Elşad Həsənov: “İran Xəzər üzərindən Ukraynaya raket və PUA-lar ata bilər”
İran Parlamentinin Milli Təhlükəsizlik Komitəsinin rəhbəri İbrahim Əzizi Kiyevə qarşı kəskin təhdidlərlə çıxış edib. Əzizi Ukrayna ərazisinin İran üçün “qanuni hədəf” olduğunu bəyan edib. O, Ukraynanı İsrailə pilotsuz uçuş aparatları (PUA) vasitəsilə dəstək verməkdə ittiham edərək bu addımın Kiyevi faktiki olaraq müharibənin tərəfinə çevirdiyini bildirib:
“Ukrayna İsrail rejiminə dronlarla dəstək verməklə faktiki olaraq müharibəyə cəlb olunub və BMT Nizamnaməsinin 51-ci maddəsinə əsasən, bütün ərazisini İran üçün qanuni hədəfə çevirib”.
Maraqlıdır, İranın Ukrayna ərazini vurmaq üçün uzaqmənzilli raketləri, PUA-ları varmı, bunu necə və haradan ata bilər? Axı İran Ukrayna ilə sərhədə malik deyil? İran Azərbaycanın hava sahəsini pozub Ukraynaya raket, dron ata bilərmi? Yaxud da Xəzər dənizi sahillərindən istifadə edə bilərmi?
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov buna bir neçə prizmadan yanaşdı: “Artıq 4 ildir Rusiya Ukraynada müharibə aparır və raketlərlə yanaşı, PUA-lardan geniş istifadə edilir. Rusiya tərəfindən Ukraynaya atılan PUA-ların böyük əksəriyyəti İran lisenziyası ilə istehsal edilən və təkmilləşdirilən dronlardır. Müharibənin ilk aylarında Rusiya İrandan dronları aldı. Daha sonra onların istehsalını təşkil etdi. Müharibə ilə əlaqədar Ukrayna PUA-ların zərərsizləşdirilməsi ilə bağlı çox böyük təcrübə toplayıb. İndi Ukrayna əldə etdiyi təcrübəni bir sıra ölkələrlə bölüşür. Çünki həmin ölkələr bununla bağlı Ukraynaya müraciət edir. Söhbət Avropa, Körfəz ölkələrindən, ABŞ və İsraildən gedir. Məhz Ukraynanın dronlara qarşı mübarizə ilə bağlı təklifi İranı qıcıqlandırıb. İran Parlamentinin Milli Təhlükəsizlik Komitəsinin rəhbəri İbrahim Əzizinin Ukraynaya qarşı səsləndirdiyi kəskin təhdidlər yersiz deyil. Nəzərə alsaq ki, İran İsrailə qarşı ballistik raketlərdən, PUA-lardan istifadə edir, onları Ukraynaya da ata bilər. Bəzi məlumatlara görə, İranın 3 minədək ballistik raketi var. Görünən odur ki, İrandakı molla rejimi müharibəyə güclü hazırlaşıb. Əhalinin həyat səviyyəsinin aşağı düşməsi hesabına silahlanmaya böyük vəsaitlər ayırıblar. Belə olmasaydı bu zərbələrdən sonra rejim çökərdi, amma biz bunun əksini müşahidə edirik. Baxmayaraq ki, İran uzun illərdir sanksiyalar altındadır. Azərbaycan İrana qarşı müharibədə öz hava məkanından istifadəyə icazə vermir. O cümlədən, Azərbaycan öz hava məkanından Ukraynaya qarşı istifadə edilməsinə də razılıq verməz. Yəni İran Azərbaycanın hava məkanını pozaraq Ukraynaya raket, dron atsa, onun qarşısı alınacaq. Ancaq İran Xəzər üzərindən Ukraynaya raket və PUA-lar ata bilər. Çünki Rusiya Xəzərdəki gəmilərdən Ukraynaya raket zərbəsi endirir. Hətta İran gəmilərini Xəzərin Rusiya sahillərinə aparıb oradan bunu edə bilər. Ancaq İranın ABŞ və İsrail tərəfindən güclü zərbələrə məruz qaldığı üçün, bu imkanları elə də geniş deyil. Məsələnin həm də bu tərəfi var”.
Vidadi ORDAHALLI
