbər heyətində təmsil olunması ictimaiyyətdə müxtəlif suallar doğurur. Məhkəmə çəkişməsində adı hallanan bir şəxsin Vətən müharibəsi dövründə generalitet sıralarında olması bəzilərində narahatlıq yaradır. Hətta belə fikirlər səsləndirilir ki, əgər müəyyən neqativ hallar olmasaydı, qələbə daha az itki ilə əldə oluna bilərdi.
Novxanıda lüks bağ evinin hansı vəsaitlə əldə olunması məsələsi də müzakirə mövzusudur. Baş Qərargah kommersiya qurumu deyil və yüksək vəzifəli şəxslərin böyük həcmli əmlakı ilə bağlı suallar yaranır.
Keçmiş hərbi hissə komandiri, hərbi ekspert Üzeyir Cəfərov “Bakı-Xəbər” qəzetinə açıqlamasında bildirib ki, o da prosesi maraqla izləyir. Onun sözlərinə görə, generalın “pula ehtiyacım olduğu üçün bağ evini satıram” deməsi diqqət çəkir. Cəfərov qeyd edib ki, bağ evinin hansı vəsait hesabına alındığını bilmir, lakin Azərbaycanda bəzi məmurların vəzifəyə qazanc mənbəyi kimi yanaşması təəssüf doğurur.
O əlavə edib ki, sosial şəbəkələrdə Həsənovun sabiq Baş Qərargah rəisi Nəcməddin Sadıkovun müavini olması səbəbilə ona qarşı qərəzli münasibət göstərildiyi barədə iddialar səsləndirilir.
Ekspertin fikrincə, Novxanıda torpaq və əmlak qiymətlərinin yüksək olduğu nəzərə alınarsa, sırf hərbi maaşla belə lüks əmlak əldə etmək çətin görünür. Bu isə vəzifə səlahiyyətlərindən sui-istifadə və ya korrupsiya ehtimalı ilə bağlı şübhələr yaradır.
Cəfərov ümumilikdə korrupsiya ilə mübarizə sahəsində problemlərin mövcudluğunu vurğulayaraq bildirib ki, bəzi hallarda yüksək vəzifəli şəxslərin iri həcmli əmlaka sahib olması cəmiyyətdə narazılıq doğurur. Onun sözlərinə görə, gəlir bəyannaməsi (deklarasiya) haqqında qanunun illərdir tətbiq edilməməsi də bu sahədə şəffaflığın təmin olunmasına mane olur.
Akif NƏSİRLİ
