İş dəftərlərinin məktəblərdə faktiki məcburiyyət halına gətirilməsi hər zaman müzakirə mövzusu olub və bir çox valideyn hər zaman bundan şikayət edib. Bu il isə valideynlər başqa bir problemlə qarşılaşıblar. Deməli, bəzi iş dəftərlərinin satışı yalnız poçtlarda təşkil olunur və bu iş dəftərlərini başqa heç bir yerdə tapmaq mümkün deyil. Üstəlik, valideynlər dərslərin başlamasından 10 gündən çox vaxt keçməsinə baxmayaraq, poçtlardan bu dəftərləri tapmaqda çətinlik çəkirlər.
Qeyd edək ki, Təhsil Nazirliyi bir müddət əvvəl açıqlama vermişdi ki, ibtidai siniflərdə iş dəftərlərinə ehtiyac yoxdur. Amma məktəblərdə bunun əksi müşahidə edilir. Belə ki, məktəblər valideynləri iş dəftəri almağa məcbur edir.
Kamran Əsədov: “İş dəftərləri ilə problemin yaşanmasının səbəbi sayla bağlıdır”
Təhsil eksperti Kamran Əsədov bildirdi ki, əlavə dərs vəsaitlərinin poçt vasitəsilə çatdırılmasında məqsəd Bakıətrafı ərazilər və rayonlarda şagirdlərin iş dəftərlərinə əlçatanlığını asanlaşdırmaqdır. Onun sözlərinə görə, valideynlərin ən çox üzləşdiyi say problemi də tənzimlənməlidir: “İş dəftərləri ilə bağlı problemin yaşanmasının səbəbi sayla bağlıdır. Bakının Nərimanov, Xətai, Binəqədi, Yasamal rayonlarında şagird yerdəyişmələri daha çox olur. Bu ərazilərdə şagird artımı müşahidə olunsa da, əvvəlki sayda iş dəftəri göndərilir və bu səbəbdən hamıya çatmır. Görünən odur ki, bu məsələdə Təhsil Nazirliyi ilə “Azərpoçt”un arasında əlaqə müəyyən qədər zəifdir. Şagird sayı ilə bağlı rəqəmlər sentyabrın 1-nə qədər “Azərpoçt”a verilməlidir ki, qurum hər rayon üzrə nə qədər şagirdin məktəbə gedəcəyini bilsin. Bu sahədə yaşanan problemi həll etmək üçün poçta normadan əlavə 100 iş dəftəri də göndərilməlidir”.
Ekspert onu da əlavə etdi ki, iş dəftərlərinin qiyməti süni şəkildə artırılır.
Nizami Hüseynov: “İş dəftərləri təhsilə, biliyə və elmə xidmətdən daha çox, kommersiya maraqlarına xidmət edir”
Təhsil eksperti Nizami Hüseynov isə bildirdi ki, doğrudan da iş dəftərləri, testlər və s. məcburi deyilsə, o zaman təhsili onun üzərində qurmaq da düzgün deyil. Əks halda valideynlər onları almaq məcburiyyətində qalır və əlavə xərcə düşmüş olurlar. Bu isə aztəminatlı ailələr üçün isə xüsusilə çətinlik yaradır: “İş dəftərləri təhsilə, biliyə və elmə xidmətdən daha çox kommersiya maraqlarına xidmət edir”.
Günel CƏLİLOVA
