Azər Həsrət: “Rusiya yardım göstərməyə cəhd etməklə əslində revanşist qüvvələri seçkiqabağı dirçəltməyə çalışır”
Ermənistan “Rus humanitar missiyası”, “Avrasiya” və “Rossotrudniçestvo” xətti ilə Qarabağı tərk etmiş ermənilərə dəstəyin davam etdirilməsindən imtina edib. Bu yardım proqramı 2025-ci ilin iyun–iyul aylarında erməni ictimai təşkilatlarının müraciətinə cavab olaraq başlanmışdı. Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə bildirib.
Onun sözlərinə görə, “Rusiya heç vaxt həmin regionun insanlarını köməksiz qoymayıb və Ermənistanda yaşayan Qarabağ ermənilərinin taleyinə laqeyd qalmayıb”.
Zaxarova xatırladıb ki, hələ o vaxt İrəvanda Rusiya köməyinə münasibətin birmənalı olmamasına baxmayaraq, Moskva respublikaya humanitar yardım göndərən ilk ölkələrdən biri olub: “Hətta rəsmi kanallar vasitəsilə belə deyilirdi: “təşəkkür edirik, lazım deyil”. İndi isə Qarabağ ermənilərinə dəstəyin davam etdirilməsindən növbəti dəfə imtina edilib”.
Rusiyanın indiki məqamda Qarabağ ermənilərinə humanitar yardımla bağlı canfəşanlıq etməsində məqsədi nədir?
Sözügedən məsələni baki-xeber.com-a şərh edən siyasi ekspert Azər Həsrətin fikrincə, Rusiyanın bu təşəbbüsü artıq tam olaraq bitmiş münaqişəni yenidən körükləmək cəhdidir: “Məlum olduğu kimi, Azərbaycanla Ermənistan tam olaraq anlaşıb. Arada narazılıq və narahatlıq doğuran heç bir məsələ qalmayıb. O cümlədən, Qarabağ erməniləri ilə bağlı mövqe birmənalı və qətidir. Ermənistan tərəfi başda baş nazir Nikol Paşinyan olmaqla bu məsələni təmiz qapadıb. Üstəlik, Qarabağ ermənilərinin əksəriyyəti Ermənistan vətəndaşlığını alıb. Onların bütün problemlərini Ermənistan dövləti həll edib və edir. Yəni onlar faktiki olaraq xarici yardımlara möhtac durumda deyillər. Belə bir şəraitdə heç bir ehtiyac olmadan Rusiyanın qalxıb da Qarabağdan könüllü getmiş ermənilərə humanitar yardım göndərmə cəhdi münaqişəni xatırlatmaq, körükləmək və yenidən alovlandırmaq cəhdidir. Hərçənd o cəhd baş tutan deyil və ciddi bir nəticə verməyəcək, amma istənilən halda könül bulandırır. O baxımdan Mariya Zaxarovanın, yaxud da ki, ermənilərə yardım göstərənlərin timsalında Rusiya milçəkdir, bir şey deyil. Lakin könül bulandırmaq istəyir. Ona görə də Ermənistan tərəfi açıq şəkildə onların bu təşəbbüsünü rədd edib. Yəni bu, əslində Ermənistanın Rusiyaya mədəni şəkildə dediyi belə bir ifadə kimi yozula bilər: əl çəkin yaxamızdan, cəhənnəm olun. Biz sizə görə illərdir əziyyət çəkmişik. Bundan sonra sizinlə bütün bağları qoparırıq ki, canımız rahat olsun. Öz evimizdə, bütövlükdə Qafqazda rahat yaşaya bilək. Deməyim odur ki, Ermənistanın rədd etməsini bu cür yozmaq olar. Lakin bu, o demək deyil ki, Rusiya sakit duracaq. Rusiya bu təşəbbüsü davam etdirmək üçün başqa bir variant da fikirləşəcək. Ancaq istənilən halda Ermənistan dövləti düzgün addım atıb. Rusiya Qarabağ ermənilərinə yardım göstərməyə cəhd etməklə əslində Ermənistanda revanşist qüvvələri seçkiqabağı dirçəltməyə çalışır. O məqsədlə ki, bəlkə də qaytardılar. Ancaq bu qammazlar hələ də anlamırlar ki, erməni xalqı artıq Rusiyanın “dəstəkləri” hesabına yaşadığı ağır vəziyyətlərdən yorulub. Bundan sonra Rusiyanın təhriki ilə yenidən münaqişə tərəfi olmaq istəmir”.
Vidadi ORDAHALLI
