Ramil Hüseynov: “Ola bilsin ki, Konqresə keçirilən seçkilərdən sonra bəzi istefalar başlasın”
Ağ Evdən İranla müharibə ilə bağlı fərqli səslər gəlməyə başlayıb. ABŞ mənbələrinə görə, Ağ Ev daxilindəki müşavirlər arasında müharibənin gedişatı ilə bağlı ciddi fikir ayrılıqları var.
Ağ Evin aparat rəhbəri Syuzi Uaylz və onun müavini Ceyms Blera da daxil olmaqla siyasi müşavirlər Trampa "qələbə anlayışını daraltmağı" və əməliyyatın məhdud olduğunu, sona yaxınlaşa biləcəyini vurğulamağı məsləhət görüblər. Trampın kriptovalyuta və süni intellekt üzrə müşaviri Devid Saks isə müharibəyə son qoymağın vaxtının çatdığını deyib. Britaniya xəbər agentliyi “Reuters”in məlumatına görə, Saks, indi qələbə elan edib müharibədən çəkilmək üçün doğru zaman olduğunu deyib. Saks ABŞ-ın İranın hərbi imkanlarını əhəmiyyətli dərəcədə zəiflətdiyini bildirib: "İndi çıxış yolu tapmağa çalışmalıyıq."
Bütün bunların əksinə olaraq, bəzi "qırğı" fraksiya nümayəndələrinin isə İrana qarşı hücumların davam etdirilməsini tələb etdiyi bildirilir.
Maraqlıdır, baş verənlər fonunda Trampın komandasında istefalar mümkündürmü?
Sözügedən məsələyə aydınlıq gətirən “Yeni Xətt” Siyasi Tədqiqatlar Mərkəzinin rəhbəri Ramil Hüseynov prinsipcə, bunu istisna etmədi: “Əvvəla, Trampın birinci prezidentliyi dövründə (2017-2020) bir sıra istefalar olub. Baxmayaraq ki, həmin dövrdə belə ekstrimal vəziyyət mövcud deyildi. Ancaq o vaxt Tramp administrasiyasından istefalar oldu. Bu istefalar içində ən çox səs-küy yaradan isə 2019-cu ilin oktyabrında Trampın milli təhlükəsizlik məsələləri üzrə müşaviri Cin Boltonun istefası idi. O zaman Boltonun istefası ciddi müzakirələrə səbəb oldu. Bu baxımdan əlbəttə, İranla aparılan müharibə uzanarsa, Birləşmiş Ştatlar qarşısına qoyduğu məqsədlərə çatmasa, ABŞ hakimiyyətində fikir ayrılıqları dərinləşəcək. Bu da istefalarla nəticələnəcək. Yox əgər İran məsələsində uğur əldə edilsə, o zaman Tramp administrasiyası monolitliyini qoruya biləcək. Ancaq son proseslər göstərir ki, ABŞ-ın ciddi uğurlar qazanacağı şübhə altındadır. Çünki müttəfiqləri ABŞ-a dəstək vermir. Üstəlik, noyabrda Konqresə aralıq seçkilər keçiriləcək. Böyük ehtimalla Respublikaçılar Partiyası məğlub olacaq. Son sorğular göstərir ki, Trampın ABŞ cəmiyyətində nüfuzu aşağı düşüb. Ola bilsin ki, Konqresə keçirilən seçkilərdən sonra bəzi istefalar başlasın. Çünki seçkilərin nəticəsi bu baxımdan həlledici ola bilər. Hər halda görünən odur ki, Tramp administrasiyasında mövcud olan fikir ayrılıqları açıq müstəviyə keçməkdədir”.
Vidadi ORDAHALLI
