Mais Əliyev: “Vəkillər qanuna əsasən əhalinin aztəminatlı təbəqəsinə heç bir ödəniş olmadan pulsuz hüquqi yardım göstərəcəklər”
Məlum olduğu kimi, Prezident İlham Əliyev “Azərbaycan ədliyyəsinin inkişafına dair 2019–2023-cü illər üçün Dövlət Proqramı”nı təsdiqləyib. Dövlət Proqramında əhalinin aztəminatlı təbəqəsinin pulsuz hüquqi yardım alması ilə bağlı məsələ də yer alıb.
Sənədin 6.1.8. maddəsi əhalinin aztəminatlı təbəqəsinə pulsuz hüquqi yardım göstərilməsinin təkmilləşdirilməsi məqsədilə beynəlxalq ekspertlərin iştirakı ilə “Pulsuz hüquqi yardım haqqında” Azərbaycan Respublikası Qanununun layihəsinin hazırlanması ilə əlaqədardır.
Sosial Hüquqların Araşdırılması İctimai Birliyi, Azərbaycan Vəkillər Kollegiyasının üzvü, professor Mais Əliyev mövzu ilə bağlı “Bakı-Xəbər”ə bildirdi ki, aztəminatlı ailələrin pulsuz hüquqi yardım alması ilə əlaqədar qanun layihəsinin hazırlanması çox vacib bir qərardır. “Bunun əhəmiyyəti çox böyükdür. Azərbaycan Konstitusiyasına görə, hər bir şəxsin peşəkar, ixtisaslı hüquqi yardım almaq hüquqi var. Lakin elə təbəqələr var ki, onlar hüquqi yardım almaqda çətinlik çəkirlər. Məsələn, əhalinin aztəminatlı təbəqəsinin hüquqi və sosial təminat baxımından qayğıya ehtiyacı var. Bu insanlar hüquqi yardım almaqda çətinlik çəkirlər və problemlərinin həllində onlara yardımçı olmaq üçün vəkil tuta bilmirlər, tutsalar da, o vəkilin pulunu ödəyə bilmirlər. “Pulsuz hüquqi yardım haqqında” Azərbaycan Respublikası Qanunu layihəsinin hazırlanmasını çox təqdir edirəm. Dövlət Proqramına əsasən hazırlanması nəzərdə tutulan belə bir qanun layihəsinin faydası çox böyük olacaq. Mən özüm QHT rəhbəriyəm və illərdir aldığım layihə çərçivəsində aztəminatlı ailələrə pulsuz hüquqi yardım göstərirəm. Bu sahədə qanun layihəsinin hazırlanması gələcəkdə aztəminatlı ailələrin pulsuz hüquqi yardım almasını qanunla tənzimləyəcək. Azərbaycan Respublikasının Vəkillər Kollegiyasında qeydiyyatda olan vəkillər qanuna əsasən əhalinin aztəminatlı təbəqəsinə pulsuz hüquqi yardım göstərəcəklər. Bu da sözügedən qrupa daxil olan əhalinin vəziyyətini yaxşılaşdıracaq”. M.Əliyev bildirdi ki, aztəminatlı təbəqə əsasən sosial müavinət, birdəfəlik yardım almaqla, yaxud əmlak mübahisələri ilə bağlı məhkəməyə müraciət etdikdə peşəkar hüquqi yardım ala bilmirlər. “Aztəminatlı əhalinin peşəkar hüquqi yardım alması baxımından bu qanunun əhəmiyyəti çox böyük olacaq. Eyni zamanda, beynəlxalq təcrübədə belə qanunlar var ki, aztəminatlı ailələr pulsuz hüquqi yardımla təmin olunurlar” - deyə M.Əliyev bildirdi.
İradə SARIYEVA
