Prezident İlham Əliyev hökumət təmsilçisi olan nazirlərlə keçirdiyi videokonfrans müşavirəsi zamanı, bütün çətinliklərə baxmayaraq, islahatların davam edəcəyini bildirib. Onun sözlərinə görə, bu özünü həm struktur, həm də kadr islahatlarında göstərəcək:
“…Pandemiya bir daha göstərdi ki, uğurlu inkişaf üçün iqtisadiyyat dayanıqlı olmalıdır. Buna nail olmaq üçün mütləq bütün sahələrdə islahatlar aparılmalıdır - həm iqtisadi-sosial sahədə, eyni zamanda, siyasi sahədə. Mən hesab edirəm ki, siyasi islahatların aparılması bundan sonra da bizim imkanlarımızı daha da genişləndirəcək. Biz bu islahatların gözəl nəticələrini görürük. Azərbaycan bundan sonra da demokratik inkişaf istiqamətində önəmli addımlar atacaq. Bizim kifayət qədər güclü siyasi iradəmiz var. Biz görürük ki, siyasi və iqtisadi islahatlar paralel aparılarkən doğrudan da böyük uğurlara imza ata bilərik. Struktur islahatları aparılıb və hesab edirəm ki, struktur islahatlarının davam etdirilməsi məsələlərinə yenə də baxmalıyıq. Siyasi islahatlar göz qabağındadır, kadr islahatları aparılıb. Prezident Administrasiyasında, Nazirlər Kabinetində, parlamentdə böyük kadr dəyişiklikləri edilib. Bütün hakimiyyət qollarında aparılan islahatlar bir məqsədi güdür ki, idarəetmə mexanizmi daha da təkmilləşsin, təbii olaraq, gəncləşmə siyasəti aparılsın və peşəkar kadrlar önəmli vəzifələrə gətirilsin. Hesab edirəm ki, bizim sözümüzlə əməlimiz arasında, hər zaman olduğu kimi, bu dəfə də vəhdət var və nəyi bəyan etmişəmsə biz onu da təmin edirik. Hesab edirəm ki, Prezident Administrasiyasında, Nazirlər Kabinetində və Milli Məclisdə aparılan ciddi islahatlar nəticəsində ölkəmiz indi yeni inkişaf mərhələsinə inamla qədəm qoyur və idarəetmədə təkmilləşmə göz qabağındadır. Eyni zamanda, yerli icra orqanlarında aparılan kadr islahatları, xüsusilə, xoşagəlməz hallara qarşı ciddi mübarizə də göz qabağındadır. Bu bizim şüurlu seçimimizdir. Bütün xoşagəlməz hallara qarşı bundan sonra da ciddi mübarizə aparılacaq. Hesab edirəm ki, Prezident tərəfindən edilən xəbərdarlıq hər kəs üçün dərs olmalıdır. Əgər kimsə bundan ibrət götürməsə, günah onun özündə olacaq”.
Qeyd edək ki, koronavirusla bağlı görülən tədbirlər həm də, çağırılmamış qonaq kimi, hökumətin test olunması baxımından “yaxşı” vasitə oldu. Məhz belə ekstremal şəraitdə hansı qurumların prosesə hazırlığının nə səviyyədə olduğu üzə çıxdı. Bura koronavirus dərslərini də əlavə etsək, Prezidentin anons etdiyi struktur islahatlar təxminən hansı çərçivədə gedə bilər?
YAP Siyasi Şurasının üzvü Vüqar Rəhimzadə “Bakı-Xəbər”ə bildirdi ki, struktur islahatları çox vacibdir:“İslahatlar davamlı və sistemli şəkildə həyata keçirilir. Burada məqsəd təkrar olunan təşkilatların birləşdirilməsi və eyni zamanda, icra orqanlarının fəaliyyətində çevikliyin təmin edilməsidir. Ümumiyyətlə, inkişaf etməkdə olan cəmiyyətlərdə struktur islahatları sistemli şəkildə həyata keçirilir. Bu proses Azərbaycanda da uğurla icra olunur. Sistemli islahatlar ölkəmizin beynəlxalq nüfuzunu artırır, iqtisadi inkişafda yeni uğurlu addımların atılmasına şərait yaradır. İslahatların dərinləşməsi və geniş miqyas alması Prezidentə olan ictimai rəğbət və dəstəyi daha da artırır. İndiyə qədər həyata keçirilən islahatlar ölkənin bütün sferalarını əhatə edib. Bununla paralel mühüm kadr dəyişikliyi də aparıldı. Hətta ən yüksək vəzifələri də əhatə etdi. Bütün dönəmlər üçün xarakterik olan islahatlar həm də Azərbaycan dövlətinin qüdrətinin göstəricisidir. Çünki belə çətin vəziyyətdə bir çox inkişaf etmiş ölkələr böhrandan necə çıxacaqlarını planlaşdırır, ancaq biz həm də inkişaf və islahat haqda fikirləşə bilirik. Sistemli şəkildə həyata keçirilən bu tədbirlər çevik idarəetməni formalaşdırır. Bu addımlar bizim daha da qüdrətlənməmizə səbəb olacaq, dünyaya daha sıx inteqrasiyamızı təmin edəcək. Ölkə başçısının bu təşəbbüsünə böyük ictimai dəstək var”.
Ekspert İlqar Hüseynli isə “Bakı-Xəbər”ə açıqlamasında bildirdi ki, struktur islahatının mahiyyəti ondan ibarətdir ki, idarəetməyə yeni nəfəs gəlsin:“Ölkədə aparılan struktur islahatlarının heç də hamısı ideal nəticəni vermir. Bu səbəbdən də, islahatların aparılmasına zərurət duyulur. Ölkə Prezidenti müəyyən göstərişləri və tapşırıqları verir. Təəssüflər olsun ki, onların icrası ilə bağlı çatışmazlıqlar var. Bu da dövlətin bəzi qurumlarının işindəki qüsurlarla bağlıdır. Məsələn, yerli rayon icra hakimiyyətlərinin davranışlarında biz bunu görürük. Nümayişkaranə şəkildə icra başçılarını həbs etdilər. Onların rüşvət aldıqları bütün ölkəyə sübutedici formada nümayş edildi. Ancaq təəssüflər olsun ki, həmin vəziyyət çoxlarına örnək olmadı. Prezident sonrakı müşavirədə dedi ki, yenə də vətəndaşları incidən, rüşvət yığan icra başçıları ortaya çıxdı və onlar da həbs edildi. Əgər biz Prezidentin iradəsinə uyğun ciddi islahatlar aparmaq istəyiriksə, ilk növbədə rayon icra hakimiyyətlərindən başlamalıyıq. Biz icra orqanlarını dəyişsək, onların yerlərdəki polisə, məhkəməyə, prokurorluğa təsir gücləri azalar. Bu da şəffaflığın təmin olunmasına müsbət təsir edər. İslahatlar zənciri hətta kənd icra nümayəndələri və bələdiyyələri əhatə etməlidir. Aşağılardan başlayıb, yeni struktur formalaşdırmalıyıq. Çünki bu sahədə xoş olmayan vəziyyət hakimdir. Bir də çalışmalıyıq ki, islahatların aparıldığı qurumlarda nəzarət güclənsin. Onların fəaliyyəti keçmiş zamanla tutuşdurulub, doğru təhlil olunsun. Belə nəzarət güclənəcəyi halda struktur islahatların effekti daha yaxşı olar”.
Məhəmmədəli QƏRİBLİ
