Hikmət Babaoğlu: "...Bir ölkənin informasiya təhlükəsizliyini təhdid etmək üçün xüsusi məqsədlərə hesablanaraq yaradılır"
Azərbaycan cəmiyyətində müxtəlif şəbəkələr yaradıb onlar vasitəsilə ölkənin içinə sirayət etmək bir sıra Qərb dövlətlərinin əsas hədəflərindəndir. Xüsusən də medianın əli ilə ölkə içində xaos yaratmaq niyyəti güdürlər. "Toplum TV" və "Abzas media" məsələsindən geniş şəkildə ölkəmizə qarşı istifadə etməyə çalışan həmin qüvvələr, birincisi, hələ istintaq başa çatmamış o dəqiqə bunu Azərbaycanda azad mətbuatın üzərinə guya hücum, yürüş, azad mətbuatın boğulması kimi qələmə verməyə cəhd edirlər.
İkincisi, biz başqa ölkələrin timsalında görmüşük ki, Qərbin müəyyən şəbəkələri strukturlar yaradırlar, o ölkələri qatıb-qarışdırırlar, xaos yaradırlar. Bu kimi məsələlərə qarşı Azərbaycan həmişə barışmaz olub. Bizim ölkəmizdə zaman-zaman belə şəbəkələr ifşa olunub. Onlar Gürcüstanda, Ukraynada çox fəsadlar, xaoslar yaratdılar, Azərbaycan da həmişə çalışır ki, bizim ölkəmizin içində belə şeylər olmasın. Qərbin müəyyən şəbəkələrinə, şəbəkələşmək cəhdlərinə qarşı Azərbaycanın atdığı addımlar ölkəmizin içində müəyyən qüvvələri narahat edir. Onlar niyə narahat olurlar, bura onların da ölkəsi deyil ki? İstəmirsiz ki, bu ölkədə sabitlik olsun? Qərbdən gələn müəyyən şəbəkələrin ölkədə sabitliyi pozma cəhdlərinə qarşı Azərbaycanın dövlət orqanları konkret tədbir görür. Xaricdən idarə olunan, onlardan maliyyə alan şəbəkənin ifşası diqqət mərkəzindədir.
Millət vəkili Hikmət Babaoğlu baki-xeber.com-a şərhində "Toplum TV" kimi informasiya resurslarının yaradılması əvvəlcədən məqsədli xarakter daşıyır və bir ölkənin informasiya təhlükəsizliyini təhdid etmək üçün xüsusi məqsədlərə hesablanaraq yaradılır. Eyni zamanda bu cür resurslar özlərini söz azadlığının, mətbuat azadlığının, informasiya azadlığının təmsilçiləri kimi təqdim edərək, əslində ölkə daxilində və ondan kənarda bir dövlətin informasiya təhlükəsizliyini təhdid edən əsas silaha çevrilirlər"-deyə bildirdi.
H.Babaoğlunun sözlərinə görə, dövlət qurumları təhlükəsizliyimizi təhdid edən bu cür risqlərə qarşı mübarizə aparan zaman hazırda şahidlik etdiyimiz vəziyyət yaranır. "Bütün dünyaya qlobal informasiya məkanına bu cür resursları yaradan mərkəzlərə, guya ki, Azərbaycanda söz və mətbuat azadlığının məhdudlaşdırılması ilə bağlı məlumatlar verirlər və beləcə, bir informasiya xaosu yaratmaqla Azərbaycanın hüquqi və demokratik dövlət imicini zədələmiş olurlar. Yəni bu cür resursların yaranma məqsədi elə budur. Əlbəttə ki, bütün bunlara baxmayaraq, Azərbaycanın müvafiq qurumları belə hala qarşı mübarizədə əsla çəkinmədən, qətiyyətli mövqe nümayiş etdirməlidirlər. Çünki Azərbaycan Prezidenti andiçmə mərasimində qeyd etdi ki, bizim təhlükəsizliyimizi təhdid edən həm də ideoloji təhdidlər var. Bax, bu informasiya təhdidi o ideoloji təhdidlərin başında gəlməklə, bütövlükdə cəmiyyətin ictimai rəyini monipulyasiya etməyə qadirdir. Həmçinin milli dövlətçiliyə qarşı ictimai rəyi səfərbər etməklə dövləti bunun qurucularının, yəni xalqın gözündən salmağa hesablanan addımlar atırlar. Bu çox qorxuludur. Bu cür təhdidlərə qarşı mübarizə aparmaq da Azərbaycanın hüquq-mühafizə orqanlarının borcudur"-deyə bildirən H.Babaoğlunun fikrincə, bundan sonra da bu mübarizə qətiyyətlə aparılmalıdır. "Biz icazə verə bilmərik ki, əldə etdiyimiz bütün tarixi nailiyyətlərimizi hansısa informasiya resursları hansısa bir formada gözdən salımış və onu xalqımızın ictimai rəyində tərsinə təqdim etmiş olsun. Bu yolverilməzdir. Nəticə etibarı ilə dövlətimizin gücünün, möhkəmliyinin, sarsılmazlığının zədələnməsinə çevrilə bilər. Ona görə də bu cür mübarizə qətiyyətlə bundan sonra da davam etdirilməlidir"-deyə H.Babaoğlu vurğuladı.
İradə SARIYEVA
