Üzeyir Cəfərli: “Bu çox ciddi bir vəzifə daşımış bir şəxsin açıqlamasıdır”
Milli Qvardiyanın keçmiş komandanı, ehtiyatda olan polkovnik Əzizağa Süleymanov vaxtilə Prezident yanında Xüsusi İdarənin rəisi olmuş, general-leytenant Elman Qəmbərovla bağlı mətbuata ilginc açıqlama verib və generala qarşı ittihamla çıxış edib.
Ə.Süleymanovun “Bir vaxtlar Prezident yanında Xüsusi İdarənin rəisi olmuş, general-leytenant Elman Qəmbərovun qurduğu tələdən Xüsusi Dövlət Mühafizə Xidmətinin sabiq rəisi, general-polkovnik Vaqif Axundovu şəxsən xilas etmişəm” açıqlaması cəmiyyətdə böyük rezonans doğurub.
O, hadisə haqda bunları deyib: “Mənim tabeliyimdə olan Milli Qvardiya zabiti, kapitan Məmmədzadə Aydının evindən Sumqayıt şəhərində Elman Qəmbərovun tapşırığı ilə Xüsusi İdarənin əməkdaşları silah sursatı tapmışdılar və dərhal bu barədə Prezdent Heydər Əliyevə məruzə edilmişdi. Mən hansı əzablardan keçərək həmin silah sursatının vaxtilə kapitan Aydın Məmmədzadənin tabeçiliyində olan döyüş bölgəsində şəhd düşmüş döyüş yoldaşlarının üstündə yeganə nişanə qalan sursat olduğunu sübut etdim.
Şəhid olanlardan biridə Ülvi adlı Milli Qəhrəman idi. Ülvü döyüş zamanı zirehli texnikanın içində yanmışdı, ondan yeganə nişan qalan zapalsız qranat idi. Aydın Məmmədzadədə səhlənkarlıq edərək həmin zapalsız qranatı Ülvüdən yadigar qalsın deyə evində saxlamışdı. O zaman Aydın Məmmədzadə könülülərdən ibarət döyüşdə iştirak edən Sumqayıt taborunun qərərgah rəisi olmuşdu. Sonradan Milli Qvardiya sıralarına cəlb edilmişdi. Aydın Məmmədzadə dilinin bəlasına düşərək bu barədə bir nəfərə söyləmişdi. Həmin adamda kapitan Məmmədzadə Aydını Xüsusi İdarənin əməkdaşına satmışdı”.
Polkovnik Əzizağa Süleymanovun söylədikləri nə qədər həqiqət ola bilər? Elman Qənbərov buna reaksiya verəcək, yaxud verməyəcək?
“Elman Qəmbərov, yaxud da onun müavini olmuş şəxslər...”
Ehtiyatda olan polkovnik, hərbi ekspert Üzeyir Cəfərli baki-xeber.com-a bildirdi ki, bu barədə ilk dəfə olaraq Ə.Süleymanovun açıqlamasından eşidib. “O qurum Müdafiə Nazirliyindən tam fərqli bir qurum olduğuna görə bu məsələ haqda hər hansı bir bilgim yoxdur. Amma Əzizağa Süleymanov kifayət qədər ciddi bir vəzifənin yiyəsi olub və mərhum Prezident Heydər Əliyevin mühafizəsində şəxsən iştirak edib. Bu baxımdan, o məsələnin incəliklərini, dərinliklərini bilən adamlar buna münasibət bildirməlidirlər. Yəqin ki, məlumatlıdırlar. Bu çox ciddi bir vəzifə daşımış bir şəxsin açıqlamasıdır. Hər şey ola bilər. Mən onu çox ciddi bir insan sayıram və komandan olmuş bir adam durub hansısa yalanı, həqiqətə uyğun olmayan məlumatları yaymaz. Bunun məsuliyyəti olduğunu bilir.
Elman Qəmbərov, yaxud da onun müavini olmuş şəxslər bu məsələyə münasibət bildirsələr yaxşı olar. Elə Vaqif Axundovun özü də... Mən bir müddət əvvəl onu bir müalicə müəssisəsində görmüşəm, salamlaşmışıq, hal-əhval tutmuşuq. Bu gün Vaqif Axundov da sağdır. Yəni onlar bu məsələyə münasibət bildirsələr daha doğru olar”.
Ü.Cəfərli qeyd etdi ki, onun bu məsələ ilə bağlı deyə, ictimaiyyəti məlumatlandıra biləcək elə bir məlumatı yoxdur. Ü.Cəfərli hesab edir ki, Ə.Süleymanovun dedikləri bütün hallarda araşdırılmalıdır.
“Yenə də deyirəm, onlar ciddi bir qurumu təmsil etmiş şəxslərdir. Sabiq olsalar da biri (Əzizağa Süleymanov) Milli Qvardiyanın komandanı, biri də hərbi əks-kəşfiyyat idarəsinin rəisi olub. Biri general, o biri də polkovnikdir. Bu çox ciddi məsələdir. Gələcəkdə bir daha baş verməməsi məqsədilə belə hallar araşdırılmalıdır...”-deyə Ü.Cəfərli vurğuladı.
İradə SARIYEVA
