Rəşad Məcid: "Bu məsələlər ətrafında yaranmış hay-küyün əsl səbəbləri bəllidir - Azərbaycanı gözdən salmaq, ölkədə çaxnaşma salmaq, milli birliyimizə xələl gətirmək"
Keçən ilin noyabrında "Abzas media"nın rəhbərliyi və əməkdaşlarının konkret ittihamlar əsasında saxlanıldığı məlumdur. Ortada konkeret ittiham var, onlara qarşı Cinayət Məcəlləsinin 206.3.2 -ci (qaçaqmalçılıq qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb. Hazırda araşdırma prosesi gedir. Bir neçə gün əvvəl isə "Toplum TV"-nin rəhbərliyinə və əməkdaşlarına qarşı bu addım atılıb. Araşdırma, istintaq bitməmiş indidən "azad media vurulur", "söz azadlığı boğulur", "mətbuata qarşı həbs dalğası başlayıb" kimi absurd fikirlər səsləndirənlər var.
Birincisi, "Toplum TV" və "Abzas media məsələsi" ilə bağlı bəzi qüvvələrin hələ istintaq başa çatmamış o dəqiqə bunu Azərbaycanda azad mətbuatın üzərinə guya yürüş, azad mətbuatın boğulması kimi şərh etmələri diqqəti çəkir.
"Hansısa media adına iddia edən qurumun xarici qüvvələrdən vəsait alaraq onların tapşırıqlarını icra etməsi yolverilməzdir"
Məsələ ilə bağlı Azərbaycan Mətbuat Şurasının sədri Rəşad Məcid baki-xeber.com-a şərhində "Əlbəttə, ilk növbədə, jurnalist həbsi və digər bu kimi məsələlərdə söz və ifadə azadlığı ilə bağlı motivlərin mövcud olub-olmadığına diqqət yetirməliyik. Bütün dünyada Mətbuat Şuralarının başlıca missiyası cəmiyyəti medianın hücumlarından qorumaqdır. Bu hücumlar nə zaman olur? O zaman ki, media özünün səlahiyyətlərini aşır, müvafiq olaraq söz və ifadə azadlığı prinsiplərinə zor tətbiq edir, sui-istifadələrə yol verir. Ona görə bizim üçün həm medianın və jurnalistlərin fəaliyyətinə mümkün maneələrdə, həm də medianın özünün qeyri-etik, jurnalistikaya uyğun tərzdə davranmaması müstəvisində həmin prinsiplərə nə dərəcədə xələl gətirilməsi əsasdır. İstər "Toplum TV", istərsə də ondan əvvəl "Abzas Media" ilə bağlı durumda cəmiyyətə daha çox sirayət edən məqam kimi söz və ifadə azadlığının pozulmasını görmürük. Bəli, adları çəkilən media qurumları tənqidi ruhda fəaliyyət göstərirlər. Ancaq bir reallıq da var ki, media tənqid etməlidir. Hesab edirəm ki, fəaliyyətində daha fundamental tənqidə üstünlük verən media orqanlarımız və jurnalistlərimiz var. Onlar sərbəst şəkildə işlərini görürlər. Heç birinə hansısa maneçiliyin törədilməsindən, məhdudlaşdırmaların tətbiqindən söhbət gedə bilməz"-deyə bildirdi.
R.Məcid qeyd etdi ki, indi Azərbaycan öz tarixinin ən şərəfli və qürurlu dövrünü yaşayır. MŞ sədrinin sözlərinə görə, ərazi bütövlüyümüzün və suverenliyimizin tam bərpası bizi istəməyən, düşmən qüvvələrin yuxusunu qaçırıb: "Belə bir vaxtda hamımız, xüsusən media, jurnalist adına iddia edən qurumlar və şəxslər həddən artıq sayıq olmalı, düşmən dəyirmanına su tökən alətə, vasitəyə çevrilməməlidirlər.
Xüsusən gənc, formalaşmamış beyinlərin düşmən qüvvələr tərəfindən yuyulmasına yol vermək olmaz.
Ölkəmizdə media üçün münbit şərait yaradılıb, medianın şəffaf maliyyələşməsi mövcuddur.
Hansısa media adına iddia edən qurumun xarici qüvvələrdən vəsait alaraq onların tapşırıqlarını icra etməsi yolverilməzdir.
İndi istintaq gedir. Əminik ki, istintaq obyektiv aparılacaq, qaranlıq məqamların aydınlaşması reallaşacaq. Bu məsələlər ətrafında yaranmış hay-küyün isə əsl səbəbləri bəllidir - Azərbaycanı gözdən salmaq, ölkədə çaxnaşma salmaq, milli birliyimizə xələl gətirmək. Buna görə də indi hamımızdan, xüsusən media adına iddiaçılardan birinci növbədə yüksək həssaslıq və vətənpərbərlik tələb olunur".
İradə SARIYEVA
