“Azərbaycan Prezidenti İlham Əliyev Türk Surası Zirvə görüşünün videobağlantı formatında keçirilməsi təşəbbüsü ilə ümumtürk inteqrasiyası tarixində bir neçə ilkə imza atdı. Türk Şurası bu konfransla tarixə koronovirusla mübarizəni məxsusi müzakirə edən ilk beynəlxalq təşkilat kimi düşməklə yanaşı, həm də Azərbaycan Türk Şurasının öz tarixinə yeni tipli və ən müasir inteqrasiya üsulu gətirdi”. Bu fikirləri SİA-ya açıqlamasında “Bakı Xəbər” qəzetinin baş redaktoru siyasi ekspert Aydın Quliyev deyib.
O bildirib ki, Azərbaycan virtual konfransla bütün türk dövlətlərinə koronavirusla bağlı öz mübarizə təcrübələrini bölüşmək şansı verdi.
Ekspert söyləyib ki, məhz Azərbaycanın videokonfrans təşəbbüsündən sonra Türk dövlətlərində koronavirusla mübarizənin yeni və daha mükəmməl mərhələlərinin başlanacağına şübhə yoxdur: “Bu konfrans Türk dövlətlərinin bəşəri rifah, sülh və əmin-amanlıqda nə qədər maraqlı olduqlarını və nə qədər əməli-praktik mövqe tutduqlarını nümayiş etdirdi. Azərbaycan Prezidentinin təşkil etdiyi videokonfrans həm koronavirusla mübarizədə, həm də postkorona dövrünün daha nizam-intizamlı qurulmasında türk dünyasının malik olduğu güc və potensialların nə qədər böyük olduğunu göstərdi”.
A.Quliyev söyləyib ki, son ay yarımda Azərbaycanın həyata keçirdiyi sistemli antivirus tədbirlərinin Prezident tərəfindən dünyaya geniş təqdimatının xüsusilə əhəmiyyətli olduğunu vurğulamaq lazımdır: “Azərbaycan prezidenti videokonfransda ölkənin milli təcrübə modelindən dünyaya bir sıra maraqlı mesajlar verdi. Prezidentin Azərbaycanda görülən işlər barədə təqdim etdiyi bilgilər “Azərbaycan nə üçün nisbətən ən yaxşı durumdadır və nə üçün Ümumdünya Səhiyyə Təşkilatı Azərbaycanın təcrübəsini birmənalı təqdir edir” suallarının bütün dünyada tam aydınlaşdırılmasında müstəsna əhəmiyyətə malikdir”.
Baş redaktor qeyd edib ki, Prezident Əliyev bir daha göstərdi ki, Azərbaycan koronavirusun stixiya kimi yayılmasının qarşısında həqiqətən güclü müdafiə sistemi qurur, işləri kor-korana deyil, bir-birini tamamlayan sistem halında ardıcıl olaraq həyata keçirir: “Videokonfransda dünya əmin oldu ki, Azərbaycanın koronavirusla mübarizədə nisbətən ən yaxşılar sırasında olması təsadüf deyil və həyata keçirilən tədbirlərin məntiqi nəticəsidir. Videokonfransda Azərbaycanın virus əleyhinə tədbirləri kompleks şəkildə həyata keçirməsini dünyanın maraqla qarşılayacağına söz yoxdur. Eyni vaxtda virusun yayılma sürətini azaltmaq və dayandırmaq, iqtisadiyyatın dinamikliyini saxlamağa imkan verən tədbirlər görmək, işçilərin işsiz qalmasının qarşısını almaq, sahibkarlığın tənəzzülünə səbəb ola biləcək təzahürləri aradan qaldırmaq, makroiqtisadi sabitliyi təmin etmək, ümumi sosial rifahın tənəzzülə düşməsinin qarşısını almaqla bağlı Azərbaycan Prezidentin təqdimatı ölkəmizin məhz bu sistemlə kompleks iş həyata keçirdiyinə dair dünyada tam təsəvvür yaratdı”.
Ekspert əlavə edib ki, Azərbaycan öz təqdimatı ilə koronavirusla dövlətin, cəmiyyətin və hər bir fərdin kollektiv gücü əsasında mübarizəni təşkil edə bilmiş azsaylı dövlətlərdən biri olduğunu bir daha nümayiş etdirdi.
