Nikolas Maduronun həyat yoldaşı Siliya Flores Nyu-Yorkda həyat yoldaşı ilə birlikdə məhkəmə qarşısına çıxarılıb. O, narkotik və silah qaçaqmalçılığında ittiham olunur. Digər prezident həyat yoldaşlarından fərqli olaraq, Siliya Flores birinci ledi kimi tanınmır. Venesuelada o, prezidentin ən etibarlı müttəfiqi və Maduro rejiminin ən nüfuzlu şəxslərindən biri hesab olunur.
Flores 1956-cı ildə Venesuelanın paytaxtı Karakasdan 200 kilometr qərbdə yerləşən Tinaquillo şəhərində anadan olub. Maduronun sözlərinə görə, həyat yoldaşı torpaq döşəməli fermada anadan olub. O, altı uşağın ən kiçiyi idi. Flores dörd yaşında olanda ailəsi Karakasa köçüb. Orada onlar sıx məskunlaşmış qərb məhəllələrində, Katia və Bokeronda yaşayırdılar. 32 yaşında Santa Maria özəl Universitetini bitirib və cinayət və əmək hüququ üzrə ixtisaslaşmış vəkil olub. Vəkil Siliya Floresin siyasi karyerası Uqo Çavezin komandasına qoşulmaqla başladı. 1992-ci ildə Çavesin uğursuz çevriliş cəhdindən sonra Flores onun hüquq komandasına qoşuldu. Həmin dövrdə Flores Çavesin müdafiə komandasında çalışan gənc hüquqşünas, Maduro isə onun azadlığa buraxılması üçün kampaniya aparan fəal oldu. Məhz bu dövrdə o, Maduro ilə tanış olub. Həmin dövrün fotoşəkillərində onun Çavesi ictimai tədbirlərdə müşayiət etdiyi, bir növ cangüdən kimi fəaliyyət göstərdiyi görünür. Maduro xatırlayır ki, “O, həbsdə olan bir neçə vətənpərvər əsgərin vəkili idi. Həmçinin komandir Çavesin vəkili və həbsxanada komandir Çavesin vəkili olmaq... çətindir. Mən onunla mübarizə illərində tanış oldum və sonra, həqiqətən də, onu bəyəndim və o, mənə baxmağa başladı”. Zamanla o, həmçinin Çavesin siyasi layihəsinə qatıldı. Flores bir sıra Çavista təşkilatlarına qoşuldu və Çavez 1998-ci ildə keçirilən prezident seçkilərindən sonra hakimiyyətə gəldikdən sonra mühüm dövlət vəzifələrini tutmağa başladı. Floresin karyerası Çavesin rəhbərliyi altında sürətlə inkişaf etdi. 2000-ci ildə o, parlamentə seçildi və altı il sonra Venesuela parlamentinin ilk qadın spikeri oldu. O, artıq münasibətdə olduğu Nikolas Maduronun yerinə keçdi. Çavesin müttəfiqinin hakimiyyəti mübahisəsiz keçmədi. Məsələn, o, parlament iclasında mətbuatı qadağan etdi və bu qadağa 2016-cı ilin yanvar ayına qədər qüvvədə qaldı. Həmin il Venesuela müxalifəti yeni parlament seçkilərindən sonra Milli Assambleyaya nəzarəti ələ keçirdi. Flores parlamentin spikeri olduğu dövrdə tənqidçilər onu müstəqil medianı məhdudlaşdırmaqda və qohumbazlıqda, yaxın çevrəsindən və ailəsindən olan insanları işə götürməkdə ittiham etməyə başladılar. Flores buna qohumları ilə fəxr etdiyini bildirərək və ittihamları qarayaxma kampaniyası kimi rədd edərək cavab verdi. 2012-ci ildə Flores baş prokuror oldu və 2013-cü ilin martında Uqo Çavezin ölümünə qədər bu vəzifədə çalışdı. Çavesin ölümündən sonra 2013-cü ildə keçirilən prezidentlik kampaniyası zamanı Floresə “birinci döyüşçü” deyən Maduro "birinci xanım" ifadəsini "yuxarı təbəqə termini" kimi rədd etmişdi. Bəzi iddialara görə, Floresin Uqo Çavezlə sevgi münasibətləri də olub. Maduro və Flores prezident seçkilərindən bir neçə ay sonra evləndilər. 2013-cü ilin iyul ayında, Maduronun seçilməsindən üç ay sonra, Flores prezidentlə evlənərək rəsmi olaraq birinci xanım oldu. O vaxta qədər onların münasibətləri uzun illər davam etmişdi və onlar əvvəlki münasibətlərdən birlikdə uşaq böyüdürdülər: Floresin üç, Maduronun isə bir övladı var. Maduro hakimiyyətə gələndən bəri Flores əri ilə birlikdə ictimai tədbirlərdə fəal iştirak edirdi. Hökumətin xalqa yaxınlığını nümayiş etdirmək üçün o, Venesuela televiziyasında " Siliya ilə ailədə" adlı ailə şousu açdı. Flores ailəsi təkcə ölkə daxilində deyil, həm də beynəlxalq səviyyədə diqqət çəkdi. 2017-ci ildə onun iki qardaşı oğlu Haitidə narkotik qaçaqmalçılığı şübhəsi ilə həbs edildi. Müstəntiqlərin sözlərinə görə, onlar Karakasdakı Mayketiya hava limanındakı prezident anqarından istifadə edərək oradan Hondurasa 800 kiloqram kokain göndərmək və daha sonra onu ABŞ-a daşımaq üçün plan hazırlayıblar. Nyu-York məhkəməsi hər birini 18 il həbs cəzasına məhkum etdi. Onlar 2022-ci ildə məhbus mübadiləsi çərçivəsində azadlığa buraxıldılar. Tramp Ağ Evə qayıdanda Floresin iki qardaşı oğlu və Maduro ailəsinin digər üzvləri yenidən ABŞ sanksiyalarına məruz qaldılar, lakin hazırda ən ciddi problemlər Maduro və Floreslə bağlıdır. Flores 2018-ci ildən bəri Maduronun yaxın çevrəsinin bir hissəsi olaraq ABŞ sanksiyaları altındadır. İnsan haqları fəalları onun rejimini məhkəməsiz qətllərə, özbaşına həbslərə və siyasi təqiblərə görə məsuliyyətə cəlb edirlər. Hazırda ABŞ prokurorları Floresi beynəlxalq narkotik ticarəti və silah ticarəti ilə məşğul olmaqda ittiham edirlər. O, bu ittihamları rədd edir.
Tahir TAĞIYEV
