Əkbər Qoşalı: “Azərbaycanda bununla bağlı aparılan sosial siyasət özünü doğruldur”
Hər bir dövlətin əsas funksiyalarından biri əhalinin sosial müdafiəsini təşkil etmək, maddi nemətlərin ədalətli bölgüsünə nail olmaq, daxili siyasətin sosialyönümlüyünü ön planda saxlamaq, vətəndaşların sosial rifah halını yaxşılaşdırmaqdır. İnkişaf etmiş, yaxud inkişaf etməkdə olan ölkələr xalqlarının sosial rifahı yüksək olan dövlət qurmağı hədəf kimi qarşılarına məqsəd qoyublar.
Azərbaycanda da dövlət daim öz vətəndaşına qayğı ilə yanaşır, onun rifahının yüksəldilməsini, sosial problemlərinin həllini prioritet vəzifə kimi müəyyənləşdirir. Bu istiqamətdə məqsədyönlü siyasət həyata keçirir.
Bu gün əhalisinin sosial müdafiəsinin təmin edilməsi Azərbaycan dövlətinin qarşısında duran strateji vəzifələrdən biridir. Yəni sosial siyasət dövlət siyasətinin prioritetidir. Təkcə bu il 626 şəhid ailəsi yeni evlərlə təmin edilib. Bundan başqa, Qarabağ müharibəsi əlilləri dövlət tərəfindən minik avtomobilləri ilə təmin olunurlar. Bu il 265 nəfər əlilə avtomobil verilib. Ötən il əlilliyi olan şəxslərə 33 min ədəd protez-ortopedik məmulat və reabilitasiya vasitəsi, tibbi göstərişi olan əlillərə 1193 ədəd əlil arabası verilib, 39,8 min nəfərə bərpa xidməti göstərilib.
Prezident təqaüdü ilə yanaşı, müharibə əlillərinin böyük əksəriyyəti əlilliyə görə əmək pensiyası, qalan bir qismi isə əlilliyə görə müavinət alır. Eyni zamanda, müharibə əlillərinin uşaqlarına aylıq sosial müavinət verilir. Həm şəhid ailələrinin, həm də Qarabağ müharibəsi əlillərinin uşaqlarının dövlət ali və orta ixtisas təhsili müəssisələrində ödənişli təhsil haqları dövlət büdcəsi hesabına ödənilir. Şəhid ailələrinə ayda 242 manat Prezident təqaüdü verilir. Əmək pensiyası almaq hüququ olmayan şəhid ailəsi üzvlərinə kommunal, nəqliyyat və digər xidmətlər üçün aylıq sosial müavinət verilir. Milli Qəhrəmanlara (və ya həlak olanların ailələrinə) aylıq 1500 manat Prezident təqaüdü ödənilir. Milli qəhrəmanların ailə üzvlərinin əmək pensiyasına hər ay 110 manat əlavə edilir. Milli Qəhrəmanlara və onların ailə üzvlərinə həmişə xüsusi qayğı göstərilir.
Sözügedən məsələni dəyərləndirən Azərbaycanda Atatürk Mərkəzinin şöbə müdiri, Milli QHT Forumu İdarə Heyətinin üzvü Əkbər Qoşalının fikrincə, Milli Qəhrəmanlara göstərilən yüksək sosial diqqət qürurvericidir: “Milli Qəhrəmanlara göstərilən bu cür yüksək qayğı Prezident İlham Əliyevin yeritdiyi uğurlu siyasətdən irəli gəlir. Görünən odur ki, ölkə başçısı bütün bunlara çox diqqətlə yanaşır. Azərbaycan dövlətinin zəngin ənənələri var. Bütün bunlar həm də xalqımızın xarakterindən irəli gəlir. Ölkə başçısınin nəinki Milli Qəhrəmanlara, o cümlədən bütün Qarabağ qazilərinə və şəhid ailələrinə göstərdiyi diqqəti alqışlayırıq. Şəhidlik mövzusu elə mövzudur ki, bu bütün məsələlərdən öndə gəlir. Azərbaycanda bununla bağlı aparılan sosial siyasət özünü doğruldur. Məsələ ondadır ki, dövlətin imkanları artdıqca, bu sahəyə göstərilən diqqət daha da artırılır. Ötən illər ərzində çoxsaylı şəhid ailəsi mənzil və avtomobillə təmin edilib. Yaxın illərdə bütün şəhid ailələri və Qarabağ əlillərinin evlə təmin olunacağı gözlənir. Azərbaycanda bu sahədə aparılan siyasət, görülən işlər digər ölkələrə nümunə olacaq səviyyədədir. O baxımdan hesab edirəm ki, bu yöndə dövlətin apardığı məqsədyönlü siyasət alqışalayiqdir. Azərbaycanda müstəqil dövlət quruculuğu kursu digər ölkələr üçün nümunəvi modeldir. Bununla bağlı dəfələrlə yüksək səviyyələrdə fikir bildirilib. Ölkə rəhbərliyi bütün sahələr üzrə demokratik, şəffaf islahatlar siyasətini dönmədən həyata keçirməkdədir. Bu kontekstdə, əhalinin sosial təminatı üzrə proqramların da yüksək səmərəliliklə reallaşdığını vurğulamaq gərəkdir”.
Vidadi ORDAHALLI
