Kuba hökuməti Venesuela lideri Nikolas Maduronun ələ keçirilməsi əməliyyatı zamanı 32 Kuba vətəndaşının öldürüldüyünü açıqlayıb. Havana ölənlərin Kuba silahlı qüvvələrinin və kəşfiyyat xidmətlərinin üzvləri olduğunu bildirib və iki günlük milli matəm elan edib. Mediada yayılan məlumatlara görə, ölənlər Maduronun şəxsi təhlükəsizlik xidmətinin üzvləri olub.
Kubanın rəsmi Cubadebate nəşri Venesuela əməliyyatında həlak olanların İnqilabi Silahlı Qüvvələr və Daxili İşlər Nazirliyi adından tapşırıqlar yerinə yetirən şəxslər olduğunu və onların "inadkar müqavimətdən sonra, hücumçularla birbaşa döyüşdə və ya müxtəlif hədəflərin bombalanması nəticəsində həlak olduqlarını" yazıb.
Bəyanatda kubalıların Venesueladakı rolu göstərilməsə də, iki hökumətin uzunmüddətli bir ittifaqı olduğu, Kubanın Venesuelaya neft müqabilində təhlükəsizlik dəstəyi verdiyi deyilir.
Venesuela mediası şənbə günü ən azı 25 nəfərin öldüyünü, onlardan 15-nin Venesuela prezidenti və ailəsinin təhlükəsizliyindən məsul şəxslər, 6 nəfərin Prezident Qvardiyasının üzvləri olduğunu bildirib.
"New York Times" qəzetinin dekabr ayında Venesuela hökumətinə yaxın mənbələrə istinadən verdiyi məlumata görə, Maduro son zamanlar, yataq yerini dəyişdirmək də daxil olmaqla, şəxsi təhlükəsizliyini gücləndirib. Eyni zamanda, ölkə lideri ABŞ hərbi müdaxiləsinin artan təhlükəsi fonunda əsas müttəfiqi Kubaya güvənib. Nəşrin məlumatına görə, prezidentin yaxın ətrafı və Maduro özü yataq yerini və mobil telefonlarını tez-tez dəyişdirməklə mümkün hücumdan və ya xüsusi təyinatlıların basqınından qorunmağa çalışıb.
Kubalıların bu ölkədəki roluna gəlincə, iki ölkə arasında onilliklərdir razılaşma mövcuddur: Karakas Kubaya neft ixrac edib, əvəzində oradan, xüsusilə təhlükəsizlik, səhiyyə, təhsil və digər sahələr üzrə peşəkarları cəlb edib və beləliklə, ABŞ sanksiyaları altında bir-birinə dəstək veriblər.
Qeyd edək ki, Venesuelanın Kubaya neft ixracı gündəlik 9,5 min barrel olmaqla ölkənin ümumi neft idxalının 34 faizini təşkil edib.
SAMİRƏ
