ABŞ prezidenti Donald Tramp etirazların yatırılması fonunda İrana qarşı mümkün hücum variantları barədə məlumatlandırılıb. Bu barədə rəsmilər "New York Times" qəzetinə bildiriblər.
Vəziyyətlə tanış olan bir neçə ABŞ rəsmisinin sözlərinə görə, Trampa son günlərdə İrana qarşı hərbi zərbələr endirmək üçün yeni variantlar təqdim edilib. Mənbələr bildirib ki, bu sıraya Tehranda qeyri-hərbi hədəflərə zərbələr endirmək də daxildir.
Bildirilir ki, Prezident hələ yekun qərar verməyib, lakin rəsmilər onun İran rejiminin nümayişləri yatırmaq cəhdlərinə cavab olaraq zərbə endirməyi ciddi şəkildə nəzərdən keçirdiyini deyib.
Xatırladaq ki, İranda etirazlar 28 dekabrdan bəri davam edir və Tehranın əsas bazarında başlayıb. Əvvəlcə dükan sahibləri və tələbələr milli valyutanın kəskin şəkildə ucuzlaşması və malların qiymətinin artması fonunda hökumətin hərəkətlərindən narazılıqlarını bildirmək üçün küçələrə çıxıb. Bu fonda İran Mərkəzi Bankının rəhbəri Məhəmməd Fərzin istefa verib. Nümayişlər sonradan İranın digər şəhərlərinə də yayılıb.
8 yanvarda Tramp bildirib ki, etirazçılar öldürülərsə, ABŞ İrana "güclü zərbə" endirməyə hazırdır. "The Wall Street Journal" qəzeti ABŞ rəsmilərinə istinadən bildirib ki, Tramp administrasiyasının rəsmiləri artıq İrana qarşı mümkün hərbi əməliyyatları müzakirə ediblər. "Time" jurnalının məlumatına görə, etirazlar zamanı 200-dən çox insan ölüb.
SAMİRƏ
