Aydın Xan Əbilov: "Sayman Aruzun rəhbərliyi altında Güney Azərbaycan ədəbiyyatı komissiyası bir çox layihələr icra edib, istər..."
Məlum olduğu kimi, Azərbaycan Yazıçılar Birliyinin (AYB) Güney Azərbaycan ədəbiyyatı komissiyasına Xalq şairi Sabir Rüstəmxanlı sədr seçilib. 48 yaşlı Sayman Aruzdan sonra 79 yaşlı Xalq şairi Sabir Rüstəmxanlının sədr seçilməsi müzakirəsiz ötüşməyib. Müzakirəyə səbəb Azərbaycan Yazıçılar Birliyinin (AYB) gənclərə yer verməməsi, yaşlı nəslin irəli çəkilməsidir. Bununla bağlı müxtəlif fikirlər səslənir. Maraqlıdır, hazırki şəraitdə Güney Azərbaycan ədəbiyyatı komissiyasının sədrinin dəyişməsinə ehtiyac varmı idi? Bundan sonra komissiyanın işi gücləndiriləcəkmi?
"Sabir bəyin Güney Azərbaycan ədəbiyyatı komissiyasına sədr seçilməsi gənclərin qarşısını almaq yox, əksinə, bu təşkilatın yeni formada fəaliyyətə başlaması deməkdir"
Yeni Yazarlar və Sənətçilər İctimai Birliyinin sədri, www.kitabxana.net – Mir Cəlal Paşayev adına Milli Virtual-Elektron Kitabxananin təsisçisi, Prezident təqaüdçüsü, yazıçı-kulturoloq Aydın Xan Əbilov baki-xeber.com-a şərhində bildirdi ki, XXI əsrin özünün geoloji, kulturoloji işləri var ki, Azərbaycanda onlara xüsusi önəm verilir: "Məlumdur ki, 60 milyona yaxın dünya azərbaycanlılarının tarixi vətəninin bir hissəsi Şimali Azərbaycanda, bir hissəsi Cənubi Azərbaycanda, müəyyən hissəsi isə dünyanın müxtəlif yerlərində yaşayır. Məlumat üçün deyim ki, Sayman Aruzun rəhbərliyi altında Güney Azərbaycan ədəbiyyatı komissiyası bir çox layihələr icra edib. İstər Azərbaycanda güney azərbaycanlı şairlərin əsərləri, istərsə də Cənubi Azərbaycanda Şimali Azərbaycandan olan yazarların əsərlərinin kitab halında çap olunmasında böyük rolu olub. Ancaq onu da unutmaq lazım deyil ki, yeni dövrün yeni çağırışları var. Bu çağırışlardan biri də ədəbi, kulturoloji münasibətləri daha da yaxınlaşdırmaqdır. Bu baxımdan hesab edirəm ki, AYB-nin qərarı düzgündür. Görkəmli yazıçı, ictimai-siyasi xadim Sabir Rüstəmxanlının rəhbərliyi altında komissiyasının fəaliyyətə başlaması alqışlanmalıdır. Onu da deyim ki, Sayman bəy yenə də komissiyada fəaliyyətini davam etdirəcək. Cənubi Azərbaycan Diaspor Ədəbiyyatı, xaricdə yaşayan azərbaycanlı yazıçılarla bağlı öz vəzifəsini yerinə yetirəcək. O da bəllidir ki, Sabir bəyin hər zaman Cənubi Azərbaycanda yaşayan soydaşlarımızla əlaqəsi olub. Bu səbəbdən də hesab edirəm ki, güney Azərbaycan ədəbiyyatının tanıtımında böyük rolu olacaq. Sabir Rüstəmxanlının Azərbaycan ədəbi, estetik düşüncəsində böyük əməyi var. Sabir bəyin Güney Azərbaycan ədəbiyyatı komissiyasına sədr seçilməsi gənclərin qarşısını almaq yox, əksinə, bu təşkilatın yeni formada fəaliyyətə başlaması deməkdir".
Günel CƏLİLOVA
