CHP lideri Özgür Özel prezident və AK Partiyasının lideri Rəcəb Tayyib Ərdoğanın ABŞ prezidenti Donald Trampdan qorxduğu üçün Venesuela prezidenti Nikolas Maduronu həbs etmək əməliyyatı barədə susduğunu iddia edib. Bu barədə məlumat yayan “Oksijen” portalı yazır ki, Ərdoğan və Maduronun birlikdə poza verdiyi şəkli, eləcə də Venesuela liderinin ölkədən çıxarıldığı “USS Iwo Jima” gəmisinin göyərtəsindəki başqa bir şəklini X hesabında paylaşan Özel bu açıqlamanı verib: "Bu fotoya diqqətlə baxın, cənab Ərdoğan! Siz dediniz ki, “15 iyulda mənə zəng edən ilk şəxs Maduro oldu”. Siz qışqırdınız ki, “Qardaşım Maduro, möhkəm dur, biz səninləyik'” və dəstək göndərdiniz. Maduro ədalətsiz seçkilər keçirib öz xalqına haqsızlıq edəndə siz də onun arxasında durub onu “qardaşım” adlandırdınız. Siz də o zaman səhv etdiniz.
Amma dostunuz Tramp gəldi, beynəlxalq hüququ pozdu və qardaşınız Maduronu və həyat yoldaşını yataq otağından götürdü, əllərini və gözlərini bağlayaraq apardı. İndi, təəssüf ki, bu fotoşəklin qarşısında susursunuz. Demokratiyanı müdafiə etməli olduğunuz halda, Maduronu müdafiə etdiniz; indi, dünya nizamını müdafiə etməli olduğunuz halda, susqunluğunuz Trampın başqa bir ölkəyə qarşı çevrilişini müdafiə edir. Çünki asılı olduğunuzu hiss etdiyiniz Trampdan qorxursunuz. Bu, sizin demokratiyanızın, dostluğunuzun və qardaşlığınızın həddidir!
Prezidentin Kommunikasiya Direktoru Burhanəddin Duran isə sosial media hesabında verdiyi açıqlamada Özelin Ərdoğanı hədəf alan açıqlamalarını tənqid edib. Duran bildirib ki, Özelin cənab Rəcəb Tayyib Ərdoğanı hədəf alan məsuliyyətsiz və kobud tonu, bir gün əvvəl verdiyi "qütbləşmədən kənara çıxmalıyıq" açıqlaması ilə açıq şəkildə ziddiyyət təşkil edir: “Özelin dili həqiqəti deyil, qəzəbi və təhrifləri əks etdirir".
Duran, Türkiyənin xarici siyasətinin bombardmançı və fürsətçi şüarlarla deyil, dövlət və millətin maraqları çərçivəsində dövlətçiliklə aparıldığını bəyan edib. O, Türkiyənin beynəlxalq hüquqa və suverenliyə hörmət prinsiplərində həmişə ardıcıl olduğunu və mənbəyindən asılı olmayaraq qanunsuzluğa qarşı mövqeyinin aydın olduğunu bildirib: "Prezidentimiz Türkiyənin maraqlarını qlobal həmkarları ilə müdafiə edir. Ölkəmizi danışıqlar masasında və meydanda güclü edən məhz bu qətiyyətli və təcrübəli liderlikdir. Prezidentimizin legitimliyi hər hansı bir xarici mərkəzin nəticəsi deyil, birbaşa millətimizin seçki qutusunda ifadə etdiyi iradənin nəticəsidir. Onun varlığı milli iradənin ən bariz təzahürüdür. Bu iradə başqalarından təsdiq gözləmədən Türkiyənin kursunu və liderliyini müəyyən etməyə davam edəcək."
Tahir TAĞIYEV
