Vüqar İsgəndərov: "Bu halda necə ola bilir ki, hansısa maliyyə ayırırlar, bu maliyyəni ayırmaqda məqsəd nədir, səbəb nədir?"
"Biz dünyanın hansı rəngə boyandığını və hansı iradə ilə idarə olunmaq cəhdlərinin fərqindəyik. Təəssüflər olsun ki, özünü demokratiyanın beşiyi sayan, insan haqları və azadlıqlarından, fundamental dəyərlərdən bar-bar bağıran qüvvələr və dövlətlərin bu dünyada baş verən hadisələrə münasibətləri, öz ölkələrində insan haqlarının kobud şəkildə pozulması, insanların fundamental söz haqlarının hətta küçələrdə itlərlə, atlarla dağıdılması və qadağan olunmuş vasitələrlə onlara maneə törədilməsi, onların həbs edilməsi artıq günümüzün adi halına çevrilib. Bunu o ölkələr edir ki, özləri başqa ölkələrdə nöqsanlar axtarırlar, onların idarəetmə sistemində problem görmək istəyirlər, onu dilə gətirirlər, bəyanatlar verirlər. Artıq bunlar keçmişdə qalmış məsələlərdir.
Siz bizim ölkəmizdə baş verən hadisələrdən niyə belə narahatsınız? Niyə öz ölkənizin ağır problemləri ilə məşğul olmursuz?
Təsəvvür edin ki, "Toplum TV"-nin redaksiyasında axtarış aparıldıqdan qısa müddət sonra artıq ABŞ Dövlət Departamenti bununla bağlı hansısa bir bəyanat verir. Fredom haus və digər bənzər təşkilatlar onların azad olunması ilə bağlı fikirlər söyləyirlər. Siz nələr baş verdiyini hardan bilirsiniz?" Bu fikirləri baki-xeber.com-a "Toplum TV" və "Abzas media" məsələsi ətrafında bəzi qüvvələrin hələ istintaq başa çatmamış, nəticələr ortaya çıxarılmamış yaratdıqları məlum süni ajiotaja şərh verərkən millət vəkili Vüqar İsgəndərov bildirib.
"...Burada maraqlı olan qüvvələr, dövlətlər var"
V.İsgəndərov hesab edir ki, məlum hadisələrin Azərbaycanda azad mətbuatın üzərinə guya yürüş, azad mətbuatın boğulması kimi şərh edilməsi cəhdləri absurddur, həbs edilən şəxslərə qarşı konkret ittihamlar var.
"Azərbaycan hüquq-mühafizə orqanları öz işlərini, vəzifələrini icra edirlər və hələ ortada istintaqın heç bir rəyi olmadan, məhkəmə hökmü olmadan təqsirləndirilən şəxs kimi instintaqa cəlb olunan insanların azad olunması ilə bağlı bəyanatlarınızda maraqlarınız nədir? Siz yenə də kimləri aldatmaq, kimi öz torunuza salmaq istəyirsiz? Bu artıq o dövlətlərin, o təşkilatıarın açıq simasını göstərir. Əslinə qalsa, burada zamanın bir ironiyası da var. Bu bizə maskaların cırıldığını və kimlərin hansı maska arxasında nələrlə məşğul olduğunu açıq-aydın göstərir. Ona görə də, dövlət öz vəzifəsini icra edir, müvafiq orqanlar öz işlərini görür. Düşünürük ki, hüquq-mühafizə orqanları istintaq hərkətlərindən sonra hər bir məsələyə öz qanuni rəyini verəcək. Azərbaycan öz getdiyi yolda qətiyyətlidir və onu kimlərinsə o yoldan döndərməsi qəti mümkün deyil. Bunlar yalnız söz yığınından başqa bir şey sayıla bilməz".
V.İsgəndərov hesab edir ki, media adına iddialı qurumlar xaricdən maliyyə və tapşırıq alıbsa, bu yolverilməzdir, bu barədə şübhələr istintaqda araşdırılacaq və gerçək ortaya çıxarılacaq. "Əgər həqiqətən də xaricdən maliyyələşmə varsa, bu maliyyə niyə ayrılır? Ora getsəniz və xaricdəki həmin o maliyyə resurslarına, o pulu verənlərə desəniz ki, küçədə qalmışam bir avro, bir dollar verin tramvaya minib gedim, bir qəpik də verməzlər. Bu halda necə ola bilir ki, hansısa maliyyə ayırırlar, bu maliyyəni ayırmaqda məqsəd nədir, səbəb nədir, bu ölkədə nəyi dəyişdirmək istəyirlər ki, bu qədər vəsait verirlər? Əgər bu həqiqətən də belədirsə, bu faktlar təsdiqini tapacaqsa, demək burada maraqlı olan qüvvələr, dövlətlər var. Onlar müstəqil, öz milli maraqlarına yönələn siyasət yeridən, inkişaf edən dövlətlərdə hər hansı bir çaxnaşma, qeyri-stabillik yaratmaq istəyirlər, belə cəhdlər olur. Ona görə də, təbii, dövlətin də birbaşa vəzifəsidir ki, belə destruktiv halların qarşısını alsın"-deyə millət vəkili vurğuladı.
İradə SARIYEVA
