Tural İrfan: “...Fərqlənməyən dini liderlərdən biri kimi II İliya da eyni görəvi icra edənlərdən biri kimi tarixə düşdü”
Gürcüstanın Katolikos-Patriarxı II İliya 93 yaşında vəfat edib. Təmsil etdiyi dindən aslı olmayaraq hər bir dini liderin fəaliyyətində sülhyönümlü addımlar əsas təşkil etməlidir. Çünki barış, əmin-amanlıq, dostluq, qardaşlıq Tanrının buyruğudur. Buna çalışmaq da dini liderlərin başlıca vəzifəsidir.
Maraqlıdır ki, 1977-ci ildən Gürcü Pravoslav Kilsəsinə rəhbərlik edən Patriarxın bu illər ərzində bölgədə sülhün bərqərar olması üçün hər hansı bir çağırışı olmayıb. Azərbaycan torpaqları işğal altında olan dövrdə, məscidlərimizi, kilsələrimizi, dini məbədlərimizi, müqəddəs ocaqlarımızı ermənilər viran qoyanda, təhqir edəndə II İliya Ermənistana hər hansı bir çağırış etməyib. Məhz onun dövründə Azərbaycanla Gürcüstan arasında David-Qareci monastır kompleksi məsələsi körüklənib. Gürcülər bu abidənin gürcü abidəsi sayıb və onlara verilməsini istəyiblər. Azərbaycan tarixçiləri isə əsaslandırılmış şəkildə bu kilsənin alban məbədi olduğunu bildiriblər.
Ümumiyyətlə, II İliya bir dini lider kimi bölgənin həyatında necə rol oynayıb?
Milli Cəbhə Partiyasının sədr müavini, tanınmış ilahiyyatçı Tural İrfan baki-xeber.com-a bildirdi ki, ümumiyyətlə post - sovet məkanında dinə başçılıq edən şəxslərin əksəriyyəti ya keçmiş KQB agenti, ya da şovinizmə qulluq edən şəxslər olub. “Bunu Ermənistanın timsalında çox görmüşük. 1977-ci ildən Gürcüstanın Katolikos-Patriarxı olan II İliya da Sovet ideologiyasının ələyindən keçmiş din xadimi idi. Ümumiyyətlə bu kimi din xadimlərinin düşüncəsi, fəaliyyət istiqamətləri də əsasən orta əsr təəssübkeşliyindən və ənənələrindən fərqlənmir. Məhz bu xüsusiyyətlər də onları eyni maraqlara xidmət edən dairələrin təsirinə salır, istifadə üçün görəvliyə çevirir. Qafqazda sülhün bərpa olunmasında, tolerantlığın qorunmasında, xalqlar arasında dostluq ənənələrinin bərpası kimi insani təşəbbüslərdə fərqlənməyən dini liderlərdən biri kimi II İliya da eyni görəvi icra edənlərdən biri kimi tarixə düşdü. Keçmiş Qarabağ münaqişəsinin başlanğıcından sonuna kimi, nə də müharibədən sonrakı sülh dövründə bu mövzuda ağzını açmayan dini liderin o qədər də parlaq obrazı olmayıb.
Ümid etmək olar ki, yeni katolikos bölgədə sülh və əmin-amanlığın, dostluğun tərənnümçüsü olan şəxslər arasından seçiləcək. Çünki bölgədə dini və milli tolerantlığın müdafiə və mühafizə olunması vacibdir”-deyə T.İrfan bildirdi.
İradə SARIYEVA
