Məlum olduğu kimi, 17 orta ixtisas təhsili müəssisəsi publik hüquqi şəxs statusu alıb. Nazirlər Kabineti bununla bağlı müvafiq qərar verib.
Belə ki, Təhsil Nazirliyinin tabeliyində fəaliyyət göstərən digər 17 orta ixtisas təhsili müəssisəsinin (Ağcabədi Pedaqoji Kolleci, Ağdam Dövlət Sosial-İqtisadi Kolleci, Ağdam Musiqi Kolleci, Ağdaş Dövlət Humanitar Kolleci, Astara Pedaqoji Kolleci, Bərdə Dövlət İdarəetmə və Texnologiya Kolleci, Göyçay Dövlət İdarəetmə və Texnologiya Kolleci, İsmayıllı Dövlət Humanitar və Texnologiya Kolleci, Qazax Dövlət Sosial-İqtisadi Kolleci, Quba Dövlət Sosial-İqtisadi Kolleci, Masallı Dövlət Regional Kolleci, Sabirabad Dövlət Sosial-İqtisadi Kolleci, Şamaxı Dövlət Regional Kolleci, Şirvan Dövlət İqtisadiyyat və Humanitar Kolleci, Şuşa Humanitar Kolleci, Tovuz Dövlət Sosial-İqtisadi Kolleci, Zaqatala Dövlət İdarəetmə və Texnologiya Kolleci) publik hüquqi şəxslərə çevrilmə şəklində yenidən təşkili ilə əlaqədar Nazirlər Kabinetinin qeyd olunan Qərarı qəbul olunub.
Maraqlıdır, qeyd olunan təhsil müəssisələrinin fəaliyyətində hansı dəyişikliklər olacaq və peşə məktəblərinin yeni statusu nə vəd edir?
“Bu kolleclərin regionlarda yerləşməsini nəzərə alsaq, orada yaşayan gənclərin ixtisas sahibi olması üçün yaxşı şansdır”
Təhsil eksperti Nizami Hüseynov bildirdi ki, 17 kollecə publik hüquqi şəxs statusunun verilməsi mütərəqqi addımlardan biridir. Bu kolleclərin regionlarda yerləşməsini nəzərə alsaq, orada yaşayan gənclərin ixtisas sahibi olması üçün yaxşı şansdır: “Publik hüquqi şəxs statusunu aldıqdan sonra kolleclər maddi müstəqillik qazana və sərbəst fəaliyyət göstərə bilərlər. Həmçinin, regionla əlaqəli müxtəlif layihələrdə iştirak edə bilərlər. Bu da onların vəsait qazanmasına şərait yaradacaq. Kollec tələbələrinin iş tapması və təcrübə keçməsi üçün geniş imkanlar yaradılacaq. İlk olaraq publik hüquqi şəxs statusu 4 ali təhsil müəssisəsinə verildi. Onlar müxtəlif, alternativ gəlirlər formalaşdıra bildilər. Bu mütərəqqi və inkişafa hesablanmış addımdır”.
Ekspert hesab edir ki, kolleclər publik hüquqi şəxs olduqdan sonra orta ixtisas təhsili müəssisələri boş-boş fənlər tədris etmək, dərsləri yola vermək əvəzinə işinə daha məsuliyyətlə yanaşacaq. Beynəlxalq sertifikatlaşmış mütəxəssisləri praktik dərslərə çağırmalı olacaq. Bu kimi tələblərin öhdəsindən gələ bilməyən təhsil müəssisələri əmək bazarı ilə uyğunlaşa bilmədikdə, reytinqi aşağı düşəcək və tədricən bağlanacaq.
Günel CƏLİLOVA
