ABŞ prezidenti Donald Trampın mobil telefon nömrəsinin sızdırıldığı iddia edilir. “The Atlantic” qəzeti yazır ki, Trampın şəxsi telefon nömrəsi müəyyən qruplar tərəfindən ələ keçirilib və hətta onu satmaq cəhdləri də edilib. Maliyyə bazarlarına təsir göstərə biləcək açıqlamalara birbaşa çıxış əldə etmək istəyən şəxslərin isə Trampın nömrəsini əldə etmək üçün səylər göstərdiyi iddia edilir.
İki yüksək vəzifəli məmura istinadən, nömrənin sızdırılmasının prezidentə edilən telefon zənglərinin kəskin artmasına və Ağ Evdə qarışıqlığa səbəb olduğu iddia edilir.
Bəzi mənbələr Trampın telefon nömrəsini pula və ya kriptovalyutaya dəyişdirmək cəhdlərinin edildiyini də iddia edirlər. Bildirilir ki, jurnalistlər və müxtəlif qruplar prezidentlə birbaşa əlaqə qurmaq üçün rəqabətə giriblər və bəzi jurnalistlər hətta nömrə müqabilində digər dünya liderlərinə və ya tanınmış şəxslərə məxsus əlaqə məlumatlarını təklif ediblər.
"Bu, həqiqətən də dəlilikdir. Bəzi CEO-ların nömrə üçün pul təklif etdiyini, hətta kriptovalyuta investorlarının kriptovalyuta təklif etdiyini eşitmişəm" – deyə ası açıqlanmayan bir rəsmi bildirib.
Trampın telefonuna edilən zənglərin sayının artdığı, məsləhətçilərin buna uyğunlaşmaqda çətinlik çəkdiyi bildirilir. Məsələ ilə bağlı şərh verən Ağ Evin sözçüsü Anna Kelli bildirib ki, Prezident Tramp tarixin ən şəffaf və əlçatan prezidentidir: “Mətbuat Trampdan doymaq bilmir və onlar bunu bilirlər".
Qeyd edilib ki, bir çox böyük media orqanı, xüsusən də ABŞ-ın İrana qarşı son hərbi əməliyyatlarından sonra Trampla birbaşa müsahibə almağa çalışır. ABC News, CNN, Fox News, NBC News, “The New York Times”, “The Washington Post” və “Politico” kimi media orqanlarının bu müddətdə prezidentlə telefon danışıqları apardığı bildirilir. Ancaq Ağ Ev rəsmiləri bildiriblər ki, Trampın telefon nömrəsini dəyişdirmək üçün hazırda heç bir plan yoxdur.
Digər tərəfdən, Trampın telefon nömrəsi və artan rabitə trafiki ilə bağlı iddialar Ağ Evdə həm təhlükəsizlik, həm də informasiya axını ilə bağlı yeni müzakirələri ön plana çıxarıb. Telefon nömrəsinin sızmasından sonra zənglərin artmasına baxmayaraq, administrasiya mövcud vəziyyəti dəyişdirməyi planlaşdırmır. Bununla belə, məsələ prezidentin təhlükəsizliyi baxımından yaxından izlənilir.
Tahir TAĞIYEV
