Züriyə Ruslanqızı: “İranla açıq hərbi qarşıdurma Körfəz dövlətləri üçün təkcə siyasi deyil, həm də iqtisadi və təhlükəsizlik baxımından ciddi nəticələr doğura bilər”
ABŞ Prezidenti Donald Tramp C14 telekanalına verdiyi müsahibədə bildirib ki,ərəb ölkələri ABŞ və İsrailin İran əleyhinə hərbi əməliyyatına qoşulmalıdır. Lakin Körfəz ölkələri İrana qarşı müharibəyə başlamaq fikrində deyillər. Onlardan bəziləri ümumərəb qoşun birliyi yaratmaq və bundan sonra müharibəyə girmək ideyası veriblər. Bu da təbii ki, uzun çəkəcək prosesdir. Bu onu göstərir ki, Körfəz ölkələri sadəcə məsələni uzadırlar ki, İranla ABŞ-ın sonunun nə olacağını görsünlər.
Körfəz ölkələrinin müharibə ilə bağlı hazırda tutduqları mövqeni şərh edən politoloq Züriyə Ruslanqızı (Qarayeva) baki-xeber.com-a bildirdi ki, Körfəz ölkələrinin İrana qarşı müharibəyə tələsməməsi və məsələni mümkün qədər diplomatik və kollektiv mexanizmlər çərçivəsində müzakirə etməsi onların regiondakı riskləri çox yaxşı hesabladıqlarını göstərir. “İranla açıq hərbi qarşıdurma Körfəz dövlətləri üçün təkcə siyasi deyil, həm də iqtisadi və təhlükəsizlik baxımından ciddi nəticələr doğura bilər. Enerji infrastrukturu, dəniz nəqliyyatı və xüsusilə də Fars körfəzi ətrafındakı strateji obyektlər belə bir müharibə zamanı birbaşa hədəfə çevrilə bilər. Buna görə də Ümumərəb qoşun birliyi ideyasının irəli sürülməsi əslində bir növ siyasi manevr kimi görünür: həm kollektiv təhlükəsizlik görüntüsü yaradılır, həm də qərarın qəbul edilməsi prosesi uzadılır”.
Z.Ruslanqızının fikrincə, digər tərəfdən, Körfəz ölkələrinin bu ehtiyatlı mövqeyi onların ABŞ-İran qarşıdurmasının nəticəsini gözləmək istəməsi ilə də bağlıdır: “Əgər Vaşinqton və Tehran arasında gərginlik hərbi mərhələyə keçərsə, region ölkələri birbaşa müharibənin yükünü üzərlərinə götürmək istəmir və prosesin hansı istiqamətdə inkişaf edəcəyini görmək istəyirlər. Bu baxımdan, Ümumərəb hərbi koalisiyası ideyası real müharibə hazırlığından daha çox siyasi siqnal xarakteri daşıyır: Körfəz ölkələri həm ABŞ-la strateji tərəfdaşlığı qorumağa çalışır, həm də İranla tammiqyaslı qarşıdurmanın region üçün ağır nəticələr verəcəyini nəzərə alaraq mümkün qədər məsafəli və balanslı mövqe tutmağa çalışırlar”.
İradə SARIYEVA
