Əli Orucov: “İrana qarşı 11 sentyabra bənzər planın ABŞ üçün uğurlu olacağını real hesab etmirəm”
İranın Ali Milli Təhlükəsizlik Şurasının katibi Əli Laricani sensasion iddia ilə çıxış edib. Laricani sosial şəbəkə hesabında paylaşdığı açıqlamada bildirib ki, onun əldə etdiyi məlumatlara görə, “Ceffri Epşteyn şəbəkəsinin qalan üzvləri” yeni təxribat planı hazırlayırlar. Onun sözlərinə görə, həmin şəxslər 11 sentyabr terror hadisələrinə bənzər böyük bir insident yaratmağı və bu hadisəyə görə İranı günahlandırmağı planlaşdırırlar.
Laricani onu da vurğulayıb ki, ABŞ “Şahid” PUA-larının saxta variantlarını düzəldib region ölkələrinə zərbə endirilir. Bildirib ki, İranın bunlardan xəbəri yoxdur. Onun fikrincə, onlar bununla saxta 11 sentyabr yaradıb dünya dövlətlərini İranın üstünə yönəltsinlər: “Eşitdiyimə görə, Epşteyn şəbəkəsinin qalan üzvləri 11 sentyabr hadisəsinə bənzər bir insident yaratmaq və İranı günahlandırmaq üçün sui-qəsd hazırlayıblar. İran bu cür terror planlarına qəti şəkildə qarşı çıxır və Amerika xalqı ilə müharibə aparmır”.
Maraqlıdır, bu plan ABŞ üçün nə dərəcədə uğurlu plan ola bilər?
Sözügedən məsələni baki-xeber.com-a şərh edən AMİP funksioneri Əli Orucov buna birmənalı yanaşmadı: “Əvvəla, hansısa planı illər sonra olduğu kimi və ya bənzər formada tətbiq etmək uğurlu nəticə verməyəcək. Hər dövrün öz qaydaları və reallıqları var. Ən azından ona görə ki, 11 sentyabr hadisələri barədə çox deyilib, çox yazılıb. Hətta belə iddialar var ki, Birləşmiş Ştatlar Əfqanıstan və İraqa müdaxilə etmək üçün həmin terrora zəmin yaradıb. Zamanında onu önləmək üçün gərəkən addımları atmayıb və s. İndiki məqamda ABŞ 11 sentyabrın bənzərinə zəmin yaradıb İrana hücumları genişləndirsə, bu, dünyada birmənalı qarşılanmayacaq. Nəzərə almaq lazımdır ki, internet əsrində yaşayırıq və ictimai rəyi 20 il əvvəl olduğu kimi formalaşdırmaq, yönəltmək asan məsələ deyil. Saxta “Şahid” PUA-ları hazırlayıb İranın adından qonşu ölkələrə atmaq mümkündür. Ancaq reallıq ondan ibarətdir ki, İranın qonşu ölkələri dron və raket zərbələrinə məruz qoyması ilə bağlı kifayət qədər ciddi faktlar var. Bir belə ölkəyə ABŞ-la İsrail İranın adından necə dron ata bilər? Bu, o qədər də real görünmür. Nəzərə almaq lazımdır ki, PUA və raketlərin haradan atıldığını kosmik peyklər qeydə ata bilir. ABŞ-ın İrana zərbələrinə gəldikdə isə, Vaşinqton əgər etiraz aksiyaları keçirilən zaman İrana zərbələr endirsəydi, bu, effektiv ola bilərdi. Etirazlar yatırılandan bir ay sonra ABŞ-ın zərbələrə başlaması İran cəmiyyətində birmənalı qarşılanmadı. Biz görürük ki, bu, hətta əks effekt verir. Ona görə də İrana qarşı 11 sentyabra bənzər planın ABŞ üçün uğurlu olacağını real hesab etmirəm”.
Vidadi ORDAHALLI
