Çingiz Fərəcov: "Bu il Azərbaycanda az bal istehsal olunub"
Artıq neçə ildir ənənə halını alan bal satış-sərgisi bu il də paytaxt sakinlərinə müxtəlif regionlardan gətirilən arıçılıq məhsulları ilə tanış olmaq imkanı verəcək. Sərginin nə vaxt və hansı ünvanda keçiriləcəyini öyrənmək məqsədilə Kənd Təsərrüfatı Nazirliyi ilə əlaqə saxladıq.
Nazirliyin mətbuat xidmətinin rəhbəri Murtuzəli Hacıyev "Bakı-Xəbər"ə açıqlamasında qeyd etdi ki, oktyabr ayının 15-dən noyabr ayının 15-nə kimi Bakıda bal məhsulları sərgi-satış yarmarkası "Amay" ticarət mərkəzində təşkil olunacaq:
"Yarmarkada iştirak etmək istəyən arıçılar Kənd Təsərrüfatı Nazirliyinin çağrı mərkəzinə müraciət edib. Müraciət edən arıçılar onlayn qaydada nazirliyin çağrı mərkəzində qeydiyyatdan keçir. Müraciətlərin qəbulu yekunlaşmaq üzrədir. Artıq 320-yə yaxın arıçı qeydiyyatdan keçib. 100 tondan artıq balın yarmarkaya çıxarılması gözlənir".
M.Hacıyev onu da əlavə etdi ki, oktyabrın 1-dən etibarən arıçılar öz məhsullarını anbara təhvil verir: "Arıçıların istehsal etdiyi məhsulları anbara təhvil verməsi oktyabr ayının 1-dən 8-nə qədər davam edəcək. Təhvil veriləcək məhsul Respublika baytarlıq laboratoriyasında analiz olunacaq".
Həmsöhbətimizin sözlərinə görə, yarmarkanın fəaliyyət göstərəcəyi sahədə müşahidə kameraları quraşdırılır. Bu, ticarət yerində qayda-qanuna, təmizliyə, asayişin qorunmasına yönəlib: "Yarmarkaya gətiriləcək bal məhsullarının keyfiyyətinə nəzarətin daha səmərəli olması üçün isə müasir avadanlıqlarla təchiz edilmiş laboratoriya fəaliyyət göstərəcək. Sahibkarların bir ay ərzində sərbəst və mədəni ticarəti üçün lazımi şərait yaradılacaq".
Kənd təsərrüfatı sahəsi üzrə ekspert Çingiz Fərəcov qəzetimizə açıqlamasında qeyd etdi ki, Azərbaycanda arıçılıq sahəsi ildən-ilə inkişaf edir: "Bal yarmarkası ilk dəfə 2000-ci ildə keçirilib. O zaman bal yarmarkasına 16, ikinci dəfə 48, sonra isə 168 arıçı öz məhsulunu gətirib. Bal yarmarkasına arıçılıq təsərrüfatı olan şəxsləri dəvət edirdik. 100-dən çox arı ailəsi olan arıçıları biz sərgidə iştirak üçün dəvət edirdik. Şəhər və rayon icra hakimiyyətləri hansı arıçıların yarmarkada iştirakının vacib olması təklifini irəli sürərdi. Çünki onlar arıçıları bizdən daha yaxşı tanıyırdı. O vaxtlar biz yarmarkaya 200-dən çox arıçını dəvət etmirdik. Amma son illər bu qayda pozulub. İndi hansı arıçının yarmarkada iştirak etməsi öncədən elan edilir. Bu düzgün deyil. Hətta iki il öncə keçirilən bal yarmarkasında 600 arıçı iştirak edib. Yarmarkaya gələn arıçıların əksəriyyəti saxta bal gətirir. Bildirim ki, bu il Azərbaycanda az bal istehsal olunub. Bəllidir ki, aprel ayından iyul ayına qədər fasiləsiz yağışlar yağıb. Yağan yağışlar həm ağacların çiçəklərini, həm də ağaclarda olan çiçəklərin nektarını yuyub apardı. Ötən illə müqayisədə arılar çox az bal tədarük edib. Bu yaxınlarda Oğuz, Qəbələ, Daşkəsəndə oldum. O rayonlarda yaşayan təcrübəli arıçılar bu il balın yox dərəcəsində olduğunu deyir. Yarmarkaya çıxarılacaq balın necə təmiz ola bilməsi sual doğurur".
Həmsöhbətimiz bildirdi ki, sərgidə iştirak edən arıçıların təxminən 20-25 arı ailəsi var. Bu sayda arı ailəsi ancaq 50 kiloqram bal verir. Təəssüf ki, həmin arıçılar sərgiyə 200-300 kiloqram balla çıxır.
Ç.Fərəcov balın təbii olub-olmamasını necə ayırd etməyi də başa saldı: "Bir qaşığa qoyulan balı oda tutmaq lazımdır. Odun üzərində olan bal qaynayıb qara rəngə çevrilmirsə, deməli, o məhsula şəkər az qatılıb. Digər üsul isə balı insanın öz dərisini sürtməsidir. Təmiz bal 5 dəqiqə ərzində dəridən bədənə sovrulur və həmin hissədə nazik qat olur.
Normal bal xarlamalıdır. Saxta balda isə şəkər kristalları açıq-aşkar görünür".
Günel CƏLİLOVA
