İstanbulun Beşiktaş səmtindəki lüks oteldə martın 26-sı yerli vaxtla saat 23:00-da başından aldığı güllə yarası ilə özəl xəstəxanalardan birinə yerləşdirilən və növbəti gün günorta saatlarında vəfat edən iş adamı Nihad Əliyevin güllələnməsinin detalları açıqlanıb. Media və sosial şəbəkələrdə yayılan məlumatlarda bildirilir ki, Nihad Əliyev otelə 6 dostu ilə birgə gəlib. 6 dostu ilə 3 qız dəvət edərək otelin restoranında əylənən Nihad Əliyev daha sonra otel otağında əyləncəni davam etdirib. Bu zaman otaqdan güllə səsi gəlib və otel işçiləri otağa daxil olarkən N.Əliyevin gicgahından aldığı tək güllə ilə yerdə uzandığını görüblər. Olay yerinə təcili yardım və polis çağırılıb. N.Əliyevin 6 dostu və 3 xanım gözaltına alınıb. Şahidlər istintaqa bildiriblər ki, N.Əliyev əyləncənin ortasında belindəki tapançanı çıxararaq gizgahına dayayıb. İddia edilib ki, N.Əliyev tapançanın boş olduğunu zənn edib. Şahidlər bildirib ki, ondan “Şeytan doldurar”, deyə tətiyi çəkməməyi xahiş ediblər. N.Əliyev isə dinləməyib və əminliklə tətiyi çəkib. Bu zaman isə güllə açılıb. Qeyd edək ki, bundan öncə türk mediası onun intihara cəhd etdiyini bildirmişdi. Daha sonra isə N.Əliyevin oteldən çıxarkən naməlum şəxslər tərəfindən güllələndiyi haqda iddia yayılmışdı.
Hələllik Nihad Əliyevin hansı səbəbdən dünyasını dəyişdiyi ilə bağlı müxtəlif versiyalar səslənir. Görünən budur ki, səslənən versiyalar sırasında onun güllələndiyi iddiası da var. Hadisənin İstanbulda baş verməsi də maraq doğurur. Çünki son illər Azərbaycanla bağlı olan bir çox səsli-küylü qətl hadisələri məhz bu böyük şəhərdə baş verib. Bu təsadüfdür, yoxsa...
“Əsasən imkanlı adamlara aid olan həmin otellərə polis müdaxiləsi sıfıra endirilir”
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, bunun bir sıra obyektiv səbəbləri var: “Polisin istənilən cinayətin qarşısını alması, kriminal vəziyyətə tam nəzarət etməsi üçün məlumat alması və həmin məlumatlar əsasında əməli fəlaiyyət göstərməsi lazımdır: “Biznesin inkişaf etdiyi oturuşmuş ölkələrdə bir sıra amillər buna mane olur. Mən də sizinlə razıyam ki, son bir neçə ildə Azərbaycan vətəndaşlarının öldürüldüyü ölkə məhz Türkiyə, əksər hallarda isə İstanbul olub. İndi gəlin, öldürülən adamların kimliyinə və qətllərin baş verdiyi məkanlara nəzər salaq. Birmənalı şəkildə deyə bilərik ki, həmin qətllər çox dəbdəbəli otellərdə və varlı adamlar ətrafında baş verib. Polisin ənənəvi əməliyyat-axtarış tədbirini həyata keçirməsi üçün oturuşmuş mexanizmi var. Bizim qeyd etdiyimiz məkanlarda isə polis həmin fəaliyyəti təşkil edə bilmir. Əsasən imkanlı adamlara aid olan həmin otellərə polis müdaxiləsi sıfıra endirilir. İnsanların şəxsi istirahətinə müdaxilənin yolverilməzliyi bəhanəsi ilə polis bahalı otellərin daxilində baş verən hadisələrdən xəbərsiz olur. Bu da gizli fəaliyyət və sövdələşmələr üçün münbit məkan anlamını daşıyır. Bu səbəbdən də, biznes dairələri, kriminal elementlər öz söhbətlərini, aydınlaşdırma mövzularını məhz həmin məkanlara salırlar. Baş verən son qətl hadisələrində diqqət çəkən başqa bir vacib məqam isə hadisələrdə iştirakçı olan şəxslərin hamısının silah gəzdirməsidir. Deməli, otellərə kimin üstündə nə ilə girib-çıxdığına ciddi nəzarət olunmur”.
Hüquqşunasın sözlərinə görə, Azərbaycanda isə kriminogen duruma tam nəzarət edilir: “Şübhəli şəxslər ölkəyə daxil olan kimi, elə hava limanından başlayaraq nəzarətə götürülür. Yeri gələndə, həmin adamla ətraflı söhbət edilib xəbərdarlıq olunur. Bu da həmin adamda nəzarətdə olduğuna dair bir fikir formalaşdırır. Məhz bu səbəbdən də, analoji hadisələr bizim ölkədə çox az baş verir”.
Məhəmmədəli QƏRİBLİ
