Ölkəmizdə hər gün açıqlanan koronavirusa yoluxma ilə bağlı statistika pandemiyanın ölkəmizdə yayılmaqda davam etdiyini sübut edir. Təəssüflə qeyd etməliyik ki, artıq verilən rəsmi məlumatlarda biz ölüm hallarının qeyd edildiyinin şahidi oluruq. Məhz buna görə də, Operativ Qərargah günü-gündən qaydaları sərtləşdirir, maarifləndirmə işlərinə daha çox önəm verir. Müşahidələr göstərir ki, hələ pandemiyanı ciddi qəbul etməyən vətəndaşlarımız da az deyil. Bəzən cərimələr və digər inzibati tədbirlər belə onların evdən küçəyə çıxmasının qarşısını ala bilmir. Belə vəziyyətdə cəmiyyətdə söz, mandat sahibi olanların da üzərinə ağır məsuliyyət düşür. Onlar əhaliyə dövlətin apardığı işləri daha sadə dildə izah etməlidirlər. Ancaq bəzən biz görürük ki, bu qəbildən olan insanlar heç də lazım olan təbliğatı aparmır, əksinə, “gündən-günə artan, ciddiləşən tədbirlərin nəticəsində biz artıq bu bəladan qurtulmağa doğru yaxınlaşırıq” kimi real vəziyyətlə uzlaşmayan fikirlər səsləndirirlər.
Ümumiyyətlə, Azərbaycanda koronavirusla bağlı vəziyyət haqda nə demək olar, perspektivdə nə gözlənir və hansısa əlavə tədbirlərə ehtiyac varmı?
Rasim Quliyev:“Koronavurusla mübarizə hələ bitməyib, biz aktiv fazanın sonuncu mərhələsinə çatmışıq”
“Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, burada real vəziyyətlə insanların arzuları arasında bir fərq qoyulımalıdır:“İnsanlarımız və hər kəs bu bəlanın başımızın üstündən tezliklə götürülməsini istəyir. Bu da gərgin psixoloji vəziyyətlə bağlıdır. Bizdə sonuncu dəfə komendant saatı, yəni hərəkətlə bağlı məhdudiyyətlər 1990-cı ildə olub. Həmin vaxt Azərbaycan heç müstəqil deyildi. Müstəqillik dövründə əminamanlıq, təhlükəszlik içində yaşayan əhalimiz belə vəziyyətlə heç vaxt üzləşmədi. Bu səbəbdən də vətəndaşlarımızın qadağalardan psixoloji olaraq yorula bilməsi normaldır. Bu başqa məsələdir. Ancaq rəsmi, cəmiyyətdə müəyyən titulları daşıyan şəxslər bununla bağlı bəyanatlıarın verilməsində real faktlara əsaslanmalıdırlar. Koronavirus bir günün içində yox olan bəla deyil. Proses necə tədricən artan dinamika ilə hərəkət edibsə, elə də başa çatmalıdır. Bunun üçün biz yoluxma hallarının azaldığını və sağalanların sayında artımı görməliyik. Hazırda isə açıqlanan rəqəmlərdən belə tendensiyanı müşahidə etmirik. Biz bir günün içində deyə bilmərik ki, hər şey bitdi və həyat əvvəlki axarına qayıtsın. Bu olacaq, amma tədricən. Bütün məhdudiyyətlərin bir anın içində ləğv edilməsi hələ tezdir. Dünyadakı başqa dövlətlər də bu proseslə olduqca ehtiyatlı davranırlar. Biz arzulayırıq ki, bəla bütün dünyadan, xüsusən də ölkəmizin üzərindən yoxa çıxsın. Dövlətimiz də bu istiqamətdə əlndən gələni edir. Belə hal nə vətəndaşlara, nə də dövlətə xoşdur. Yalnız səbr edib qələbə qazana bilərik. Koronavurusla mübarizə hələ bitməyib, biz aktiv fazanın sonuncu mərhələsinə çatmışıq. Belə halda düşmən açıq görsənir. Ona qarşı necə mübarizə aparmağı da insan mənimsəyə bilir. İradə və əzmkarlıqla dövlətimizə qulaq asmalıyıq. Birlik və həmrəyliklə bunu adlaya bilərik. Vətəndaşlarımıza, dövlətimizə və siz jurnalistlərə uğurlar arzulayıram”.
Məhəmmədəli QƏRİBLİ
