“Turizm şirkətlərinin kateqoriyalaşdırılması həm şirkətlər, həm də turistlər üçün olduqca əhəmiyyətlidir”
Azərbaycanda turizm şirkətləri A, B, C və s. kateqoriyalara bölünə bilər. Bunu Dövlət Turizm Agentliyinin İctimaiyyətlə əlaqələr şöbəsinin rəhbəri Kənan Quluzadə media mümayəndələrinə açıqlamasında qeyd edib.
Onun sözlərinə görə, kateqoriyaların şirkətlərin göstərdikləri xidmətlərin sayına, çeşidlərinə uyğun müəyyənləşdirilməsi nəzərdə tutulur: "Elə turizm şirkəti var ki, onun fəaliyyət növləri, işçilərinin sayı çoxdur. Onların əlavə olaraq otel, nəqliyyat, bələdçi xidmətləri göstərmək imkanları var. Hansı şirkətin xidmətlərinin sayı, çeşidləri genişdirsə, o, daha üstün kateqoriya əldə edə bilər. Amma elə şirkət var ki, az sayda işçi ilə fəaliyyət göstərir, onların otel və s. sahə üzrə xidmət göstərmək imkanları yoxdur. Buna baxmayaraq, imkanları məhdud olan şirkətin də kateqoriya alması mümkündür. Kateqoriyalaşdırma həm şirkətlər, həm də turistlər üçün olduqca əhəmiyyətlidir. Bu proses şirkətləri inkişafa stimullaşdıra, rəqabətin sağlam aparılmasına yardım edə bilər. Kateqoriyalaşdırma, öz növbəsində, turistlərin keyfiyyətli xidmət almasına kömək edə bilər”.
Şöbə rəhbəri qeyd edib ki, layihəyə görə, aldıqları kateqoriyadan asılı olmayaraq, bütün şirkətlərin Turizm Reyestrinə daxil edilməsi nəzərdə tutulur: "Reyestr hamı üçün açıq olacaq. Müştəri həmin reyestrə baxdıqda öz büdcəsinə uyğun gələn xidmətləri seçə və həmin xidmətləri göstərə bilən şirkətlərə sifarişlərini verə biləcək".
Azərbaycanda turizm şirkətlərinin A, B, C və s. kateqoriyalara bölünməsinin əhəmiyyəti barədə danışan Sağlamlıq və Termal Turizmə Dəstək Assosiasiyasının sədri Ruslan Quliyev “Bakı-Xəbər”ə açıqlamasında qeyd etdi ki, bu məsələ uzun müddətdir gündəmdə idi: “Turizm şirkətlərində yaşanan problemlərlə bağlı məsələlərin qanunvericilik çərçivəsində həll olunmasını istəyirdik. Turizm şirkərləri ilə bağlı xarici ölkələrin təcrübəsi fərqlidir. Belə ki, Rusiyada tur agentliyinin açılması üçün lisenziya tələb olunmur. Ancaq tur operatorunun fəaliyyəti üçün sığorta və maliyyə təminatı olmalıdır. Türkiyədə A, B və D qrup tur agentlikləri var”.
Həmsöhbətimiz hesab edir ki, hazırda turizm reyestrinin yaradılması aktualdır. Tur operatorun fəaliyyəti üçün mütləq şəkildə onların sığorta və bank təminatı olmalıdır: “Nəzərə almaq lazımdır ki, gəlmə turizmlə bağlı xidməti düzgün etməyən, maliyyə öhdəliklərini yerinə yetirməyən şirkətlərin müəyyən təminatı olmalıdır. İstər ölkəyə gələn turistin, istərsə də xaricə gedən Azərbaycan vətəndaşının ilkin təminatı və ödədiyi vəsait geri qaytarılmadığı halda, sığorta fondu istehlakçıların hüquqlarının müdafiəsinə qalxır. Fond turizm səfərinin təminatına və turistin geri qayıtmasına şərait yaradır. Hesab edirəm ki, turizm kateqoriyalarının yaradılması turizm sektorunun inkişafına səbəb olacaq. Turizm şirkətlərinin kateqoriyalaşdırılması həm şirkətlər, həm də turistlər üçün olduqca əhəmiyyətlidir”.
Günel CƏLİLOVA
