Akif Nağı: “Vardanyanın bu iddiaları əsasssızdır, mənasızdır, o hələ də yanlış yoldadır”
Bakı Hərbi Məhkəməsi tərəfindən qəti olaraq 20 il müddətinə azadlıqdan məhrumetmə cəzasına məhkum edilən separatçı Ruben Vardanyan ənənəvi tryuklarından qalmır. Sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyan 20 il həbsə məhkum edilməklə layiq olduğu cəzanı alıb. Bu adam cəzasını çəkmək əvəzinə həbsxanada müəyyən şoular yaratmaqla məşğul olur. Erməni mediası da Vardanyanın şoularını yaymaqda davam edir. Vardanyanın erməni mediasında yayılan məktubunda iddia edilir ki, Vardanyan Azərbaycan Ombudsmanı Səbinə Əliyeva ilə əlaqə saxlamaq istəyir, amma ona guya icazə verilmir. Vardanyan S.Əliyeva ilə görüşmək istədiyini, lakin buna imkan yaradılmadığını deyir. O, həmçinin iddia edib ki, ona ittiham aktı guya tədqim edilməyib və bu səbəbdən də ombudsmanla görüşmək istəyir.
Vardanyanın iddiasının heç bir əsası olmadığını deyən Azad Vətən Partiyasının sədri Akif Nağı baki-xeber.com-a bildirdi ki, bu da növbəti yalandır. “Vardanyan özünün ənənəvi ampulasındadır və yenə də yalan danışır, Azərbaycan tərəfə qarşı müxtəlif ittihamlar irəli sürməklə diqqəti əsas məsələdən yayındırmağa çalışır. Ətraflı və obyektiv tədiqiqat işi aparılıb, məhkəmənin əsaslandırılmış qərarı var. Onun dedikləri tamamilə yalandır. Ola bilməz ki, ittiham aktını ona verməsinlər. Bunu telefonda dilə gətirmək, şişirmək, onu “qərəzli” mövqe kimi qələmə vermək tamamilə yanlış bir yanaşmadır. Azərbaycan tərəfi bunlara əslində humanist yanaşdı. Ombudsmana müraciət edirsə, etsin, burada heç bir problem yoxdur. Ombudsman onların görüşünə də gedir, onları dinləyir. Amma o, yalandan deyir ki, guya Səbinə Əliyeva ilə əlaqə saxlamır. Digər tərəfdən, Vardanyanın nə ixtiyarı var ki, Azərbaycanın hüquq-mühafizə orqanlarına, vətəndaş cəmiyyəti institutlarına qarşı ittihamlar səsləndirsin. Ağ yalan danışırsa, onun telefon danışığı kəsilə də bilər. Amma inanmıram ki, kəsilsin.
Vardanyanın bu əsassız yalanı növbəti dəfə öz personasına diqqəti cəlb etmək mahiyyəti daşıyır. Əslində bunlar öz günahlarını etiraf etməlidirlər, Azərbaycan hökumətindən əfv edilmələrini diləməlidirlər, yaxud sakit şəkildə cazalarını çəkməlidirlər”.
A.Nağı qeyd etdi ki, Vardanyanın və digərilərinin əli Azərbaycan xalqının qanına batıb, Vardanyan terroruçuları maliyyələşdirib, ağır cinayət törədiblər. A.Nağı vurğuladı ki, Azərbaycan dövlətinin humanist mövqeyinin Vardanyan və digəriləri dəyərləndirmək əvəzinə uydurma məsələlərlə beynəlxalq qurumların diqqətini cəlb etmək istəyirlər, amma buna nail ola bilməyəcəklər. “Azərbaycan bu prosesi hüquqi müstəvidə həyata keçirib, bundan sonra da işlərini davam etdirəcək. Vardanyanın bu iddiaları əsasssızdır, mənasızdır, o hələ də yanlış yoldadır. Səhvlərini düzəltmək əvəzinə bu cür absurd iddialar səsləndirir”-deyə A.Nağı qeyd etdi.
İradə SARIYEVA
