İran FIFA-nın ölkədə qadınların stadiona girişinə icazə verilməsi çağırışını rədd edib. Baki-xeber.com xarici mediaya istinadən xəbər verir ki, bu barədə açıqlama verən İranın baş prokuroru Cəfər Muntazeri, İranda qadınların stadiona girişinə qadağanın dünyada futbol təşkilatı FIFA-ya dəxli olmadığını deyib.
“FIFA qadınların stadiona girişinə icazə verilməyəcəyi halda rəsmən İranı beynəlxalq turnirlərdən məhrum edəcəyini bildirir. Qadınların stadiona girib-girməməsi FIFA-nı niyə maraqlandırır” - baş prokuror deyib.
Muntazeri, FİFA-nın israrının ardında İranın düşmənlərinin ölkəyə mədəni təsir cəhdləri olduğunu iddia edib: "Əldə etdiyimiz kəşfiyyat məlumatları, düşmənlərin, müxtəlif sahələrdə gənclərimizə, insanlarımıza, qızlarımıza və oğlanlarımıza şiddətlə hücum etdiyini göstərir".
Bir neçə gün əvvəl isə İran preidentinin köməkçisi hökumətin qadınların stadiona girişinə icazə verilməsini dəstəklədiyini bildirib.
Qeyd edək ki, FIFA Prezidenti Qianni İnfantino bildirib ki, İran qadınların stadionlara buraxılmasına 40 ilə yaxındır qoyulmuş qadağanı qaldırmasa, Dünya Kubokunun təsnifat oyunlarına buraxılmaya bilər. İnfantino İranın futbol federasiyası olan FFIRI-yə iyulun 15-dək vaxt verib ki, qadınları 2022-ci il Dünya Kubokunun təsnifat yarışlarına buraxsın.
İnfantino deyib ki, qadınlar oyunlara baxmağa layiqdir, çünki “bütün dünyada bunu qadınlara borcluyuq, həm də bunu etməyə məsuliyyət daşıyırıq, FIFA nizamnaməsinin əsas prinsiplərinə uyğun olaraq bu gerçəkləşməlidir”.
