Ceyhun Məmmədov: "Dövlətin siyasətinin əsas hədəfi öz təhlükəsizliyini təmin etməkdir"
"Təəssüflə qeyd etmək lazımdır ki, bu gün biz davamlı olaraq ayrı-ayrı dövlətlərin ölkəmizə qarşı təxribatları ilə üz-üzəyik. İstənilən dövlətdə dövlət təhlükəsizliklə bağlı müxtəlif tədbirlər həyata keçirir. Bu Fransada da, başqa dövlətlərdə də belədir. Dünyanın əksər dövlətlərində bu cürdür. Bu anlamda bu gün qeyd edilən kanalda, media qurumunda mətbuatla bağlı dövlətin həyata keçirdiyi tədbirlərdə əsas hədəf və məqsəd dövlətin təhlükəsizliyinin təmin edilməsidir. Təəssüf ki, bu gün bir sıra media qurumları Azərbaycan dövlətinin yaratdığı azadlıqdan, sərbəstlikdən istifadə edərək ölkəmizə qarşı bir sıra dövlətlərin sifarişlərini həyata keçirməyə çalışırlar".
Bu fikirləri baki-xeber.com-a "Abzas media", "Toplum TV" kimi mətbuat adına iddialı olan media qurumlarının qaçaqmalçılıq və digər ittihamlarla saxlanan əməkdaşları ilə bağlı bəzi dairələrin yaratdıqları süni ajiotaja münasibət bildirərkən millət vəkili Ceyhun Məmmədov deyib.
"Bu gün biz davamlı olaraq ayrı-ayrı dövlətlərin ölkəmizə qarşı təxribatları ilə üz-üzəyik"
Millət vəkili təəssüflə bildirdi ki, ölkəmizə qarşı zaman-zaman təxribatçı addımların atıldığını və tədbirlərin həyata keçirildiyinin şahidiyik. "Xüsusilə də seçkilər vaxtı bu fəallıq özünü açıq göstərdi. USAİD və başqa qurumlar Azərbaycan dövlətini hədəfə gətirərək bəyan edirlər ki, guya bizim ölkəmizdə insan hüquqları pozulur, ölkəmizdə dövlət tərəfindən media sıxışdırılır, mediaya qarşı hansısa addımlar atılır. Sözsüz ki, bu təxribatların, bu yanaşmaların heç birinin əsası yoxdur. Çünki Azərbaycanda bu istiqamətdə dövlət bütün tədbirləri qanunvericiliyə və qaydalara uyğun olaraq həyata keçirir. Dövlətin siyasətinin də əsas hədəfi öz təhlükəsizliyini təmin etməkdir. Əlbəttə ki, burada insan hüquq və azadlıqlarının qorunması da dövlət siyasətində priroitet bir istiqamət kimi özünü göstərir. Bu anlamda dövlətə qarşı hansısa bir addım atılmasına da dövlət heç zaman imkan verməyəcək və verməməlidir də"-deyə C.Məmmədov bildirdi.
Qeyd edək ki, sözügedən şəxslər konkret ittihamlarla saxlanılıb. Ekspertlərə görə, bunların Azərbaycan dövlətində qarışdırıcılıq yaratmaq istəyən qüvvələrlə hansısa əlaqələri mümkündür. Hazırda onlarla bağlı istintaq gedir, amma istintaq başa çatmamış Qərb də iddia edir ki, guya Azərbaycanda söz azadlığı pozulur, bunların günahı yoxdur və sair.
Məlumdur ki, şəbəkələrin qurulması və onların vasitəsilə daxildə qarışıqlıq yaradılması kimi faktlar var. Bütün bunlar o qüvvələrin Azərbaycana qarşı planlaşdırdığı təxribatın tərkib hissəsidir ki, bunu da qanunçuluğumuzun keşiyində duran hüquq-mühafizə orqanları qabaqalayıcı tədbirlərlə aradan qaldırır.
İradə SARIYEVA
