ABŞ və İsrailin 28 fevralda İrana qarşı başlatdığı hücumlar 18 gündür davam edir. İran qonşu ölkələrdəki ABŞ bazalarını və enerji ehtiyatlarını hədəf alaraq cavab verir. İran tərəfindən Hörmüz boğazının bağlanması isə ciddi enerji riski yaradıb. Qlobal miqyasda müharibənin uzanması ilə bağlı narahatlıqların artdığı bir vaxtda, Birləşmiş Millətlər Təşkilatının Ümumdünya Ərzaq Proqramından (ÜƏP) qorxunc bir açıqlama gəlib.
İran iki vasitəçi ölkənin ABŞ-la gərginliyi azaltmaq üçün təklifini rədd edib. Tərəflərdən heç biri geri çəkilmədiyi üçün BMT-nin himayəsi altında fəaliyyət göstərən ÜƏP-in açıqlaması da əsas müzakirə mövzusuna çevrilib.
ÜƏP-in hesabatına görə, İranla müharibə iyun ayına qədər davam edərsə, on milyonlarla insan daha da şiddətli aclıqla üzləşəcək. ÜƏP rəhbərinin müavini Karl Skau bildirib ki, qida, neft və nəqliyyat xərclərinin artması səbəbindən daha 45 milyon insan aclığa məruz qalacaq və qlobal miqyasda bu rəqəm hazırkı rekord səviyyə olan 319 milyonu keçəcək.
Ümumdünya Səhiyyə Təşkilatının (ÜST) baş direktoru Tedros Adhanom Qebreyesus isə xəstəxana və ya məktəbi bombalamağın müharibə cinayəti olduğunu bildirib. Sosial media hesabında paylaşım edən Qebreyesus xəstəxana və ya məktəbi bombalamağın "səhv hesablama" olmadığını vurğulayıb.
Qebreyesus səhiyyə işçisinin öldürülməsinin "gözlənilməz səhv" və mülki əhalinin aclıq çəkməsinin "sövdələşmə taktikası" olmadığını vurğulayıb: “Bunlar müharibə cinayətləridir. Nöqtə. Gəlin bunun adını doğru qoyaq".
Tahir TAĞIYEV
