Məlum olduğu kimi, Kənd Təsərrüfatı Nazirliyinin və Azərbaycan Arıçılar Assosiasiyasının birgə təşkilatçılığı ilə 20 oktyabr-7 noyabr tarixlərində arıçılıq məhsullarının 21-ci Respublika Sərgi-Satış Yarmarkası keçiriləcək.
Bal istehsalçıları iştirak üçün əvvəlcədən onlayn qeydiyyatdan keçməli olsa da, bu sahədə narazılıq yaranıb. Belə ki, onların bir qismi vaxtında qeydiyyatdan keçə bilməyib. Qeydiyyatdan keçə bilməyən arıçılar narazılıq edir. Xüsusilə cənub bölgəsinin arıçıları iddia edir ki, bal yarmarkasında qeydiyyat düzgün aparılmadığı üçün məhdud iştirakçı yarmarkaya qatılıb.
Onlar qeydiyyatın düzgün aparılmadığını, internet problemini, məhdud iştirakçı sayını əsas gətirirlər.
Arıçıların bildirdiyinə görə, kəndlərdə internet zəifdir, yaşlı insanlar smartfonlardan istifadə edə bilmir: “Bu kimi problemlər onlayn qeydiyyat məsələsində ciddi çətinliklər yaradır. Başqa bir arıçı qeydiyyat üçün onlayn müraciət etsə də ona müsbət cavab verilmir. Belə olduğu halda, yüz kilolarla bal əlimizdə qalır. Qeydiyyatdan keçə bilməyənlərə yenidən şərait yaradılmalıdır”.
Arıçılar onu da qeyd edir ki, yarmarkada iştirakçı sayı hər bir iqtisadi rayondan maksimum 40 nəfəri keçməməklə növbəlilik əsasında müəyyən edilib. Bir arıçı yarmarkaya 400 kq bal və hər arı ailəsi üzrə 1 ədəd olmaqla 30 ədəd arı şanı çıxara bilər. Cənub bölgəsinin arıçıları 250 nəfərlik məhdudiyyətin aradan qaldırılmasını və qeydiyyatdan keçə bilməyənlərə şans verilməsini istəyir.
Masallı Rayon Arıçılar Birliyi - Səmədağa Həmidov: “Arıçıların sərgidə iştirak etməməsinin səbəbi kimi onların gec müraciət etməsi deyilir, ancaq əslində belə deyil”
Masallı Rayon Arıçılar Birliyinin sədri Səmədağa Həmidov bildirdi ki, arıçıların sərgidə iştirak etməməsinin səbəbi kimi onların gec müraciət etməsi deyilir: “Ancaq əslində belə deyil. Maraqlıdır, məndən sonra müraciət edənlər qeydiyyatdan keçir, yarmarkada iştirak edir. Lakin mən keçə bilmirəm. Ümumiyyətlə, arıçıların rayonlar üzrə bölgüsü olmalıdır”.
Kənd Təsərrüfatı Nazirliyi: “Təsərrüfatçıların üzləşdiyi çətinliklərin həll olunması məsələsi səlahiyyətimizdə deyil”
Məsələ ilə bağlı Kənd Təsərrüfatı Nazirliyinin mətbuat xidmətindən bildirilib ki, təsərrüfatçıların üzləşdiyi çətinliklərin həll olunması məsələsi onların səlahiyyətində deyil.
Son olaraq qeyd edək ki, iki ildir pandemiya ilə əlaqədar bal yarmarkaları təşkil olunmurdu.
Günel CƏLİLOVA
