Qırğızıstanın sabiq prezidenti Almazbek Atambayevin hüquq-mühafizə orqanları tərəfindən saxlanmasından sonra Koy-Taş kəndindəki evinin önünə toplaşan, minlərlə tərəfdarı paytaxt Bişkekə yürüşə başlayıb.
Baki-xeber.com xəbər verir ki, bu bardə Qırğızıstan Sosial Demokrat Partiyası siyasi məclis üzvü Adil Turdukulov Facebook hesabında məlumat yayıb.
Onun sözlərinə görə, Atambayevin Koy-Taş kəndindəki iqamətgahı qarşısında toplaşan tərəfdarları Birkekə yürüş etməyə başlayıb. Şahidlər bu məlumatı təsdiqləyirlər. Sputnik-ə açıqlama verən şahidlər Bişkekə doğru yürüşün başladığını bildiriblər. “Koy-Taşdan bəziləri avtomobillə, bəziləri avtobusla gedir, Bişkekə piyada gedənlər də var” – şahidlər bildirib.
Bişkekdə Atambayevin gətirildiyi Daxili İşlər Nazirliyinin binası qarşısında vəziyyət sakitdir. Bina qarşısında sadəcə jurnalistlər gözə dəyir.
Bununla yanaşı Atambayev tərəfdarları parlament binasının yerləşdiyi Ala-Too Meydanında toplaşmağa başladığı bildirilir. Binanın qarşısına toplaşan təxminən 50 nəfərlik qrupun çox aqressiv hərəkət etdikləri və "Jeenbekov getməlidir" şüarları səsləndirdikləri qeyd edilir.
Son məlumatlara görə Atambayevin saxlanılmasından sonra Bişkekin Ala-Too meydanında mitinq başlayıb. Sputnik Qırğızıstan xəbər verir ki, hazırda milis və xüsusi təyinatlılar mitinqin dağıdılması ilə məşğuldurlar. Verilən məlumata görə, ərazidə səs bombalarının partlayış səsləri eşidilib. Mitinqdə təxminən 1000 nəfərin iştirak etdiyi bildirilir. Bir müddət öncə onlar paytaxtın Çuy prospektini bağlayıblar.
Bundan başqa o da məlum olub ki, saxlanan Atambayevin yanında sözçüləri Fərid Niyazov və Kunduz Joldubayeva da gedib. Məlumata görə, sabiq prezident saxlandıqdan sonra tərəfdarları onu Bişkekə aparan avtomobilin yolunu kəsiblər. Atambayevi aparan avtomobil karvanı istiqamətini dəyişərək başqa yolla onu Bişkekə aparıb.
Qeyd edək ki, Qırğızıstan xüsusi təyinatlıları avqustun 7-də axşam saatlarında Atambayevin evinə basqın edib. Ancaq xüsusi təyinatlılar sabiq prezidentin tərəfdarlarının sərt müqaviməti ilə qarşılaşıblar. Hər iki tərəf odlu silahdan istifadə edib və nəticədə bir nəfər ölüb, 80-ə yaxın insan isə yaralanıb. Məhz bundan sonra əməliyyat yarımçıq dayandırılıb. Bu gün günorta saatlarında isə xüsusi təyinatlıları yenidən Atambayevin evində əməliyyat keçirib və qarşıdurmalardan sonra sabiq prezident həbs edilib.
