Koronavirus pandemiyasının ilk günlərindən ölkəmiz xəstəliyin yayılmasının qarşısının alınması üçün çevik və zəruri qabaqlayıcı addımlar atıb. Nazirlər Kabineti yanında Operativ Qərargah yaradılıb. Mart ayının 3-dən etibarən ölkə üzrə bütün təhsil müəssisələrində tədris prosesi mərhələli şəkildə aprelin 20-dək dayandırılıb. Ölkə ərazisində keçirilməli olan bütün kütləvi tədbirlər təxirə salınıb və ya ləğv edilib. Martın 14-dən etibarən bir sıra sosial təcrid tədbirlərini əhatə edən xüsusi rejim, martın 24-dən isə xüsusi karantin rejimi tətbiq edilib. Ticarət və əyləncə mərkəzlərinin fəaliyyəti dayandırılıb, park və ictimai istirahət yerlərinə insanların girişi qadağan edilib. Şəhərlərarası nəqliyyatın və Bakı Metropoliteninin fəaliyyəti tam dayandırılıb. Aprelin 5-dən etibarən ölkədə hərəkət məhdudiyyəti tətbiq olunur. Bir sıra dövlət və özəl qurumların fəaliyyətinə cəlb edilmiş şəxslər istisna olmaqla, bütün digər vətəndaşların yaşayış yerini tərk etməsinə konkret müəyyən olunmuş hallarda və vaxt çərçivəsində SMS icazə sistemi vasitəsilə icazə verilir. On beş mindən artıq Azərbaycan vətəndaşı müxtəlif ölkələrdən, o cümlədən dövlət hesabına təşkil olunmuş çarter reysləri vasitəsilə, təxliyə edilib. Ölkəyə qaytarılmış bütün vətəndaşlarımız dövlət hesabına 4 və 5 ulduzlu mehmanxanalarda, xüsusi karantin zonalarında yerləşdirilib. Azərbaycanda Koronavirusla Mübarizəyə Dəstək Fondu təsis edilib. Dövlət vəsaiti ilə bərabər, ayrı-ayrı şəxslər, sahibkarlar və təşkilatlar fonda könüllü ianələr köçürür. Bu, Azərbaycan cəmiyyətində olan həmrəyliyin nümunəsidir.
Ancaq gəlin görək biz pandemiyanın yaratdığı şəraitlə bağlı hər istiqamətdə həmrəyliyimizi nümayiş etdirə bilirikmi? Təəssüf ki, yox. Ölkənin bütün təbliğat resursları pandemiyanın ölkəmizdə geniş yayılmaması üçün vətəndaşlara evdə qalmağı məsləhət görür. İlkin anlarda bu, məsləhət formasında oldu. Sonra məlum oldu ki, vətəndaşlarımız bu qadağalara riayət etmək istəmirlər. Küçələr insanlarla dolu olurdu. Mərhələli şəkilildə məhdudiyyətlər sərtləşməyə başladı. Hazırda ölkədə xüsusi karantin rejimi hökm sürür. Yenə də biz insanlarımızın hansısa vasitələrlə karantin rejimini pozmaq niyyətlərini görürük. Hətta hüquq-mühafizə orqanları bu dönəmdə sərbəst hərəkətə əsas verən saxta arayışların satılması faktlarını da aşkar edib. Müşahidələrimiz göstərir ki, bəzən bu günlərdə belə avtomobillərin tıxacı ilə rastlaşırıq. Təəssüf ki, nəzərə çapan başqa bir faktor da var. Bəllidir ki, dövlət pandemiyadan zərər çəkən bütün təbəqələrə dəstək paketini təqdim edib. Biz müşahidə edirik ki, həmin paketlərdən yararlanmaq istiqamətində əhalinin bəzi təbəqəsində fəallıq yüksək səviyyədədir. Təbiidir ki, hər bir vətəndaşın dövlətdən ayrılan məbləği almaq hüququ var. Buna kimsə nəsə deyə bilməz. Ancaq bir çox hallarda görürük ki, məhz pandemiyanın güzəştlərindən yararlanmaq istəyənlərin çoxu bu dönəm üçün qoyulan qadağalara əməl etməyənlərdir. Necə ola bilir ki, bir insan pandemiya ilə bağlı imtiyazı qəbul edir, amma qadağaya əməl etməkdə həvəsli deyil? Bu tərs mütənasibliyi vətəndaşlarımız özləri özlərinə sual etməlidir. Məntiqi cavab bu olar ki, hamı qaydalara əməl edib, evdə oturmağa çalışmalıdır.
Məhəmmədəli QƏRİBLİ
