Şəhərin bəzi yerlərində məhəllə arası kababxanalarda lülə-tikə kababın 1 şişini 3 manata satırlar. Nəzərə alsaq ki, ətin bir kiloqramının qiyməti 15-20 manat arası dəyişir, 3 manata satılan kababların hansı ətdən hazırlanması suallara səbəb olur.
Eyyub Hüseynov: “Lüləkabab farşdan hazırlanır, farşın da içərisinə heyvanın yeyilməyən hissələri qatılır”
Azad İstehlakçılar Birliyinin sədri Eyyub Hüseynov “Bakı-Xəbər”ə şərhində bildirdi ki, Azad İstehlakçılar Birliyi uzun müddətdir regionlarda kəsilən at, eşşək ətlərinin, murdar olmuş ətlərin Bakıya daşınmasını izləyir. Bu yöndə ən uğurlu işi Daxili İşlər Nazirliyi Baş Mütəşəkkil Cinayətkarlıqla Mübarizə İdarəsi görür: “Bu qurum dəfələrlə ekspertizalar, həbslər və s. həyata keçirib. Amma bu problem həll olunmur. Səbəbi də odur ki, ölkədə istənilən ətin satılmasına icazə var. İstisna olunmur ki, 3 manatlıq kababları belə ətlərdən hazırlasınlar. Onu da deyim ki, lüləkabab farşdan hazırlanır. Farşın da içərisində heyvanın yeyilməyən hissələri - məsələn, beyni, yelini, dərisi və s. ola bilər. Yəqin ki, bu kimi ucuz kababların hazırlanmasında belə mənbələrdən istifadə olunur. İnsanlar da bu kimi kabablardan uzaq durmalıdır”.
Leyla Sarıyeva: “Ucuz qiymətə təklif edilən kabab və ya digər yeməklərin hazırlanmasında donmuş, mənşəyi məlum olmayan ət məhsullarından istifadə olunur”
Qida mütəxəssisi Leyla Sarıyeva da “Bakı-Xəbər”ə şərhində bildirdi ki, ətin satış qiyməti 16 manatdan başladığı halda 3 manata kababın satılması həmin məhsulun keyfiyyəti şübhəyə səbəb olur: “Ucuz qiymətə təklif edilən kabab və ya digər yeməklərin hazırlanmasında donmuş, vaxtı keçmiş, 2-ci və 3-cü dərəcəli heyvan ətlərindən, hətta mənşəyi məlum olmayan, qeyri-qanuni yollarla əldə edilmiş ət məhsullarından istifadə olunur. Həmin ətlərə müxtəlif qatqılar, ədviyyatlar qarışdırılaraq dadlandırılır və müştəriyə təqdim olunur. Bu cür məhsullar insan sağlamlığı üçün təhlükə yarada bilər. Qida zəhərlənmələri, qara ciyər və mədə-bağırsaq problemləri, yoluxucu xəstəliklər kimi risqlər bu ətlərin istifadəsi ilə birbaşa əlaqəlidir. Yaxşı olar ki, AQTA həmin məkanlara nəzarəti artırsın və ətin keyfiyyətini araşdırsın”.
Günel CƏLİLOVA
