Səfərbərlik və Hərbi Xidmətə Çağırış üzrə Dövlət Xidmətinin sabiq rəis müavini, general-mayor Novruzəli Orucovun oğlu Rüstəm Orucovun ondan ayrılan sevgilisini təhdid etdiyi iddia olunur.
Bu barədə Oxu.Az-ın məlumatında deyilir. Saytın xəbərinə görə, Nərmin Xudaverdiyeva özünün sosial media hesabında bu barədə paylaşım edib, bildirib ki, bir ildən çox sevgili olublar və Rüstəm Orucov ona evlilik təklifi edib:
"Lakin hər münasibətdə problem olduğu kimi, bizdə də bəzi məsələlər oldu, ayrıldıq. Oktyabrdan isə yeni münasibətə başladım. Bunu öyrənən Rüstəm Orucov məni təhdid etməyə başladı. O bunu həzm etməyərək evimizə gəlib maşınıma ziyan vurur, məni təhqir edib. Haqqımda neqativ fikirlər səsləndirib. Bugünə qədər polisə şikayət etməmişəm. Dünən isə mənim adımdan feyk profil açaraq özünə ondan ötrü darıxdığımı yazıb və hazırda münasibətim olduğu insana göndərib. Təbii ki, burada məqsəd bizim münasibətimizi bitirmək olub. Artıq canımdan bezmişəm, yaşamaq istəmirəm. Keçmiş məmurun övladı olduğuna güvənib məni əzməyi düşünür".
Sayt onu da bildirir ki, məsələ ilə bağlı Nərmin Xudaverdiyeva polisə müraciət edib və araşdırma aparılır.
Üstəlik bu, Rüstəm Orucovun ilk qanunsuz əməli deyil. 2017-ci ildə o, xuliqanlıq və avtoxuliqanlıq ittihamları ilə saxlanaraq həbs cəzasına da məhkum edilib.
Maraqlıdır, məmur övladları kimə və nəyə arxalanıb şantaj, hədə-qorxu kimi yollara baş vurur? Yoxsa bu ölkədə general-mayor övladı olmaq belələrinə əlavə imtiyazlar qazandırır?
Əli TURABOV
