ABŞ-ın İrana qarşı əməliyyatı tammiqyaslı regional müharibəyə səbəb olacaq. Belə bir xəbərdarlıqla ali rəhbər Əli Xameneyi çıxış edib. O bildirib ki, hərbi əməliyyatlar başlasa, Tehran cavab verməyə hazırdır. Yaxınlaşan hərbi kampaniya fonunda isə İsrail potensial hücumların dəqiqliyini artırmaq üçün ABŞ-la kəşfiyyat məlumatlarını paylaşmağı gücləndirib. Vaşinqtonun regional müttəfiqləri ABŞ-ın əməliyyata başlamaq vədini yerinə yetirməməsi halında İranın ali rəhbərliyinin mövqeyini yalnız gücləndirəcəyindən qorxurlar.
Ayətullah Xameneyi bu fonda ABŞ Hərbi Dəniz Qüvvələrinin bölgədəki hazırlıqlarına münasibət bildirərkən qeyd edib: "ABŞ bilməlidir ki, əgər müharibə başlatsalar, bu dəfə regional miqyasda olacaq. Heç nəyi təşəbbüs edən biz deyilik, heç bir ölkəyə hücum etmək istəmirik, amma İran xalqı onlara hücum edən və təqib edən hər kəsə güclü zərbə vuracaq". O, İrandakı etirazların çevriliş cəhdi olduğunu düşünür: "Onların məqsədi ölkədəki mühüm hökumət mərkəzlərini məhv etmək idi və buna görə də polisə, dövlət qurumlarına, İslam İnqilabı Keşikçiləri Korpusunun mərkəzlərinə, banklara və məscidlərə hücum etdilər, hətta Quranı da yandırdılar". ABŞ prezidenti Donald Tramp potensial müharibə ilə bağlı qeyri-müəyyənliyi qorumağa üstünlük verir: "Bunu sizə deyə bilmərəm, amma bildiyiniz kimi, bu istiqamətdə çox böyük və güclü gəmilərimiz var. Nüvə silahı olmadan qənaətbəxş bir razılığa gəlmək mümkündür. Buna görə də onlar bunu etməlidirlər". Lakin, anonimlik şərti ilə ".Axios".a danışan Amerika rəsmiləri İran və ABŞ arasında diplomatik həll perspektivlərinə şübhə ilə yanaşdıqlarını bildiriblər. Onlar iddia edirlər ki, İran tərəfi Tramp administrasiyası tərəfindən təklif olunan hərtərəfli sazişin şərtlərini qəbul etmək üçün real istək göstərməyib. Fars körfəzi ölkələrindən olan diplomatlar da pessimistlik nümayiş etdirirlər.
İsrail hücuma hazırlaşmaq üçün ABŞ-la kəşfiyyat məlumatlarını paylaşmağı gücləndirib. Yüksək vəzifəli İsrail hərbi mənbəyi "Əl-Monitor"a bildirib: "İrana uğurlu hücum şansını maksimum dərəcədə artırmaq üçün demək olar ki, hər şeyi amerikalılarla bölüşürük". İsrail son illərdə İranın nüvə alimlərinin və yüksək rütbəli komandirlərinin əksəriyyətini məhv edib və illər ərzində toplanmış təcrübə indi ABŞ-a müxtəlif planları həyata keçirməyə kömək edir". Mənbələr bildirir ki, çox şey əməliyyatdan asılıdır. "Əl-Monitor"un mənbələri bildirir: "Sual budur ki, söhbət rəsmi hücumdan, yoxsa İranın simasını dəyişdirəcək tarixi, güclü bir addımdan gedir".
Ağ Ev müxtəlif ssenarilər təklif edir. İsrail kəşfiyyat dairələrindən bir mənbə "Əl-Monitor"a bildirib ki, Tramp bütün variantları nəzərdən keçirir. İsrailli mənbə "Əl-Monitor"a etiraf edib ki, İran rejimi hazırda kifayət qədər zəif deyil: "Yüksək vəzifəli məmurlar öldürülsə belə, təkcə xarici hücum rejimi devirmək üçün kifayət deyil". O, İran siyasi sisteminin dağıdılmasının "xarici və daxili qüvvələrin" birgə işləməsini tələb etdiyini vurğulayıb.
Regional oyunçular müharibənin təxirə salınmasının baha başa gələ biləcəyinə inanırlar.
Bu arada, İran əhalisini tammiqyaslı müharibəyə hazırlayır. Tehranın Böhranların İdarə Edilməsi Təşkilatının rəhbəri Əli Nəsiri paytaxt bölgəsinin sakinləri üçün sığınacaq kimi dayanacaqlar və metro stansiyaları da daxil olmaqla 300-dən çox yeraltı məkanın istifadə olunacağını açıqlayıb.
Tahir TAĞIYEV
