Şair Ramaldanov: “… gələcəkdə torpaq uğrunda döyüşmək istəyən şəxslərin vətənpərvərlik ruhunun yüksəlməsinə səbəb olacaq”
Şəhid ailələrinə diqqət və qayğl ilbəil artır. Onların ailələrinə dövlətimiz tərəfindən hər cür köməklik və yardımlar göstərilir. Məlumdur ki, bu yaxınlarda 1997-ci il avqustun 2-dək Azərbaycan Respublikasının ərazi bütövlüyü uğrunda həlak olmuş hərbi qulluqçuların vərəsələrinə 11.000 (on bir min) manat məbləğində birdəfəlik ödəmə verilməsi ilə bağlı ölkə başçısının imzaladığı fərman da bu qayğının nəticəsidir. Artıq Prezidentin verdiyi fərman yerlərdə icra olunmağa başlayıb. Bununla yanaşı, şəhid ailələrinə ayda 242 manat Prezident təqaüdü verilir.
Şəhid ailələrinə ayda 242 manat təqaüdün verilməsi həmin ailələrin sosial həyatının yaxşılaşdırılmasına səbəb olur.
Azərbaycan Silahlı Qüvvələrinin ehtiyatda olan polkovniki Şair Ramaldanov “Bakı-Xəbər”ə açıqlamasında qeyd etdi ki, dövlət tərəfindən şəhid ailələrinə xüsusi qayğı, diqqət göstərilir. Şəhid ailələrinə xoş münasibətin olması sevindiricidir. Bu istiqamətdə görülən işlər davam edəcək. Onların sosial həyatının yaxşılaşdırılması məqsədilə ayda 242 manat təqaüd verilir: “Şəhid ailələrinə təqaüdün verilməsi onların yaşayışına müsbət təsir göstərir. Bəzi şəhid ailələri var ki, onların vəziyyəti elə də yaxşı deyil. Bu tip ailələrin maddi vəziyyətinin düzəlməsi üçün sosial yardımların verilməsi müsbət addımdır. Məlumdur ki, Prezident İlham Əliyev tərəfindən verilən sərəncama əsasında vətən uğrunda həlak olmuş hərbi qulluqçuların ailələrinə birdəfəlik yardım ödənilir. Şəhid ailələrinə 11 min manatın ödənilməsi prosesi artıq həyata keçirilir. Hərbçi ailələrinə müəyyən yardımların verilməsi yalnız müsbət qarşılanır”.
Həmsöhbətimiz hesab edir ki, şəhid ailələrinə tək dövlət tərəfindən deyil, eyni zamanda, qurumlar, cəmiyyət tərəfindən də dəstək olmalıdır. Hərbçi ailələri daim diqqət altında olmalıdırlar: “Nəzərə almaq lazımdır ki, müharibə şəraitində olan ölkədə yaşayırıq. Bu baxımdan şəhid ailələrinə təqaüdün verilməsi müsbət qərardır. Bu ailələrə təqaüdün verilməsi gələcəkdə torpaq uğrunda döyüşmək istəyən şəxslərin vətənpərvərlik ruhunun yüksəlməsinə səbəb olacaq. Çünki onlar rahat şəkildə döyüşdə iştirak edəcəklər. Döyüşçülər biləcək ki, onların ailələrinə dövlət və cəmiyyət diqqət yetirəcək, problemlərinə biganə qalmayacaq. Bu hal hərbçilərin döyüş qabiliyyətini artırmağa, eyni zamanda, psixoloji duruma müsbət təsir edəcək”.
Günel CƏLİLOVA
