Nadir İsrafilov: “Dövlət tərəfindən hər bir uşağın qidalanması üçün qida rasionu müəyyən olunub, təəssüf ki, bəzi hallarda buna əməl olunmur”
Uşaq bağçalarınin ərzaqla təminatı məsələlərinə nəzarət gücləndirilib. Bakı Şəhər İcra Hakimiyyətinin yaydığı məlumatda qeyd olunur ki, bu günlərdə Bakı şəhərindəki məktəbəqədər təhsil müəssisələrinin ərzaq təminatını həyata keçirən bəzi qurumlar tərəfindən paytaxtın bir sıra uşaq bağçalarına standartlara uyğun olmayan ərzaq verilib.
Məsələ ilə bağlı yerlərdən Bakı Şəhər İcra hakimiyyətinə daxıl olan məlumatlara əsasən dərhal Bakı Şəhər İcra hakimiyyəti və Məktəbəqədər təhsil və uşaq evləri idarəsinin əməkdaşları müxtəlif uşaq bağçalarında olub, həmin ərzaqların qida hazırlanmasına verilməsinin qarşısı alınıb, onların tam şəkildə geri qaytarılaraq keyfiyyətə uyğun ərzaqlarla əvəz olunması təmin edilib.
Məsələnin ciddiliyi nəzərə alınaraq Şəhər İcra Hakimiyyətində operativ müşavirə keçirilib, məktəbəqədər təhsil müəssisələrinin ərzaqla təminatının vəziyyətinin yerində araşdırılması üçün komissiya yaradılıb, bu işlərdə prinsipiallıq göstərməyən bir neçə bağça müdirəsinə töhmət verilib, Məktəbəqədər təhsil və uşaq evləri idarəsinin rəhbərliyinə ciddi xəbərdarlıq edilib.
Müşavirədə xüsusi olaraq qeyd olunub ki, uşaqlar hər zaman ən keyfiyyətli ərzaqlarla təmin olunmalı və bu məsələlərə çox ciddi nəzarət edilməlidir.
Məsələ ilə bağlı fikir bildirən təhsil eksperti Nadir İsrafilov qeyd etdi ki, dövlət tərəfindən hər bir uşağın qidalanması üçün qida rasionu müəyyən olunub. Lakin bəzi bağça müdirləri və ayrı-ayrı yerli icra hakimiyyəti orqanları tərəfindən həmin ərzağın böyük əksəriyyəti mənimsənilir: “Beləliklə, həmin qidalar uşaq bağçasına gedib çatmır. Bu problemlə bağlı şikayətlər yetərincədir. Valideynlərin özləri övladlarına evdən ərzaq qoymasa, o zaman uşaqlar keyfiyyətsiz qida ilə qidalanmalı olacaqlar. Təəssüf ki, bu problem əksər dövlət uşaq bağçalarında qeydə alınır. Bu səbəbdən valideynlər özəl bağçaya daha çox meyl göstərirlər”
Həmsöhbətimiz onu da vurğuladı ki, problemin olmaması üçün mütəmadi olaraq uşaq bağçalarında monitorinq keçirilməlidir: “Keçirilən monitorinqlər formal xarakter daşımamalıdır. Hansısa uşaq bağçasında qida rasionuna düzgün riayət olunmursa, həmin məktəbəqədər təhsil müəssisəsi qanun çərçivəsində cəzalandırılmalıdır. Yaxşı olar ki, həmin bağçanın və rəhbərliyinin adı ictimaiyyətə açıqlansın. Belə olan halda, digər bağçalar uşaqların qidalanmasına xüsusi fikir verəcəklər. Beləliklə, bu sahədə hər hansı bir problem yaşanmaz”.
Günel CƏLİLOVA
