07/12/2019 09:56
728 x 90

Yaponiya-Cənubi Koreya gərginliyi artır... Koreya səfiri Yaponiya XİN-ə çağırıldı, başqa bir koreyalı isə səfirlik qarşısında özünü yandırdı

img

Yaponiya və Cənubi Koreya arasındakı gərginlik artır. Tokiodakı Cənubi Koreya səfiri Yaponiya Xarici İşlər Nazirliyinə çağırılıb. Cənubi koreyalı 78 yaşlı bir kişi isə, Yaponiyanın Seuldakı səfirliyi qarşısında park etdiyi avtomobilin içərisində özünü yandırıb.

Baki-xeber.com xəbər verir ki, ağır yanıq xəsarətləri alan Kim soyadlı cənubi koreyalı xəstəxanada vəfat edib.

Yaşlı kişi hadisədən əvvəl yaxınlarından birinə zəng edərək, Yaponiyaya nifrət etdiyini və buna görə özünə qəsd edəcəyini deyib.

Kimin ailəsi, yaşlı adamın qayınatasının Koreya Yarımadasında 1910-1945-ci illərdə müstəmləkə hakimiyyətinin təzyiqləri altında zorla işlədildiyini söyləyib.

Qeyd edək ki, bu cür hadisə ilk dəfə deyil ki baş verir. 2017-ci ildə cənubi koreyalı bir dindar iki ölkə arasında imzalanan Koreya yarımadasında 1910-1945-ci illərdə işğalçı yapon əsgərlərinin təcavüz və cinsi istismara məruz qalmış qadınlara təzminat ödənilməsi barədə müqaviləyə etiraz edərək özünü yandırmışdı.

Son aksiya iki ölkə arasındakı ticarət və siyasi gərginliyin artdığı bir vaxtda baş verib. Tərəflər bir-birinin məhsullarını boykot edirlər.

Bu arada, Yaponiya hökuməti Cənubi Koreya səfirini Cənubi Koreyanın II Dünya müharibəsi dövründə icbari iş ilə bağlı mübahisəni həll etmək məqsədilə arbitrasiya məhkəməsinə gəlmədiyi üçün Xarici İşlər Nazirliyinə çağırıb.

Yaponiyanın xarici işlər naziri Taro Kono səfir Nam Gvan Pyoya Cənubi Koreyanın arbitrasiya məhkəməsinə gəlməməsinin beynəlxalq hüquqa zidd olduğunu söyləyib.

"Arbitrasiyanın baş tutmadığından çox məyusam. Cənubi Koreya hökumətini müqavilənin mövcud vəziyyətini tərk etməməyə və düzəlişi tez bir zamanda həyata keçirməyə çağırırıq" -  deyə, Yaponiyanın xarici işlər naziri Taro Kono deyib.

Ötən il Cənubi Koreya məhkəməsi Yaponiya şirkətlərinin müharibə zamanı Cənubi Koreyanın məcburi əməyindən istifadə etdiyi üçün kompensasiya ödəmələrinə qərar çıxarıb.

Uzun müddət davam edən qarşıdurma Yaponiyanın Cənubi Koreyaya göndərdiyi yüksək texnologiyalı xam mallarını azaltmasına səbəb olub, bu isə smartfon sənayesinə ciddi təsir göstərə bilər.

Son xəbərlər